Read Malay, Manado Yohanes 9 Bible Online

Yohanes 9 - Malay, Manado bible

Yohanes 9

¹Waktu Yesus samantara bajalang, Dia lia satu orang buta yang so buta dari lahir.

²Tu Dia pe murit-murit batanya pa Yesus, “Guru, kiapa dang ni orang ini buta dari dia lahir? Apa dia bagitu lantaran dia pe dosa ato lantaran dia pe orang tua pe dosa?”

³Yesus manyao, “Dia lahir buta, itu bukang lantaran dia pe dosa deng bukang lei lantaran dia pe orang tua pe dosa, mar dia bagitu supaya orang-orang bole lia tu Tuhan Allah pe kuasa yang bakarja pa dia.

⁴Torang musti beking tu karja yang Tuhan Allah da kase. Dia itu yang da utus pa Kita. Torang musti beking tu karja yang Dia da kase itu slama torang masi di dunia ini. Itu bole mo se sama deng torang bakarja slama hari masi siang lantaran kalu so malam so nyanda ada lei tu bole mo bakarja.

⁵Slama Kita masi ada di dunia, Kita ini tu trang dunia yang kase trang pa samua orang pe hati.”

⁶Abis Yesus bilang itu, Dia baluda ka tana kong se campur tu luda deng tana sampe jadi pece. Abis itu, Dia se goso tu pece itu pa tu orang buta pe mata.

⁷Kong Yesus bilang pa tu orang buta itu, “Pigi jo, kong cuci ngana pe muka di kolam Siloam.” (Siloam itu de pe arti, ‘Tu dapa utus’.) Pe dengar itu, tu orang itu pi cuci de pe muka di situ. Kong waktu dia mo babale pa de pe ruma, dia so bole balia.

⁸Trus dia pe birman-birman deng tu orang-orang yang da lia dia dulu ja baminta-minta, dorang babilang, “Dia ini to yang dulu ja dudu-dudu kong baminta-minta?”

⁹Ada tu babilang, “Butul, dia no ini.” Kong ada lei yang babilang, “Bukang, mar dia ini sama deng tu orang itu.” Kong tu orang yang dulu buta itu babilang, “Butul, kita no itu.”

¹⁰Kong dorang tanya pa dia, “Bagimana kong skarang ngana pe mata so bole balia dang?”

¹¹Dia manyao, “Tu Orang yang Dia pe nama Yesus, Dia yang da campur tu tana deng Dia pe luda sampe jadi pece, kong Dia se goso tu pece pa kita pe mata. Abis itu, Dia suru pa kita pigi ka kolam Siloam for cuci tu kita pe muka. Kong kita pigi, trus pe abis bacuci, kita so bole balia.”

¹²Kong dorang batanya pa dia, “Di mana dang Dia skarang?” Tu orang itu manyao, “Kita nintau lei.”

¹³Kong dorang bawa tu orang yang seblumnya da buta itu pa orang-orang dari golongan Farisi, tu golongan yang pegang kras tu atoran agama Yahudi.

¹⁴Waktu Yesus da campur tu luda deng tana sampe jadi pece kong se bae tu orang buta itu, itu pas hari Sabat, tu hari orang Yahudi nimbole bakarja.

¹⁵So itu, tu orang-orang dari golongan Farisi batanya ulang pa tu orang yang seblumnya da buta itu bagimana sampe dia pe mata bole balia. Trus dia manyao, “Ada tu Orang yang da goso pece pa kita pe mata. Abis itu, kita cuci tu kita pe muka, kong kita so bole balia.”

¹⁶Kong tu orang-orang dari golongan Farisi itu babilang, “Tu Orang yang da beking itu, Dia itu nyanda datang dari pa Tuhan Allah lantaran Dia nyanda iko tu atoran hari Sabat.” Mar tu orang-orang laeng babilang, “Kalu Dia orang berdosa, nyanda mungkin dia dapa beking tu mujisat rupa itu.” Kong dorang deng dorang mulai baku ambe.

¹⁷Kong tu orang-orang dari golongan Farisi itu batanya lei pa tu orang yang seblumnya da buta itu, “Kalu menurut ngana dang, sapa Dia itu? Soalnya Dia itu to so se bae ngana pe mata.” Dia manyao pa dorang, “Dia itu nabi, tu orang yang ja kase tau Tuhan Allah pe pesan pa orang-orang.”

¹⁸Mar tu pemimpin-pemimpin agama Yahudi itu nimau mo percaya kalu tu orang itu perna buta kong skarang so bole balia. So itu, dorang pangge dia pe orang tua.

¹⁹Kong dorang batanya pa de pe orang tua, “Dia ini ngoni pe anak to? Ngoni bilang kalu dia so buta dari lahir, no kiapa dang skarang dia so bole balia?”

²⁰Kong dorang manyao, “Butul, Dia ini memang torang pe anak, kong dia so buta dari lei dia lahir.

²¹Mar tentang bagimana sampe dia skarang ini bole balia, torang nintau itu, deng sapa yang da beking sampe dia bole balia, itu lei torang nintau. Tanya jo sandiri pa dia, dia itu so dewasa, dia bole mo bajawab sandiri.”

²²Dia pe orang tua babilang bagitu lantaran dorang tako pa tu pemimpin-pemimpin agama Yahudi. Soalnya tu pemimpin-pemimpin agama Yahudi itu so spakat kalu ada orang yang mangaku Yesus itu Mesias tu Raja yang mo se slamat pa manusia, tu orang itu mo dapa larang maso ka ruma ibada agama Yahudi.

²³So itu, dia pe orang tua manyao, “Dia itu to so dewasa, tanya sandiri jo pa dia.”

²⁴Pe dengar itu, dorang pangge for kadua kali tu orang yang seblumnya buta itu kong bilang pa dia, “Ngana musti basumpa demi Tuhan Allah kalu ngana mo bilang tu butul. Torang tau kalu tu Yesus itu Orang berdosa.”

²⁵Tu orang yang seblumnya da buta itu manyao, “Tu Orang itu berdosa ato nyanda, kita nintau. Mar yang kita tau cuma satu, kalu yang lalu kita ini buta mar skarang kita so bole balia.”

²⁶Dorang batanya pa dia, “Apa tu Dia da beking pa ngana sampe ngana pe mata so bole balia?”

²⁷Tu orang yang seblumnya da buta itu manyao pa dorang, “Kita to so bilang dari tadi pa ngoni, mar ngoni nimau mo dengar. Kong kiapa ngoni mo dengar ulang itu dang? Ngoni stou suka mo jadi Dia pe murit lei kang?”

²⁸Kong dorang hina pa dia bagini, “Ngana itu, tu Orang itu pe murit, mar torang ini nabi Musa pe murit-murit.

²⁹Torang tau kalu Tuhan Allah so babicara pa nabi Musa, mar tentang Yesus itu torang nintau Dia itu da datang dari mana.”

³⁰Tu orang itu manyao pa dorang, “Pe aneh lei kalu ngoni nintau dari mana Dia datang, padahal Dia so se bae tu kita pe mata sampe kita so bole balia.

³¹Torang tau kalu Tuhan Allah nyanda dengar tu orang-orang berdosa, mar Dia dengar sapa jo yang tako deng hormat pa Dia, deng lei yang hidop beking tu Dia pe mau.

³²Dari pertama Tuhan Allah da ciptakan ni dunia sampe skarang, blum perna dapa dengar kalu ada orang yang se bae tu orang yang buta dari lahir sama deng kita ini.

³³Kalu tu Orang yang se bae pa kita itu nyanda datang dari pa Tuhan Allah, Dia itu pasti nimbole beking apa-apa rupa tu Dia da beking pa kita.”

³⁴Kong dorang manyao pa dia, “Ngana ini punung deng dosa dari lei ngana lahir. Masa komang ngana tu mo se ajar pa torang!” Kong dari waktu itu, dorang nyanda kase pa dia maso ka ruma ibada agama Yahudi.

³⁵Yesus dapa dengar kalu tu orang yang seblumnya da buta itu so dapa larang maso ka ruma ibada agama Yahudi. Kong Yesus pi baku dapa deng tu orang itu trus babilang pa dia, “Ngana percaya pa Anak Manusia?”

³⁶Dia bale batanya, “Bapak, sapa so Dia? Kase tau dang pa kita supaya kita bole percaya pa Dia.”

³⁷Yesus bilang pa tu orang itu, “Ngana so lia pa Dia, Dia itu no tu Orang yang skarang ini da babicara pa ngana.”

³⁸Tu orang itu bilang pa Yesus, “Tuhan, kita percaya.” Trus dia berlutut kong semba pa Yesus.

³⁹Kong Yesus bilang, “Kita datang ka dunia for mo bahakimi, supaya sapa jo yang buta bole mo balia, kong supaya sapa jo yang anggap dia pe diri bole balia, dia itu mo jadi buta.”

⁴⁰Di situ, ada bebrapa orang Yahudi dari golongan Farisi. Dorang da dengar tu Yesus pe kata-kata kong dorang babilang pa Dia, “Jadi menurut Bapak, torang ini lei buta dang?”

⁴¹Yesus manyao pa dorang, “Kalu ngoni buta, itu sama deng ngoni nintau apa itu dosa, jadi waktu ngoni beking dosa ngoni nyanda berdosa. Mar lantaran ngoni anggap ngoni pe diri bole balia, itu sama deng ngoni tau tu dosa mar tetap beking, jadi ngoni masi berdosa.”