Read Malay, Manado Kisah Para Rasul 10 Bible Online

Kisah Para Rasul 10 - Malay, Manado bible

Kisah Para Rasul 10

¹Di Kaisarea ada tu satu laki-laki, de pe nama Kornelius. Dia itu perwira Romawi yang bapimpin satu klompo tentara, tu klompo itu pe nama Tentara Italia.

²Dia rajin iko Tuhan Allah pe mau. Dia deng de pe kluarga ja basemba pa Tuhan Allah. Dia ja bantu orang-orang Yahudi yang susa, deng dia lei rajin basombayang pa Tuhan Allah.

³Satu kali, kira-kira jam tiga sore waktu jam sombayang agama Yahudi[5], Kornelius dapa penglihatan. Waktu itu, dia dapa lia deng jelas Tuhan Allah pe malaekat datang kong bapangge pa dia, “Kornelius!”

⁴Kornelius bahaga pa tu malaekat itu kong dia jadi tako skali, trus dia babilang, “Ada apa, Tuhan?” Tu malaekat itu manyao pa dia, “Tuhan Allah so dengar samua tu bapak pe sombayang, deng Dia so lia tu ngana ja kase pa orang-orang susa. Tuhan Allah da inga tu bapak ja beking itu.

⁵Skarang, suru jo bebrapa orang pigi ka Yope for pi ambe pa satu orang tu de pe nama Simon, yang orang ja pangge lei Petrus.

⁶Dia da manumpang pa satu orang pe ruma di pinggir pante. Tu orang itu pe nama lei Simon. Dia ini pe karja ja beking bersi kuli binatang.”

⁷Waktu tu malaekat so abis bicara deng Kornelius, tu malaekat se tinggal pa dia. Abis itu, Kornelius pangge tu de pe dua orang karja deng lei satu tentara yang ja kawal pa dia. Tu tentara itu lei ja iko Tuhan Allah pe mau.

⁸Kong Kornelius se tau tu de pe penglihatan pa dorang, trus dia suru pa dorang pigi ka Yope for mo ambe pa Petrus.

⁹De pe eso, tu tiga orang itu so dekat deng Yope. Waktu itu kira-kira tenga hari, jadi Petrus nae ka atas ruma[6] for mo basombayang.

¹⁰Di situ Petrus rasa lapar, mar tu makanan masi samantara ja ator. Kage-kage dia dapa penglihatan.

¹¹Dia dapa lia langit tabuka kong turung dari langit ka bumi sesuatu yang sama deng kaeng basar yang da tagantong pa de pe ampa ujung.

¹²Kong di dalam tu kaeng itu ada rupa-rupa binatang: ada binatang kaki ampa, binatang ja maraya deng burung.

¹³Trus dia dapa dengar suara da babilang pa dia, “Petrus, badiri jo. Ambe tu binatang-binatang kong potong, abis itu makang jo.”

¹⁴Mar Petrus cuma da manyao, “Nyanda Tuhan. Kita nyanda perna makang binatang-binatang yang haram deng najis kalu iko torang pe atoran agama.”

¹⁵Mar tu suara babilang kadua kali, “Apa yang Tuhan Allah so beking jadi halal, jang ngana bilang itu haram.”

¹⁶Itu samua da jadi sampe tiga kali, kong abis itu tu kaeng iko taangka ulang ka langit.

¹⁷Abis itu, Petrus jadi bingo kong da bapikir-pikir tentang tu penglihatan itu pe arti. Pas waktu itu, tu orang-orang yang Kornelius da suru so sampe di ruma tu Petrus da manumpang akang, kong dorang da badiri di muka pintu.

¹⁸Trus dorang pangge orang yang ada di situ kong dorang da batanya kalu Simon tu ja bilang lei Petrus da manumpang di ruma itu ato nyanda.

¹⁹Waktu itu, Petrus masi bapikir-pikir tentang tu penglihatan itu pe arti. Kong tu Tuhan pe Roh bilang pa dia, “Petrus, ada tiga orang da cari pa ngana.

²⁰So itu badiri jo kong turung ka bawa, trus pigi jo sama-sama deng dorang. Ngana nyanda usa ragu-ragu lantaran Kita yang da suru pa dorang kamari.”

²¹Pe dengar itu, Petrus turung ka bawa. Waktu dia baku dapa deng tu tiga orang itu, dia bilang pa dorang, “Kita ini yang ngoni da cari. Kiapa dang ngoni datang kamari?”

²²Kong dorang manyao, “Bagini bapak, torang pe perwira Romawi da suru pa torang for datang kamari. Dia pe nama Kornelius. Dia rajin iko Tuhan Allah pe mau deng ja basemba pa Tuhan Allah. Kong samua orang dari bangsa Yahudi bilang kalu dia itu orang bae-bae. Satu kali, Tuhan Allah pe malaekat da suru pa dia for mo undang pa bapak pigi pa de pe ruma, supaya dia bole mo dengar apa tu bapak mo bilang pa dia.”

²³Pe dengar itu, Petrus undang pa dorang supaya manginap di situ. De pe eso, Petrus basadia kong pigi sama-sama deng tu tiga orang itu. Ada lei bebrapa sudara yang percaya dari Yope yang iko pa dia.

²⁴De pe hari brikut baru dorang sampe di Kaisarea. Di situ Kornelius da tunggu-tunggu pa dorang. Dia lei da suru bakumpul dia pe kluarga deng dia pe tamang-tamang bae for mo dengar apa tu Petrus mo bilang.

²⁵Waktu Petrus mo maso ka ruma, Kornelius dola pa dia kong berlutut di muka pa Petrus for mo semba pa dia.

²⁶Mar Petrus se badiri pa Kornelius kong bilang, “Bapak badiri jo, kita ini cuma manusia.”

²⁷Kong samantara dorang dua babacirita, dorang maso ka dalam ruma. Di situ Petrus lia banya orang so bakumpul.

²⁸Kong Petrus bilang, “Sudara-sudara! Ngoni sandiri so tau torang orang Yahudi pe adat. No kalu mo iko tu torang pe adat itu, torang nimbole bergaul deng orang-orang bukang Yahudi sama deng ngoni ini, torang lei nimbole pigi pa ngoni yang bukang Yahudi pe ruma lantaran samua itu najis ato haram for torang. Mar Tuhan Allah so kase tau pa kita, kalu nyanda ada orang yang najis di muka pa Tuhan Allah.

²⁹So itu, waktu ngoni undang pa kita for datang kamari, kita nyanda tolak. No skarang, kita mo tanya pa ngoni, kiapa dang sampe ngoni pangge pa kita datang kamari?”

³⁰Kong Kornelius manyao, “Ampa hari lalu, waktu jam tiga sore kira-kira sama deng skarang ini, kita da basombayang pa kita pe ruma. Kage-kage ada satu orang pake baju mangkilat badiri di muka pa kita.

³¹Trus dia bilang bagini, ‘Kornelius, Tuhan Allah so dengar samua tu ngana pe sombayang, deng Dia da tarukira tu ngana ja kase pa orang-orang susa.

³²Jadi, ngana suru jo orang pigi ka Yope for mo pi ambe pa Simon tu ja pangge lei Petrus. Dia da manumpang pa Simon pe ruma di pinggir pante, tu Simon itu pe karja ja beking bersi kuli binatang.’

³³So itu kita iko suru orang pi ambe pa bapak, kong pe bae skali sampe bapak bole datang kamari. Skarang, torang samua so ada di sini di muka pa Tuhan Allah for mo dengar apa yang Dia so kase tau pa bapak.”

³⁴Petrus mulai babicara pa dorang, “Sudara-sudara! Skarang kita baru butul-butul tau kalu Tuhan Allah nyanda ja pili-pili orang.

³⁵Tuhan Allah trima samua orang dari tiap suku bangsa yang hormat pa Dia deng lei yang ja beking tu butul di muka pa Dia.

³⁶Ngoni pasti so tau apa tu Tuhan Allah da kase tau skarang ini pa orang-orang Israel. Dia kase tau pa dorang tu Kabar Bae tentang Yesus Kristus tu Raja yang se slamat pa manusia. Yesus Kristus ini yang bole beking dorang pe hubungan deng Tuhan Allah jadi bae. Dia itu yang jadi Tuhan for samua orang.

³⁷Ngoni lei so tau samua yang baru-baru ini da jadi di sluru daera Yudea. Itu mulai waktu Yohanes da kase tau pa orang-orang kalu dorang musti dapa baptis for jadi tanda kalu dorang so bertobat.

³⁸Tuhan Allah da kase Dia pe Roh Kudus deng De pe kuasa pa Yesus tu orang Nazaret. Abis itu, Yesus bajalang bakliling kong beking tu bae pa orang-orang deng lei Dia kase bae orang yang setang pe bos da kuasai lantaran Tuhan Allah da sama-sama deng Dia.

³⁹Torang tu rasul-rasul yang jadi saksi samua tu Yesus da beking di Yerusalem deng di samua daera tu torang orang Yahudi da tinggal akang. Tu orang-orang Yahudi di Yerusalem bunung pa Dia deng cara se paku pa Dia di kayu salib.

⁴⁰Mar de pe katiga hari, Tuhan Allah kase hidop ulang pa Dia deng beking Dia supaya bole batunjung De pe diri.

⁴¹Mar nyanda samua orang Yahudi yang bole dapa lia pa Dia, cuma torang tu saksi-saksi yang Tuhan Allah so pili lebe dulu yang bole lia pa Dia. Torang ini no tu saksi-saksi itu. Torang yang so makang deng minum sama-sama deng Dia waktu Dia so hidop ulang dari kematian.

⁴²Trus Dia suru pa torang kase tau tu Kabar Bae pa orang-orang. Kong torang lei musti basaksi kalu Yesus itu tu Orang yang Tuhan Allah so pili for mo adili pa samua orang yang masi hidop deng orang yang so mati.

⁴³Dulu, samua nabi so perna basaksi tentang Dia yang mo datang, dorang bilang kalu orang percaya pa Dia, tu orang itu pe dosa-dosa mo dapa ampung lewat Dia pe nama itu.”

⁴⁴Waktu Petrus masi babicara, tu Roh Kudus turung pa samua orang yang da badengar tu Petrus da bilang itu.

⁴⁵Di situ ada lei tu orang-orang Yahudi yang percaya pa Yesus tu da iko deng Petrus dari Yope. Dorang itu jadi heran skali lantaran dorang blum perna lia Tuhan Allah kase cura tu karunia Roh Kudus pa tu orang-orang bukang Yahudi.

⁴⁶Soalnya dorang da dengar tu orang-orang bukang Yahudi itu babicara pake bahasa-bahasa laeng yang Roh Kudus da kase, dorang itu da puji-puji pa Tuhan Allah. Kong Petrus bilang,

⁴⁷“Ngoni so lia sandiri! Dorang so trima Roh Kudus sama deng tu torang da trima. Jadi skarang, nyanda ada orang yang bole mo larang pa dorang mo dapa baptis deng aer.”

⁴⁸Abis itu, Petrus suru baptis pa dorang dalam nama Yesus Kristus. Klar itu dorang minta pa Petrus tinggal bebrapa hari sama-sama deng dorang.