Read Malay, Manado Kisah Para Rasul 20 Bible Online

Kisah Para Rasul 20 - Malay, Manado bible

Kisah Para Rasul 20

¹Pe klar tu kekacauan di Efesus, Paulus pangge tu orang-orang yang ja iko pa Yesus pe ajaran di situ kong kase smangat pa dorang supaya dorang pe iman tetap kuat. Abis itu, dia minta permisi kong brangkat ka daera Makedonia.

²Di daera Makedonia, dia babasingga pa orang-orang percaya di situ kong dia kase smangat for se kuat dorang pe iman. Abis itu, dia pigi ka daera Yunani.

³Di Yunani Paulus tinggal slama tiga bulan. Abis itu, dia basadia for mo blayar ka daera Siria. Mar waktu dia mo nae kapal, dia da dapa dengar kalu ada orang-orang Yahudi baku skongkol mo bunung pa dia. So itu, dia nyanda jadi nae kapal mo ka daera Siria mar dia babale ulang ka Antiokhia iko jalang darat lewat Makedonia.

⁴Ada bebrapa orang yang da iko pa Paulus. Dorang itu: Sopater dari Berea tu Pirus pe anak, Aristarkhus deng Sekundus dari Tesalonika, Gayus dari Derbe, Timotius, deng dua orang dari daera Asia, tu Tikhikus deng Trofimus.

⁵Dorang itu brangkat lebe dulu kong batunggu pa torang di Troas.

⁶Torang blayar sampe di Filipi di daera Makedonia. Kong serta so klar tu hari raya Roti Nyanda Baragi, torang nae kapal dari situ. Torang blayar slama lima hari kong sampe di Troas. Di situ torang bagabung deng tu orang-orang yang da pigi lebe dulu dari torang, kong tinggal slama tuju hari.

⁷Waktu hari pertama di minggu itu, torang deng orang-orang percaya laeng da bakumpul sama-sama for mo beking perjamuan. Di situ Paulus babicara lama pa orang-orang percaya itu sampe tenga malam, lantaran de pe eso dia so mo brangkat.

⁸Waktu itu, torang da bakumpul di ruang atas. Di situ ada banya pelita da pasang.

⁹Kong ada satu nyong tu de pe nama Eutikhus, dia da dudu di regel jendela. Tu nyong itu so nyanda dapa tahang de pe manganto lantaran Paulus pe lama skali da babicara. De pe laste, dia tasono kong jatung dari lante tiga. Waktu dorang turung angka pa dia, dia so mati.

¹⁰So itu Paulus turung ka bawa. Dia baplaka pa tu nyong itu, polo pa tu nyong kong dia babilang pa orang-orang di situ, “Jang tako kwa, dia hidop.”

¹¹Klar itu Paulus babale ulang ka atas. Di situ dia se pela-pela tu roti kong beking perjamuan, abis itu dorang makang sama-sama. Dia babicara deng dorang sampe pagi. Klar itu dia se tinggal tu Troas.

¹²Kong tu orang-orang di situ antar tu nyong yang so hidop ulang itu pa de pe ruma, kong dorang samua snang skali.

¹³Abis itu, torang baku pisa jalang deng Paulus kong nanti mo baku dapa di Asos sama deng tu dia pe rencana. So itu torang pigi lebe dulu nae kapal, kong Paulus iko jalang darat.

¹⁴Waktu torang baku dapa ulang deng Paulus di Asos, dia iko deng torang nae kapal. Abis itu, torang blayar ka Metilene.

¹⁵Dari Metilene torang blayar trus, kong de pe eso torang pe kapal so di muka pulau Khios. De pe lusa torang sampe di pulau Samos, kong de pe hari brikut torang sampe di Miletus.

¹⁶Paulus suka mo capat-capat sampe di Yerusalem, lantaran dia suka supaya pas hari raya Pentakosta dia so ada di sana. So itu dia nyanda basingga di Efesus supaya de pe waktu nyanda abis di daera Asia.

¹⁷Waktu Paulus di Miletus, dia suru orang pi pangge tu penatua-penatua jemaat di Efesus supaya datang ka Miletus.

¹⁸Waktu tu pemimpin-pemimpin itu datang ka Miletus, Paulus bilang pa dorang, “Sudara-sudara, ngoni samua so tau bagimana kita pe hidop waktu kita da sama-sama deng ngoni mulai dari hari pertama kita sampe di daera Asia ini.

¹⁹Ngoni tau kalu kita deng hati yang nyanda sombong bakarja for Tuhan, kong kita banya kali manangis. Kita lei banya dapa susa lantaran tu orang-orang Yahudi baku skongkol mo bunung pa kita.

²⁰Mar biar lei bagitu, kita tetap tolong pa ngoni supaya ngoni pe iman batumbu. Samua kita so se tau deng se ajar pa ngoni di muka banya orang deng lei di ruma-ruma.

²¹Kita slalu kase tau pa orang-orang Yahudi deng orang-orang bukang Yahudi supaya bertobat kong iko pa Tuhan Allah, deng percaya pa torang pe Tuhan Yesus.

²²Skarang kita mo pigi ka Yerusalem, lantaran kita musti iko Roh Kudus pe prenta for pigi ka sana. Di sana, kita nintau apa tu mo jadi pa kita.

²³Mar di tiap kota yang kita so pigi akang, tu Roh Kudus so kase tau pa kita kalu nanti di Yerusalem kita mo dapa siksa deng mo dapa maso bui.

²⁴Mar kita so nyanda farduli deng kita pe hidop, asal kita bole mo kase klar tu tugas yang Tuhan Yesus da kase pa kita sampe kita pe waktu di dunia ini so abis. Tu kita pe tugas itu kita musti se tau tu Kabar Bae kalu Tuhan Allah kase tunjung Dia pe sayang pa torang manusia.

²⁵Waktu kita da sama-sama deng ngoni ini, kita so se tau bagimana Tuhan Allah Berkuasa sbagai Raja. Skarang kita se tau pa ngoni, kalu ngoni so nyanda mo baku dapa lei deng kita.

²⁶So itu kita bilang pa ngoni, kalu nanti ada dari pa ngoni yang mati mar blum percaya, itu so bukang kita pe sala.

²⁷Soalnya kita tetap ja kase tau pa ngoni tentang samua tu Tuhan Allah pe rencana for ngoni.

²⁸So itu, ngoni musti jaga bae-bae tu ngoni pe diri deng jemaat yang Roh Kudus da kase for ngoni mo jaga. Ngoni jaga tu Tuhan Allah pe jemaat sama deng gembala ja jaga de pe domba, tu jemaat yang Tuhan Allah da tubus deng De pe dara sandiri.

²⁹Kita tau kalu kita so pigi, tu orang-orang yang de pe sifat sama deng srigala ganas mo maso di tenga-tenga pa ngoni. Dorang mo brusaha se ancor tu jemaat yang ngoni da jaga itu.

³⁰Malatare dari pa ngoni sandiri mo muncul orang-orang yang mo kase tau tu dong pe ajaran yang nyanda butul. Dorang mo beking bagitu supaya orang-orang yang ja iko pa Yesus jadi nyanda percaya kong iko pa dorang.

³¹So itu ngoni musti hati-hati. Ngoni musti slalu inga kalu slama tiga taong waktu kita da sama-sama deng ngoni, siang malam kita da kase nasehat trus pa ngoni sampe malele aer mata.

³²No skarang, kita srahkan ngoni pa Tuhan Allah supaya Dia jaga pa ngoni. Ngoni lei musti inga trus tu firman tentang Tuhan Allah pe sayang pa ngoni. Tu firman itu yang se kuat ngoni pe iman, deng lei yang nanti mo kase tu berkat yang Tuhan Allah so janji mo kase pa samua orang yang Dia so beking kudus.

³³Kita nyanda perna suka orang-orang pe doi perak, doi mas ato baju.

³⁴Malatare ngoni sandiri tau kalu kita bakarja deng kita pe tangan sandiri, sampe kita mampu se hidop ta pe diri deng kita pe tamang-tamang yang ja iko pa kita.

³⁵Samua yang kita so beking itu, kita se conto pa ngoni kalu deng karja kras bagitu, torang musti bantu tu orang-orang yang nyanda mampu. Torang musti inga tu Tuhan Yesus da bilang, lantaran Dia sandiri tu da bilang, ‘Lebe snang bakase daripada batrima.’ ”

³⁶Abis babicara bagitu, Paulus berlutut kong basombayang sama-sama deng dorang samua.

³⁷Dorang samua manangis, dorang polo pa Paulus kong ciong-ciong pa dia.

³⁸Dorang pe sedi skali lebe-lebe lei waktu Paulus bilang kalu dorang so nyanda mo baku dapa lei deng dia. Kong dorang antar pa dia ka kapal.