Read Malay, Manado Kisah Para Rasul 12 Bible Online

Kisah Para Rasul 12 - Malay, Manado bible

Kisah Para Rasul 12

¹Waktu itu, raja Herodes mulai ja siksa bebrapa orang percaya di Yerusalem.

²Dia prenta pa de pe orang supaya bunung pake peda pa Yakobus, tu Yohanes pe sudara.

³Waktu Herodes tau kalu tu dia da beking itu beking snang tu orang-orang Yahudi, dia suru lei tangka pa Petrus. Waktu itu pas hari raya Roti Nyanda Baragi.

⁴Serta Petrus so dapa tangka, Herodes suru kase maso ka bui tu Petrus. Kong Herodes suru ampa regu tentara baku ganti bajaga pa Petrus. Tiap regu ada ampa orang tentara. Herodes pe rencana kase maso Petrus ka bui supaya kalu so klar tu hari raya agama Yahudi tu prayaan Paskah, dia mo adili pa Petrus di muka pa orang banya.

⁵Bagitu no tu Petrus da dapa tahang di bui, mar tu jemaat nyanda brenti-brenti basombayang pa Tuhan Allah for dia.

⁶Di dalam bui, Petrus da tidor di tenga-tenga dua tentara, de pe tangan da ika pake rante sama-sama deng dorang. Ada tentara lei yang bajaga di muka pintu bui. Kong satu malam, seblum Herodes mo adili pa Petrus di muka banya orang,

⁷kage-kage Tuhan pe malaekat badiri di dekat pa Petrus. Trus tu di dalam bui itu jadi trang skali. Tu malaekat itu kore pa Petrus for mo se bangong pa dia kong babilang, “Petrus, capat jo bangong!” Abis bilang bagitu, tu rante yang da ika pa Petrus pe tangan iko talapas.

⁸Trus tu malaekat bilang lei pa dia, “Pake jo tu ngana pe baju deng capatu.” Kong Petrus beking tu malaekat da bilang. Abis itu, tu malaekat bilang lei pa dia, “Pake tu ngana pe juba kong iko pa kita.”

⁹Petrus iko pa tu malaekat for kaluar dari bui. Waktu itu, Petrus pe kira itu cuma penglihatan, mar dia nintau kote kalu tu malaekat butul-butul da bawa pa dia kaluar dari bui.

¹⁰Dorang bajalang lewat di pos jaga pertama, trus lewat di pos jaga kadua kong dorang sampe di pintu gerbang yang da beking dari besi. Tu pintu gerbang itu tampa lewat kalu mo maso ato kaluar kota. Tu pintu tabuka sandiri for dorang, kong dorang bajalang kaluar dari situ sampe ka ujung jalang, trus kage-kage tu malaekat se tinggal pa dia.

¹¹Abis itu Petrus sadar deng apa tu da jadi, kong dia bilang, “Skarang kita tau butul kalu Tuhan Allah so utus De pe malaekat for se slamat pa kita dari tu Herodes, deng dia lei so se slamat pa kita dari tu orang-orang Yahudi pe rencana jaha.”

¹²Abis dia bapikir-pikir sadiki, dia pigi pa Maria pe ruma. Maria itu Yohanes pe mama, tu Yohanes itu orang ja pangge lei Markus. Pa Maria pe ruma, banya orang yang percaya da bakumpul kong da basombayang.

¹³Pe sampe di situ, Petrus toki tu pintu gerbang. Kong ada satu pembantu parampuang, tu de pe nama Rode. Dia pigi di pintu gerbang for mo lia sapa tu da batoki.

¹⁴Kong waktu tu pembantu dengar Petrus babicara, dia dapa kanal tu Petrus pe suara. Mar lantaran de pe snang jo, dia nyanda buka tu pintu gerbang. Dia tare cuma da pi maso ulang ka dalam ruma kong kase tau pa orang-orang kalu Petrus ada di muka pintu gerbang.

¹⁵Mar dorang cuma da manyao, “Gila stou ngana!” Mar tu pembantu itu tetap bakras bilang kalu Petrus butul-butul ada. Dorang bilang lei, “Itu stou tu malaekat yang da jaga pa dia.”

¹⁶Samantara itu Petrus masi batoki trus. Kong waktu dorang buka tu pintu deng lia pa Petrus, dorang iko taheran-heran.

¹⁷Mar Petrus basein deng de pe tangan supaya dorang jadi tenang. Abis itu Petrus se cirita pa dorang bagimana Tuhan da bantu pa dia kaluar dari bui. Kong Petrus bilang lei pa dorang, “Ngoni kase tau samua ini pa Yakobus deng torang pe sudara-sudara laeng yang percaya pa Yesus.” Abis bilang bagitu, Petrus kaluar dari situ kong pigi ka tampa laeng.

¹⁸De pe eso pagi, waktu tu tentara-tentara lia Petrus so nyanda ada di bui, dorang jadi kacau. Dorang da cari-cari tau bagimana Petrus bole lapas dari bui.

¹⁹So itu Herodes suru de pe orang-orang pi cari pa Petrus, mar dorang nyanda dapa pa dia. Trus Herodes suru priksa tu tentara-tentara yang bajaga pa Petrus kong bunung pa dorang. Abis itu, Herodes pigi dari Yudea ka Kaisarea kong tinggal di situ.

²⁰Orang Tirus deng orang Sidon ja babli makanan dari orang-orang di wilaya yang raja Herodes da kuasai. Mar waktu itu, Herodes mara pa orang-orang Tirus deng Sidon. So itu, orang-orang dari Tirus deng Sidon itu spakat for datang mangada pa dia. Dorang buju pa tu satu orang yang ja urus Herodes pe istana for tolong pa dorang. Tu orang itu de pe nama Blastus. Dorang minta tolong pa Blastus supaya bole baku bae deng Herodes, lantaran dorang pe negri ja babli makanan dari raja Herodes pe wilaya.

²¹Kong Herodes tentukan satu hari for mo trima pa dorang. Di hari itu, dia da pake de pe baju krajaan kong dudu di kadera raja. Abis itu dia mulai bapidato pa dorang.

²²Kong tu orang banya puji pa dia deng suara kuat, “Ini tuhan pe suara bukang manusia pe suara!”

²³Waktu itu Herodes kase biar dorang puji deng hormat pa dia, dia nyanda bilang kalu dorang musti puji deng hormat pa Tuhan Allah. Jadi waktu itu jo Tuhan pe malaekat hukum pa dia, kong cacing-cacing makang pa dia sampe mati.

²⁴Samantara itu, orang-orang lebe se cirita tu Tuhan Allah pe firman kong lebe banya orang lei yang jadi percaya.

²⁵Serta Barnabas deng Saulus so klar kase tu sumbangan di Yerusalem, dorang babale ulang ka Antiokhia. Ada satu orang yang da iko sama-sama deng dorang dari Yerusalem, tu orang itu pe nama Yohanes, tu ja bilang lei Markus.