Read Malay, Manado Kisah Para Rasul 1 Bible Online

Kisah Para Rasul 1 - Malay, Manado bible

Kisah Para Rasul 1

¹Bapak Teofilus yang bae! Bapak Teofilus, pa kita pe buku yang pertama[1], kita da tulis tentang samua tu Yesus da beking deng da se ajar,

²sampe waktu Dia taangka ka sorga. Seblum Yesus taangka, Roh Kudus da tolong pa Yesus for kase tau pa rasul-rasul tu Dia da pili, apa tu dorang musti beking.

³Yesus da mendrita sampe mati deng da hidop ulang, abis itu Dia batunjung Dia pe Diri pa rasul-rasul supaya dorang bole tau kalu Dia so butul-butul hidop. Dia batunjung Dia pe diri ulang-ulang pa dorang slama ampa pulu hari, kong Dia babicara deng dorang tentang Tuhan Allah Berkuasa sbagai Raja.

⁴Satu kali, Yesus da bamakang sama-sama deng dorang. Waktu itu, Dia suru pa dorang bagini, “Ngoni jang kase tinggal ni Yerusalem. Ngoni tinggal jo di sini for tunggu Bapa mo kase tu Dia da janji pa ngoni, sama deng tu ngoni perna da dengar dari pa Kita.

⁵Dulu Yohanes Pembaptis ja babaptis deng aer, mar so nyanda lama lei ngoni mo dapa baptis deng Roh Kudus.”

⁶Satu kali Yesus deng De pe rasul-rasul bakumpul, kong dorang batanya pa Dia, “Tuhan, apa skarang ini Tuhan mo beking bangsa Israel jadi krajaan sama deng dulu?”

⁷Yesus manyao pa dorang, “Ngoni nyanda perlu tau tu waktu deng tempo apa itu mo jadi, cuma Bapa yang tau. Dia sandiri yang ada hak mo ator tu waktu itu.

⁸Mar nanti Roh Kudus mo turung pa ngoni kong ngoni mo dapa kuasa, trus ngoni mo jadi saksi for se tau tentang Kita pa orang-orang di Yerusalem, di sluru daera Yudea deng daera Samaria, deng lei ka ujung bumi.”

⁹Abis bilang bagitu, Yesus taangka ka sorga di muka-muka pa dorang, kong ada awan da tutu pa Dia sampe dorang so nyanda dapa lia lei pa Dia.

¹⁰Waktu dorang masi bahaga ka langit, kage-kage badiri dua orang da pake baju puti di dekat pa dorang.

¹¹Kong tu dua orang itu babilang pa dorang, “Hei orang-orang Galilea, kiapa lei ngoni masi da haga-haga ka langit? Yesus so taangka ka sorga, kong Dia lei mo datang ulang deng cara yang sama waktu ngoni da lia Dia da taangka ka sorga.”

¹²Abis itu, tu rasul-rasul turung dari bukit Zaitun kong babale ka Yerusalem. Tu bukit itu de pe jao kira-kira satu kilometer dari Yerusalem.

¹³Waktu dorang sampe di Yerusalem, dorang pigi ka tampa tu dong da manumpang akang kong nae ka ruang atas. Dorang samua itu: Petrus, Yohanes, Yakobus, Andreas, Filipus, Tomas, Bartolomeus, Matius, Yakobus tu Alfeus pe anak, Simon dari Gerakan Yahudi Merdeka deng Yudas tu Yakobus pe anak.

¹⁴Dorang samua ja bakumpul deng satu hati for basombayang. Dorang basombayang sama-sama deng bebrapa parampuang, Yesus pe sudara-sudara, deng lei Maria tu Yesus pe mama.

¹⁵Satu kali tu sudara-sudara yang percaya pa Yesus bakumpul sama-sama. Dorang pe jumla kira-kira ada sratus dua pulu orang. Kong Petrus badiri di tenga-tenga pa dorang trus babilang,

¹⁶“Sudara-sudara, samua yang da tulis dulu di Kitab Suci tentang Yudas, memang musti jadi. Dulu, Roh Kudus da pake pa raja Daud for bilang tentang Yudas. Yudas itu yang da bawa tu orang-orang for mo tangka pa Yesus.

¹⁷Padahal dulu Yudas itu sala satu dari torang, dia lei ja beking de pe bagian playanan sama-sama deng torang.”

¹⁸So Yudas itu yang da trima tu doi waktu dia da bahianat pa Yesus, kong tu doi itu dia da pake for bli akang tana. Di tana itu, dia jatung taplaka kong de pe puru tabla sampe samua tu de pe isi puru takaluar.

¹⁹Samua orang di Yerusalem dapa tau apa tu da jadi pa Yudas, sampe tu tana itu dorang se nama pake tu dorang pe bahasa sandiri, Akeldama, tu de pe arti Tana Dara.

²⁰Kong Petrus babilang lei, “Dulu raja Daud so tulis tentang tu Yudas. Dia da tulis bagini di kitab Mazmur, ‘Biar jo de pe tampa tinggal jadi sunyi, nyanda ada orang yang mo tinggal di situ.’ Raja Daud lei tulis bagini, ‘Biar jo orang laeng ambe tu de pe tugas.’

²¹Jadi torang musti pili satu orang for mo ganti pa Yudas. Tu orang itu musti dari orang-orang yang ja iko deng torang, waktu Tuhan Yesus masi da sama-sama deng torang,

²²mulai dari waktu Yohanes da baptis pa Yesus sampe waktu Yesus da taangka ka sorga se tinggal pa torang. Tu orang itu mo basaksi sama-sama deng torang kalu Yesus so hidop ulang.”

²³Pe klar Petrus babicara, tu orang-orang yang da bakumpul di situ kase usul dua orang. Tu satu pe nama Yusuf, orang ja pangge pa dia Barsabas, deng ada lei tu ja pangge pa dia Yustus. Kong tu satu lei, de pe nama Matias.

²⁴Abis itu dorang samua basombayang. Dorang bilang, “Tuhan, Tuhan tau butul samua orang pe hati. Tolong kase tunjung akang pa torang sapa yang Tuhan mo pili dari tu dua orang ini.

²⁵Nanti tu orang itu yang mo ganti pa Yudas di playanan ini, dia mo jadi rasul tu Yesus pe utusan, tu jabatan yang Yudas so se tinggal. Soalnya Yudas so mati kong pigi ka tampa yang cocok for dia.”

²⁶Klar basombayang, dorang cabu lot for tu dua orang, kong Matias yang da dapa. Jadi dorang angka pa Matias jadi rasul for sama-sama deng tu seblas rasul itu.