Read Malay, Manado Kisah Para Rasul 13 Bible Online

Kisah Para Rasul 13 - Malay, Manado bible

Kisah Para Rasul 13

¹Di jemaat yang ada di Antiokhia, ada bebrapa nabi yang Tuhan Allah ja pake for kase tau Dia pe pesan pa orang-orang, deng ada lei orang-orang yang ja mangajar pa jemaat. Dorang itu: Barnabas, Simeon (tu ja pangge lei Itang), Lukius (tu orang Kirene), Menahem (tu dari kacili da piara sama-sama deng Herodes), deng lei Saulus.

²Satu kali, waktu dorang da baibada pa Tuhan deng bapuasa, Roh Kudus babilang, “Tunjung jo pa Barnabas deng Saulus for mo beking tu tugas yang Kita so sadia for dorang dua.”

³Pe klar bapuasa deng basombayang, dorang taru dong pe tangan pa Barnabas deng Saulus kong utus pa dorang dua for beking tu Tuhan da suru.

⁴Abis itu, Barnabas deng Saulus pigi for mo beking tu tugas yang Roh Kudus da suru pa dorang. Dorang pigi ka Seleukia, kong dari situ dorang blayar ka pulau Siprus.

⁵Pe sampe di Salamis di pulau Siprus, dorang dua kase tau tu Tuhan Allah pe firman di ruma-ruma ibada agama Yahudi. Waktu itu Yohanes tu ja pangge lei Markus da iko deng dorang for babantu.

⁶Abis itu, dorang pigi ka samua tampa di pulau itu sampe di Pafos. Di situ dorang baku dapa deng satu orang Yahudi, tu de pe nama Baryesus. Dia itu tukang sihir deng nabi palsu.

⁷Dia batamang deng gubernur di pulau itu, tu de pe nama Sergius Paulus. Tu gubernur itu pande skali. Dia pangge pa Barnabas deng Saulus lantaran dia suka mo dengar tu Tuhan Allah pe firman.

⁸Baryesus pe nama dalam bahasa Yunani Elimas, tu de pe arti tukang sihir. Dia da malawang pa Barnabas deng Saulus, kong dia brusaha supaya tu gubernur itu nyanda mo percaya pa Yesus.

⁹Mar Roh Kudus da kuasai pa Saulus tu ja pangge lei Paulus. Trus dia haga pa Baryesus

¹⁰kong babilang, “Hei setang pe bos pe anak! Ngana memang jaha deng tukang batipu orang. Ngana ja malawang samua tu butul. Ngana nyanda perna brenti ja se putar tu cara for trima pa Tuhan.

¹¹Skarang, Tuhan hukum pa ngana jadi buta. Kong bebrapa hari ngana nyanda mo lia tu cahaya matahari.” Waktu itu jo, Baryesus jadi buta, sama deng ada awan da tutu pa dia sampe jadi glap. Dia babaraba cari orang yang mo pegang de pe tangan for tolong pa dia.

¹²Waktu tu gubernur lia apa tu da jadi, dia jadi percaya pa Yesus. Dia taheran-heran deng tu ajaran tentang Tuhan.

¹³Dari Pafos di pulau Siprus, Paulus deng dia pe tamang-tamang blayar ka Perga di daera Pamfilia. Mar Yohanes kase tinggal pa dorang di situ kong dia pulang ka Yerusalem.

¹⁴Kong dari Perga, Paulus deng de pe tamang-tamang bajalang trus sampe ka Antiokhia di daera Pisidia. Waktu hari Sabat, dorang maso kong dudu di ruma ibada agama Yahudi.

¹⁵Di situ, ada orang babaca atoran-atoran di kitab Taurat deng lei kitab nabi-nabi. Pe klar babaca, tu pemimpin-pemimpin ruma ibada itu suru orang bilang pa Paulus deng Barnabas, “Bapak-bapak, kalu ada tu ngoni mo bilang for se smangat pa torang iko pa Tuhan, bilang jo skarang!”

¹⁶So itu, Paulus badiri kong basein deng de pe tangan pa tu orang-orang di situ supaya badiam. Trus dia babilang pa dorang, “Sudara-sudara orang Israel deng orang-orang bukang Yahudi yang ja basemba pa Tuhan Allah, co dengar akang pa kita!

¹⁷Tuhan Allah so pili tu torang orang Israel pe nene moyang dari dulu. Waktu dorang ada di tana Mesir tu bukang dorang pe negri, Tuhan Allah beking dorang pe bangsa jadi banya skali orang. Abis itu, Tuhan Allah deng De pe kuasa bawa pa dorang kaluar dari tu tana Mesir itu.

¹⁸Abis itu, dorang hidop di padang gurun de pe lama ampa pulu taong. Di situ dorang pe kalakuan nyanda ja iko Tuhan Allah pe mau, mar Tuhan Allah tetap basabar pa dorang.

¹⁹Tuhan Allah da tolong pa dorang for kase abis tuju suku bangsa yang ada di tana Kanaan. Abis itu, Dia se berbage tu tana itu pa torang pe nene moyang for jadi dorang punya.

²⁰Tu Tuhan Allah da beking samua itu, de pe lama ampa ratus lima pulu taong. Abis itu, Tuhan Allah pili orang-orang yang ja adili torang pe nene moyang pe perkara. Dorang itu yang ja pimpin pa torang pe nene moyang sampe Tuhan Allah pili pa nabi Samuel.

²¹Waktu itu, tu torang pe nene moyang minta pa Tuhan Allah satu orang for jadi dorang pe raja. So itu Tuhan Allah kase pa dorang satu orang raja, tu de pe nama Saul. Dia itu Kish pe anak, dari suku Benyamin. Saul jadi raja de pe lama ampa pulu taong.

²²Abis itu, Tuhan Allah kase brenti pa Saul jadi raja, trus Dia pili pa Daud jadi raja for mo ganti pa Saul. Kong tentang Daud ini, Tuhan Allah perna da kase tau bagini, ‘Kita so tarukira pa Daud tu Isai pe anak. Dia ja beking Kita pe hati snang, deng ja beking samua tu Kita pe mau.’

²³Dari Daud pe keturunan ini, Tuhan Allah tunjung satu Orang for se slamat pa orang Israel, so Dia itu no tu Yesus.

²⁴Mar seblum Dia datang, ada satu orang tu de pe nama Yohanes. Yohanes yang da kase tau pa samua orang Israel kalu dorang musti bertobat kong dapa baptis.

²⁵Waktu Yohanes pe tugas so mo klar, dia bilang pa orang-orang, ‘Ngoni pikir kita ini sapa? Kita ini bukang Orang yang mo se slamat pa torang orang Israel. Mar, ngoni tarukira jo bae-bae. Abis kita, ada satu Orang yang mo datang. Hele mo bantu for buka Dia pe tali capatu sama deng tu biasa orang karja ja beking, kita nyanda pantas.’

²⁶Sudara-sudara, torang yang ada di sini, ada tu Abraham pe keturunan deng ada lei tu orang yang bukang Yahudi mar ja basemba pa Tuhan Allah. Pa torang samua ini Tuhan Allah so kase tau kalu Dia mo se slamat pa torang dari tong pe dosa-dosa.

²⁷Tempo hari waktu Yesus datang, orang Israel yang da tinggal di Yerusalem deng dorang pe pemimpin-pemimpin nyanda kanal pa Dia. Dorang nyanda mangarti lei yang Tuhan Allah da kase tau pa tu nabi-nabi dulu tentang tu Kristus yang mo datang. Padahal yang Tuhan Allah da kase tau pa tu nabi-nabi itu ja se baca tiap hari Sabat. Jadi waktu dorang hukum mati pa Dia, dorang so se gnap yang Tuhan Allah da bilang dari dulu pa tu nabi-nabi kalu orang mo bunung pa Kristus.

²⁸Padahal waktu itu torang pe pemimpin-pemimpin nyanda dapa alasan for mo kase hukuman mati pa Dia. Mar biar lei bagitu, dorang tetap minta pa Pilatus supaya kase hukuman mati pa Dia.

²⁹Dulu tu nabi-nabi da bilang samua tu mo jadi pa Dia. Kong waktu dorang so beking samua tu nabi-nabi da bilang itu, dorang se turung pa Dia dari kayu salib kong se kubur.

³⁰Mar Tuhan Allah kase hidop ulang pa Dia.

³¹Kong slama bebrapa waktu, Yesus batunjung De pe diri pa orang-orang yang perna iko pa Dia dari Galilea ka Yerusalem. So dorang itu yang jadi saksi for orang Israel.

³²Kong skarang ini torang dua mo se tau tu Kabar Bae tentang Yesus, yang Tuhan Allah da janji dari dulu pa torang pe nene moyang.

³³Tu janji itu Dia so se gnap pa torang ini deng cara so se hidop ulang pa Yesus. Itu sama deng tu da tulis di Mazmur kadua, tu da tulis bagini, ‘So Ngana tu Kita pe Anak, ini hari Kita so jadi Ngana pe Papa.’

³⁴Deng lei waktu Yesus so mati, Tuhan Allah so se hidop ulang pa Dia. Jadi waktu itu Dia pe badan nyanda busu, sama deng Tuhan Allah da bilang, ‘Tu Kita da janji pa raja Daud, itu janji yang Kudus kong pasti mo jadi pa ngoni ini.’

³⁵Bagitu lei di Mazmur yang laeng, tu da tulis bagini, ‘Tuhan nyanda kase biar tu Dia pe Orang Kudus pe badan mo busu di dalam kubur.’

³⁶Tu da tulis di Mazmur ini, bukang tentang Daud. Soalnya waktu Daud hidop, dia beking samua tu Tuhan Allah da suru pa dia, abis itu dia mati. Trus dorang kase kubur pa dia di sabla pa de pe nene moyang. Dia pe mayat lei memang so jadi busu.

³⁷Mar waktu Yesus mati, Dia pe mayat nyanda busu di kubur, lantaran Tuhan Allah se hidop ulang pa Dia.

³⁸Jadi sudara-sudara, torang kase tau pa ngoni kalu ngoni pe dosa-dosa bole dapa ampung lantaran Yesus so mati di kayu salib. Mar kalu torang cuma mo iko tu atoran-atoran di kitab Taurat, torang nyanda mo jadi butul di muka pa Dia.

³⁹Jadi sapa yang percaya pa Yesus, tu orang itu mo jadi butul di muka pa Tuhan.

⁴⁰So itu skarang ngoni musti hati-hati, supaya apa tu Tuhan Allah da bilang dulu lewat Dia pe nabi-nabi nyanda mo jadi pa ngoni. Bagini tu Dia da bilang,

⁴¹‘Tarukira bae-bae hei ngoni yang ja bapandang enteng. Ngoni mo lia tu hal-hal yang luar biasa yang kita mo beking, sampe ngoni taheran-heran. Mar biar lei bagitu ngoni mo mati lantaran ngoni nyanda percaya, biar ada orang se cirita samua itu pa ngoni.’ ”

⁴²Waktu so klar babicara, Paulus deng Barnabas bajalang kaluar dari ruma ibada itu. Mar tu orang-orang di situ bamohon pa dorang babale ulang minggu datang for babicara ulang tu hal-hal itu.

⁴³Abis itu, tu orang-orang kaluar dari tu ruma ibada kong ada yang iko pa Paulus deng Barnabas. Dorang itu orang-orang Yahudi deng lei orang-orang bukang Yahudi yang so maso agama Yahudi. Paulus deng Barnabas kase nasehat pa dorang supaya tetap bagantong pa Tuhan Allah yang so se tunjung Dia pe bae pa dorang supaya dorang bole slamat dari tu hukuman dosa.

⁴⁴De pe minggu datang pas hari Sabat, amper samua orang yang ada di Antiokhia datang bakumpul for badengar tu Tuhan pe firman yang Paulus deng Barnabas da se tau.

⁴⁵Mar waktu tu pemimpin-pemimpin agama Yahudi lia tu orang pe banya itu, dorang jadi mangiri pa Paulus deng Barnabas. Kong dorang mulai bahina deng malawang samua tu Paulus ja bilang.

⁴⁶Mar Paulus deng Barnabas deng brani manyao pa tu orang-orang itu, “Tu Tuhan Allah pe firman torang musti kase tau lebe dulu pa ngoni orang-orang Yahudi. Mar ngoni nimau percaya tu Tuhan Allah pe firman. Deng cara bagitu, ngoni rasa ngoni pe diri nyanda cocok mo dapa tu hidop kekal. So itu, skarang torang mo pigi pa orang-orang yang bukang Yahudi for mo kase tau tu Tuhan Allah pe firman itu.

⁴⁷Soalnya Tuhan Allah da prenta pa torang bagini, ‘Kita so pili pa ngana, supaya ngana bole pigi kase tau tu kabar keslamatan pa orang-orang yang bukang Yahudi sampe ka ujung bumi. Deng bagitu, ngana mo jadi sama deng lampu yang beking trang pa dorang.’ ”

⁴⁸Pe dengar itu, tu orang-orang yang bukang Yahudi jadi snang skali kong puji deng hormat tu Tuhan pe firman itu. Trus tu orang-orang yang Tuhan so pili mo dapa hidop kekal, dorang itu jadi percaya.

⁴⁹Waktu itu, Tuhan pe firman tasiar ka samua tampa di daera itu.

⁵⁰Mar tu orang-orang Yahudi malawang tu Tuhan pe firman. Dorang hasut tu parampuang-parampuang yang punya pengaru tu ja baibada pa Tuhan Allah deng lei pejabat-pejabat di situ. So itu, orang-orang siksa pa Paulus deng Barnabas kong user pa dorang dua dari daera itu.

⁵¹Kong Paulus deng Barnabas se paka tu abu dari pa dorang pe kaki, itu jadi tanda kalu Tuhan mo hukum pa orang-orang itu, kong dorang pigi ka Ikonium.

⁵²Trus tu orang-orang yang ja iko pa Yesus tu ada di Antiokhia, dorang snang skali deng Roh Kudus da kuasai pa dorang.