Read Malay, Manado Kisah Para Rasul 25 Bible Online

Kisah Para Rasul 25 - Malay, Manado bible

Kisah Para Rasul 25

¹Festus datang ka Kaisarea for jadi gubernur di situ. Serta so tiga hari di situ, dia brangkat ka Yerusalem.

²Di Yerusalem, tu imam-imam kapala deng orang-orang Yahudi yang punya pengaru datang mangada pa dia for mo kase tau tu dorang pe tuduhan pa Paulus.

³Dorang bamohon pa gubernur supaya dia bantu suru orang antar pa Paulus ka Yerusalem. Dorang minta bagitu lantaran dong ada rencana mo bunung pa Paulus di tenga jalang.

⁴Mar gubernur Festus bilang, “Paulus tetap mo dapa tahang di Kaisarea, kong nyanda lama lei kita mo bale ka sana.

⁵So itu, lebe bae tu ngoni pe pemimpin-pemimpin baku iko jo sama-sama deng kita ka sana. Nanti kalu so di sana baru ngoni bilang tu tuduhan for Paulus, itu lei kalu dia memang butul da beking kejahatan.”

⁶Gubernur Festus da tinggal di Yerusalem kira-kira dlapan ato spulu hari, abis itu dia pulang ka Kaisarea. De pe eso, dia beking sidang di pengadilan for mo urus Paulus pe perkara kong dia suru orang bawa pa Paulus for mangada pa dia.

⁷Serta Paulus sampe di situ, tu orang-orang Yahudi tu da datang dari Yerusalem badiri kong baron akang pa dia, dorang bilang banya tuduhan mar nyanda ada bukti kalu itu butul.

⁸Mar Paulus babela diri, dia bilang, “Biar lei sadiki, kita kasiang nyanda beking sala. Kita nyanda malawang tu torang orang-orang Yahudi pe atoran-atoran di kitab Taurat, kita nyanda langgar tu atoran di Ruma Ibada Pusat, deng kita lei nyanda beking sala pa pemerenta Romawi.”

⁹Mar lantaran Gubernur Festus mo ambe hati pa orang Yahudi, dia batanya pa Paulus, “Bapak Paulus, apa bapak suka mo pigi ka Yerusalem supaya kita bole mo urus tu bapak pe perkara di sana?”

¹⁰Paulus manyao, “Skarang ini kita da badiri di tampa tu pemerenta Romawi ja baadili akang. Kita musti dapa urus di sini, bukang di Yerusalem. Bapak sandiri lei tau butul kalu kita nyanda beking sala apa-apa pa orang Yahudi.

¹¹Kalu kita memang ada beking sala ato kejahatan yang musti dapa hukuman mati, kita rela mo mati. Mar komang, kalu samua tu dorang da tudu pa kita nyanda butul, nyanda ada satu orang yang ada hak for mo srahkan kita pa dorang. Kalu so bagini, kita minta nae banding pa raja yang paling tinggi di krajaan Romawi!”

¹²Pe dengar itu, Gubernur Festus badiskusi deng de pe penasehat-penasehat, klar itu dia bilang, “Bapak da minta nae banding pa raja yang paling tinggi di krajaan Romawi, jadi ngana musti pi mangada pa dia.”

¹³Serta so lewat bebrapa hari, raja Agripa pigi ka Kaisarea. Dia da pigi deng de pe ade parampuang, tu de pe nama Bernike. Dorang ka sana for mo kase slamat pa Festus yang baru da jadi gubernur.

¹⁴Kong serta dorang so sadiki lama tinggal di situ, gubernur Festus kase tau tu Paulus pe perkara pa raja Agripa. Gubernur Festus bilang, “Di sini, ada tu satu orang yang da dapa tahang. Tu gubernur Feliks perna urus tu orang ini pe perkara mar nyanda klar. So itu, dia masi da dapa tahang di sini.

¹⁵Waktu kita ada di Yerusalem, tu imam-imam kapala deng tu tua-tua orang Yahudi da lapor pa kita tu orang itu pe kejahatan. Dorang minta supaya dia dapa hukum.

¹⁶Mar kita bilang pa dorang kalu nyanda biasa for orang Romawi mo srahkan orang for dapa hukum seblum urus tu orang itu pe perkara. Tu orang itu musti dapa kesempatan for mo babela de pe diri kalu apa tu dorang da tudu pa dia itu nyanda butul.

¹⁷So itu, dorang iko sama-sama deng kita kamari. Trus de pe eso, kita beking sidang for urus tu perkara itu kong kita iko suru dorang bawa pa Paulus for mangada pa kita.

¹⁸Waktu itu, tu orang-orang yang da batudu pa Paulus badiri kong dorang bilang tu dong pe tuduhan for Paulus. Mar samua tu dorang da bilang itu, bukang soal kejahatan rupa tu kita da pikir.

¹⁹Dorang cuma da baku ambe deng dia tentang dorang pe agama, deng tentang satu orang tu de pe nama Yesus. Tu Orang itu so mati, mar Paulus cuma da batahang bilang kalu Dia itu da hidop ulang.

²⁰So itu, kita bingo mo urus tu perkara yang model bagini. Jadi kita tanya pa Paulus kalu dia suka mo ka Yerusalem for mo urus tu de pe perkara di sana.

²¹Mar Paulus cuma da bilang kalu dia mo nae banding, dia minta supaya kita tahang pa dia di bui sampe tu raja yang paling tinggi di krajaan Romawi bole urus tu de pe perkara. So itu kita suru tahang pa dia sampe kita ada kesempatan mo kirim pa dia pa tu raja yang paling tinggi di krajaan Romawi.”

²²Pe dengar tu gubernur Festus pe cirita, raja Agripa babilang, “Kita sandiri suka mo dengar langsung dari pa dia.” Kong gubernur Festus manyao, “Bole, nanti eso bapak bole mo dengar dari pa Paulus.”

²³Kong de pe eso, raja Agripa deng Bernike datang di gedung pengadilan. Dorang dua da maso di situ pake baju krajaan kong orang-orang di situ hormat pa dorang. Dorang dua datang sama-sama deng tu kapala-kapala perwira Romawi deng tu orang-orang yang punya pengaru di kota itu. Kong serta dorang samua so ada di situ, gubernur Festus suru bawa pa Paulus ka situ.

²⁴Serta Paulus so di situ, gubernur Festus babilang, “Raja Agripa yang kita hormat deng samua orang yang ada sama-sama deng torang skarang ini. Co torang lia pa orang ini, amper samua orang Yahudi yang ada di Yerusalem deng yang ada di Kaisarea da batudu pa dia. Dorang datang pa kita kong minta deng babataria kalu dia musti dapa hukuman mati.

²⁵Mar waktu kita urus de pe perkara, kita nyanda dapa tu de pe sala sampe dia musti dapa hukuman mati. Mar lantaran dia sandiri yang minta for nae banding pa raja yang paling tinggi di krajaan Romawi, jadi kita ambe keputusan for kirim dia mangada pa raja.

²⁶Cuma de pe masala skarang, kalu kita kirim tahanan pa raja, kita musti tulis samua tu tuduhan tentang orang ini, mar kita blum tau pasti apa tu de pe kejahatan. So itu kita da pangge pa dia kamari for mo se mangada pa ngoni samua di sini. Kita harap pa ngoni samua di sini, apa lei pa raja Agripa supaya sama-sama priksa tu dia pe perkara sampe dapa dia pe sala, trus kita bole tulis itu pa raja yang paling tinggi.

²⁷Soalnya kita pikir kwa, nyanda maso akal kalu kita kirim satu tahanan pa raja yang paling tinggi mar nyanda ada tuduhan for tu orang itu.”