Read Malay, Manado Kisah Para Rasul 14 Bible Online

Kisah Para Rasul 14 - Malay, Manado bible

Kisah Para Rasul 14

¹Waktu Paulus deng Barnabas di Ikonium, di situ lei dorang maso ka ruma ibada agama Yahudi sama deng biasa dorang ja beking. Di situ dorang kase tau tu Kabar Bae deng brani, sampe banya orang Yahudi deng orang-orang yang bukang Yahudi jadi percaya pa Yesus.

²Mar ada orang-orang Yahudi yang nyanda trima apa tu Paulus deng Barnabas ja se tau, trus dorang hasut pa orang-orang bukang Yahudi supaya malawang pa tu sudara-sudara yang percaya itu.

³Jadi Paulus deng Barnabas da tinggal sadiki lama di situ, kong dorang kase tau deng brani tu brita tentang Tuhan pe bae. Kong Tuhan se bukti kalu tu dorang da kase tau itu butul deng cara kase kuasa pa dorang for beking tanda-tanda ajaib deng hal-hal luar biasa.

⁴Mar tu orang-orang di kota itu so tapica dua. Ada tu bapro pa orang-orang Yahudi yang nyanda percaya, deng ada lei yang bapro pa rasul-rasul.

⁵Kong tu orang-orang Yahudi deng tu orang-orang yang bukang Yahudi deng lei dorang pe pemimpin-pemimpin ambe keputusan for mo siksa kong lempar deng batu pa Paulus deng Barnabas.

⁶Mar Paulus deng Barnabas dapa tau tu rencana jaha itu, so itu dorang dua pi manyingkir ka daera Likaonia. Di situ dorang pigi ka Listra, Derbe deng ka tampa-tampa laeng yang ada di dekat-dekat situ.

⁷Kong di situ lei dorang kase tau pa orang-orang tu Kabar Bae tentang Yesus.

⁸Di Listra, ada satu laki-laki yang dia pe kaki lemah deng lumpu dari dia lahir. Kong dia blum perna bajalang, dia cuma da dudu-dudu.

⁹Tu orang itu da badengar Paulus da babicara. Paulus da tarukira pa dia, kong Paulus tau kalu dia itu percaya pa Yesus, jadi dia bole mo bae.

¹⁰Kong Paulus babilang pa dia deng suara kuat, “Badiri jo!” Trus dia iko balumpa badiri, kong mulai bajalang kasana-kamari.

¹¹Waktu orang banya lia tu Paulus da beking, dorang trus bataria pake bahasa Likaonia, “Opo-opo so turung di tenga-tenga pa torang sama deng manusia!”

¹²Tu Barnabas dorang kase nama ‘opo Zeus’, kong Paulus yang jago babicara dong kase nama ‘opo Hermes’.

¹³Di dekat kota, ada satu kuil for dong pe opo Zeus. Waktu itu datang dari sana tu kapala agama di kuil itu sama-sama deng banya orang kong da bawa tu sapi-sapi jantan deng karangan bunga ka pintu gerbang kota. Di situ dorang rencana mo beking korban persembahan for Paulus deng Barnabas.

¹⁴Mar waktu Barnabas deng Paulus dapa tau apa tu dorang mo beking itu, dorang dua se rabe dong pe baju for beking tanda kalu dorang nyanda trima tu orang-orang itu mo beking. Trus dorang dua lari basosuru ka tenga-tenga orang banya itu kong babilang deng suara kuat,

¹⁵“Hei ngoni samua, kiapa ngoni beking bagini? Torang ini manusia sama deng ngoni. Torang datang kamari for mo se tau pa ngoni tu Kabar Bae tentang Yesus. Deng bagitu ngoni bole se tinggal tu opo-opo yang nyanda ada de pe guna kong percaya pa Tuhan Allah yang hidop. So Dia no tu da beking langit, bumi, laut deng samua de pe isi.

¹⁶Dulu, biar samua bangsa hidop iko dong pe mau sandiri, Tuhan Allah nyanda beking apa-apa pa dorang.

¹⁷Mar Tuhan tetap kase tunjung tu Dia pe bae for samua manusia supaya tau kalu Dia itu ada. Dia kase tunjung tu Dia pe bae deng cara se turung ujang dari langit, Dia kase oras bapete for torang samua, Dia lei da kase makanan deng beking torang pe hati snang.”

¹⁸Mar biar Paulus deng Barnabas so bicara bagitu, dorang amper-amper nyanda dapa tahang tu orang banya itu mo kase korban persembahan for dorang.

¹⁹Kong waktu itu datang tu orang-orang Yahudi dari Antiokhia deng Ikonium. Di situ, dorang hasut pa orang banya sampe tu orang banya bapro pa dorang kong lempar pa Paulus deng batu. Abis itu dorang hela pa dia ka luar kota, lantaran dorang pe kira dia so mati.

²⁰Mar waktu tu orang-orang yang ja iko pa Yesus badiri bakliling pa Paulus, dia iko badiri kong maso ulang ka Listra. De pe eso, dia deng Barnabas brangkat sama-sama ka Derbe.

²¹Paulus deng Barnabas da kase tau tu Kabar Bae tentang Yesus di Derbe, kong banya orang yang jadi percaya. Abis itu, dorang dua babale ka Listra, trus ka Ikonium deng lei ka Antiokhia di daera Pisidia.

²²Di tampa-tampa itu, Paulus deng Barnabas kase kuat hati tu orang-orang yang ja iko pa Yesus. Dorang dua lei kase smangat pa tu orang-orang percaya itu supaya tetap batahang percaya. Kong Paulus deng Barnabas babilang lei pa dorang, “Kalu torang suka mo jadi orang-orang dari Tuhan Allah yang Berkuasa sbagai Raja, torang musti dapa banya susa.”

²³Klar bilang bagitu, dorang dua lei tunjung penatua-penatua for tiap jemaat. Dorang basombayang deng bapuasa for mo srahkan tu penatua-penatua pa Tuhan yang dorang percaya itu, supaya Dia sama-sama deng tu penatua-penatua itu.

²⁴Abis Paulus deng Barnabas bajalang lewat tu daera Pisidia, dorang pigi ka daera Pamfilia.

²⁵Di daera Pamfilia, dorang kase tau tu Kabar Bae di Perga. Abis itu dorang pigi ka Atalia.

²⁶Dari sana dorang blayar ka Antiokhia di daera Siria. Tempo hari, jemaat di Antiokhia yang da utus pa dorang for kase tau tu Kabar Bae. Tu jemaat itu da basombayang for srahkan dorang dua itu pa Tuhan Allah supaya Tuhan Allah se tunjung Dia pe bae pa dorang deng cara jaga pa dorang. Skarang dorang mo ka Antiokhia lantaran dong pe tugas so klar.

²⁷Pe sampe di Antiokhia, dorang pangge tu jemaat for bakumpul. Kong dorang dua se cirita samua tu Tuhan Allah da beking lewat dorang, deng lei bagimana Dia da buka jalang supaya orang-orang bukang Yahudi bole jadi percaya pa Yesus.

²⁸Abis itu, Paulus deng Barnabas tinggal bebrapa lama sama-sama deng tu orang-orang yang ja iko pa Yesus yang ada di kota itu.