Read Malay, Manado Kisah Para Rasul 17 Bible Online

Kisah Para Rasul 17 - Malay, Manado bible

Kisah Para Rasul 17

¹Paulus deng Silas se trus dong pe perjalanan lewat Amfipolis deng Apolonia kong dorang sampe di Tesalonika. Di situ, ada ruma ibada agama Yahudi.

²Kong sama deng biasa, tiap hari Sabat Paulus maso di ruma ibada agama Yahudi, kong slama tiga kali hari Sabat dia babicara deng orang-orang di situ tentang bagean-bagean Kitab Suci.

³Paulus se trangkan deng se bukti pa dorang tentang Mesias tu Raja yang se slamat pa manusia. Dia bilang kalu tu Mesias itu musti dapa siksa sampe mati kong hidop ulang. Kong Paulus bilang pa dorang, “Mesias yang kita da bilang pa ngoni, so Dia no tu Yesus.”

⁴Ada bebrapa dari orang Yahudi yang jadi percaya, deng ada banya lei tu orang Yunani yang tako pa Tuhan deng lei banya tu parampuang-parampuang yang punya pengaru di situ yang jadi percaya. Dorang samua iko bagabung sama-sama Paulus deng Silas.

⁵Mar tu orang-orang Yahudi laeng jadi mangiri pa Paulus deng Silas. So itu dorang kumpul tu orang-orang begal dari pusat kota, kong serta so banya tu orang da takumpul, dorang bakacau di kota itu. Dorang pi srang tu Yason pe ruma for mo cari pa Paulus deng Silas, lantaran mo urus pa dorang dua di muka banya orang.

⁶Mar dorang nyanda dapa pa Paulus deng Silas di situ, so itu dorang hela deng paksa pa Yason deng bebrapa sudara laeng yang percaya pa Yesus kong bawa pa penguasa-penguasa kota. Kong dorang bataria, “Tu orang-orang yang da bakacau di mana-mana so datang pa torang pe kota ini.

⁷Kong Yason da trima pa dorang manumpang pa de pe ruma. Dorang samua malawang tu prenta-prenta dari tu torang pe raja yang paling tinggi di krajaan Romawi. Dorang bilang kata ada raja laeng selain tu torang pe raja itu. Tu raja laeng itu, de pe nama Yesus.”

⁸Pe dengar itu, tu orang banya deng penguasa-penguasa kota iko ribut.

⁹Kong tu penguasa-penguasa suru pa Yason deng orang-orang laeng yang percaya pa Yesus supaya dorang kase doi pa tu penguasa-penguasa itu for jaminan kalu Yason deng tu orang-orang itu nyanda mo bakacau lei. Abis itu, dorang se lapas pa Yason deng tu orang-orang laeng yang percaya.

¹⁰De pe malam itu jo, sudara-sudara yang percaya di Tesalonika iko suru Paulus deng Silas brangkat ka Berea. Kong waktu Paulus deng Silas sampe di sana, dorang dua pigi ka ruma ibada agama Yahudi.

¹¹Orang-orang Yahudi di Berea pe pikiran lebe tabuka dari tu orang-orang Yahudi di Tesalonika. So lantaran itu dorang suka badengar deng trima tu Tuhan pe firman. Kong saban hari dorang cari tau dari Kitab Suci kalu tu Paulus ja se ajar itu butul ka nyanda.

¹²So itu banya dari pa dorang yang jadi percaya pa Yesus. Kong ada banya lei orang Yunani yang jadi percaya pa Yesus, dorang itu laki-laki deng parampuang yang punya pengaru di situ.

¹³Mar waktu tu orang-orang Yahudi dari Tesalonika dapa tau kalu di Berea lei Paulus da se tau tu Tuhan Allah pe firman, dorang ka sana for pengaruhi pa orang banya kong beking kacau tu orang banya itu pe pikiran.

¹⁴So itu, sudara-sudara yang percaya di Berea capat-capat antar pa Paulus pi plabuhan, mar tu Silas deng Timotius masi tinggal di Berea.

¹⁵Kong tu orang-orang itu da antar pa Paulus blayar sampe ka Atena. Abis itu, tu orang-orang itu babale ka Berea. Dorang lei da bawa pesan dari Paulus for Silas deng Timotius, supaya dorang dua capat-capat baku iko ka Atena.

¹⁶Paulus da tunggu pa Silas deng Timotius di Atena. Di situ, Paulus pe hati sedi skali lantaran dia lia di kota itu punung deng tu patong opo-opo.

¹⁷So itu di ruma ibada agama Yahudi, Paulus badiskusi deng bebrapa orang Yahudi deng orang bukang Yahudi yang baibada pa Tuhan Allah. Kong saban hari, kalu Paulus pas baku dapa deng orang-orang di pusat kota, dia lei badiskusi deng dorang.

¹⁸Di Atena ada dua klompo yang ja se ajar tu dorang pe ajaran[8] masing-masing. Tu satu klompo Epikuros deng tu satu lei klompo Stoa. Di situ Paulus kase tau pa dorang tu Kabar Bae tentang Yesus, deng kase tau tentang mo hidop ulang. Trus tu dua klompo itu baku ambe deng Paulus, kong ada bebrapa dari pa dorang babilang, “Ni orang pe banya bicara, mar nyanda maso akal tu dia ja bilang.” Kong tu laeng lei babilang, “Ni orang da kase tau tentang tu opo-opo dari bangsa laeng.”

¹⁹Abis itu dorang antar pa Paulus pa tu anggota-anggota dewan Areopagus[9] yang da bakumpul di bukit tu de pe nama lei Areopagus. Pe sampe di situ, tu anggota-anggota dewan bilang pa dia, “Tolong ngana se tau kamari tu ajaran yang baru itu!

²⁰Soalnya tu ngana da bilang itu baru skarang torang dengar. So itu torang suka mo cari tau apa tu samua itu pe arti.”

²¹Dorang minta bagitu, lantaran samua orang Atena deng lei tu pendatang, dorang itu sama deng nyanda ada waktu for beking hal-hal yang laeng, dorang cuma se abis tu waktu for kase tau ato badengar tu hal-hal yang baru.

²²Di situ Paulus badiri di muka anggota-anggota dewan Areopagus, kong babicara, “Orang-orang Atena! Kita tarukira, ngoni ini orang yang rajin skali ja semba pa ngoni pe patong opo-opo.

²³Kita bilang bagitu lantaran waktu kita da babaron pa ngoni pe kota ini, kita da tarukira tu ngoni pe patong opo-opo yang ngoni ja semba. Kong kita dapa satu tampa tu ngoni ja kase akang korban persembahan, yang ada tulisan bagini, ‘For Tuhan Allah yang torang nyanda kanal.’ Tu Tuhan Allah yang ngoni ja semba mar ngoni nyanda kanal itu, so Dia tu kita mo kase tau pa ngoni.

²⁴Tuhan Allah itu yang da beking ni bumi deng samua de pe isi. So Dia no tu Tuhan yang pegang kuasa di langit deng di bumi. Dia nyanda tinggal di tampa-tampa sombayang yang manusia da beking.

²⁵Dia nyanda perlu manusia mo layani, Dia nyanda kekurangan apa-apa. Soalnya Dia yang da kase tu nafas, tu hidop deng samua yang ada pa manusia.

²⁶Dari satu orang Dia so beking samua suku bangsa for tinggal di bumi. Dia so ator samua manusia pe waktu deng Dia lei so se berbage tu batas-batas for manusia tinggal akang.

²⁷Tuhan Allah da beking bagitu supaya torang samua cari pa Dia kong baharap bole mo baku dapa deng Dia, padahal sebenarnya Dia nyanda jao dari pa torang.

²⁸Dia yang beking torang hidop, torang bagra deng torang ada. Itu sama deng ngoni pe tukang beking puisi sandiri da bilang, ‘Torang ini, Dia pe keturunan.’

²⁹Jadi kalu torang ini Tuhan Allah pe keturunan, torang jang bapikir kalu Tuhan Allah itu sama deng tu patong dari mas, perak ato batu yang tukang patong da beking.

³⁰Dulu manusia blum kanal pa Tuhan Allah, apa tu manusia ja beking waktu itu Dia so nyanda mo inga lei. Mar skarang Tuhan Allah prenta supaya samua orang di mana jo dorang ada supaya bertobat.

³¹Soalnya, Dia so ator satu waktu for adili pa samua orang deng cara yang adil, kong Dia so tunjung satu Orang for beking itu. Torang bole yakin kalu samua itu mo jadi bagitu, lantaran tu Hakim itu mati kong Tuhan Allah so kase hidop ulang pa Dia.”

³²Waktu tu orang-orang Atena dengar kalu orang mati bole mo hidop ulang, bebrapa dari pa dorang da tatawa akang pa Paulus. Mar tu laeng babilang pa dia, “Nanti laengkali jo torang suka mo dengar tu ngana da bilang tadi.”

³³Abis itu, Paulus kase tinggal tu anggota-anggota dewan.

³⁴Mar ada bebrapa orang iko pa Paulus yang da jadi percaya pa Yesus. Di antara pa dorang itu, ada satu laki-laki tu anggota dewan Areopagus, de pe nama Dionisius. Kong ada lei satu parampuang de pe nama Damaris, deng ada lei orang-orang laeng yang iko sama-sama deng dorang.