Read Malay, Manado Kisah Para Rasul 3 Bible Online

Kisah Para Rasul 3 - Malay, Manado bible

Kisah Para Rasul 3

¹Satu hari Petrus deng Yohanes pigi ka Ruma Ibada Pusat, dorang da pigi jam tiga sore tu orang Yahudi pe jam basombayang.

²Di Ruma Ibada Pusat ada tu satu pintu gerbang, de pe nama ‘Pintu Gaga’. Di pintu itu, ada satu laki-laki tu de pe kaki so lumpu dari lahir. Saban hari orang bawa dia ka situ, supaya dia bole baminta-minta pa orang-orang yang maso ka Ruma Ibada Pusat.

³Kong waktu dia dapa lia pa Petrus deng Yohanes so mo maso ka Ruma Ibada Pusat, dia baminta doi pa dorang.

⁴Petrus deng Yohanes lia pa dia, kong Petrus bilang pa dia, “Co ngana haga pa torang!”

⁵Trus tu orang itu haga pa dorang deng baharap mo dapa doi dari pa dorang.

⁶Mar Petrus cuma bilang pa dia, “Kita nyanda ada mas ato perak. Mar apa tu kita bole kase skarang, itu yang kita mo kase pa ngana: dalam nama Yesus Kristus dari Nazaret itu, badiri kong bajalang jo!”

⁷Trus Petrus pegang tu orang itu pe tangan kanan kong bantu se badiri pa dia. Waktu itu jo tu orang itu pe kaki deng de pe pergelangan jadi bae.

⁸Kong tu orang itu balumpa trus bajalang kasana-kamari, kong dia baku iko deng dorang maso ka kompleks Ruma Ibada Pusat. Dia bajalang deng babalumpa deng lei bapuji pa Tuhan Allah.

⁹Waktu itu, samua orang lia kalu dia so bajalang deng da puji-puji pa Tuhan Allah.

¹⁰Trus dorang dapa kanal pa dia, kalu dia itu tu orang lumpu yang ja dudu baminta-minta di muka Pintu Gaga. Dorang jadi taheran-heran deng kagum lantaran tu orang itu bole jadi bae.

¹¹Tu orang lumpu yang so bae itu bapegang pa Petrus deng Yohanes. Kong waktu dorang tiga sampe di place tu de pe nama ‘Place Salomo’, tu orang banya yang taheran-heran itu, datang bakrumun pa dorang.

¹²Waktu Petrus lia tu orang banya itu, dia bilang pa dorang, “Hei sudara-sudara orang Israel, kiapa so ngoni heran kalu dia so bae? Kong kiapa lei ngoni cuma da haga-haga trus pa torang sama deng torang ini yang beking dia bajalang? Dia so bole bajalang, bukang lantaran torang pe jago ato lantaran torang slalu ja beking tu Tuhan Allah pe mau.

¹³Tuhan Allah tu torang pe nene moyang tu Abraham, Ishak deng Yakub ja semba, so Dia tu da beking itu. Dia beking itu supaya Yesus tu Dia pe playan itu dapa puji deng hormat. Tempo hari ngoni nyanda trima pa Yesus kong srahkan Dia pa gubernur Pilatus for mo bunung, padahal waktu itu gubernur mo se lapas pa Dia.

¹⁴Mar ngoni tetap tolak pa Dia Yang Kudus itu, Yang Ja Beking Tu Butul di muka pa Tuhan Allah. Ngoni cuma da minta pa gubernur for se lapas tu ja babunung orang.

¹⁵Ngoni so bunung pa Dia, padahal Dia yang da kase torang pe hidop, mar biar Dia mati Tuhan Allah so kase hidop ulang pa Dia. Torang so lia pa Dia so hidop ulang, jadi torang kase tau hal itu pa ngoni.

¹⁶Tu orang lumpu itu ngoni so kanal, kong ngoni lei so lia apa tu da jadi pa dia. Dia so bae kong so jadi kuat lantaran dia percaya pa Yesus. Jadi de pe percaya itu no kong sampe ngoni samua bole lia dia so jadi bae.

¹⁷Sudara-sudara, kita tau kalu ngoni deng ngoni pe pemimpin-pemimpin so bunung pa Yesus lantaran ngoni nintau apa tu ngoni da beking.

¹⁸Mar Tuhan Allah so kase tau dari dulu lewat Dia pe nabi-nabi kalu Kristus tu Raja yang se slamat pa manusia mo dapa banya siksa, kong skarang samua itu so jadi.

¹⁹So itu bertobat jo kong se tinggal tu ngoni pe dosa-dosa deng iko pa Tuhan, trus Dia mo se hapus tu ngoni pe dosa-dosa itu.

²⁰Deng bagitu, ada de pe waktu for Tuhan mo beking ngoni pe hati tenang, deng Dia lei mo utus Yesus pa ngoni lantaran Dia so tentukan dari dulu supaya Yesus tu Kristus jadi Raja yang mo se slamat pa manusia.

²¹Mar skarang, Yesus musti tetap tinggal di sorga, sampe datang de pe waktu Tuhan Allah beking samua jadi baru. Itu samua Tuhan Allah so janji dari dulu lewat De pe nabi-nabi yang Dia da pili.

²²Musa so perna babilang bagini, ‘Tuhan Allah mo utus satu Nabi for ngoni, sama deng Dia so utus pa kita jadi nabi. Tu Nabi itu satu dari antara torang pe sudara-sudara orang Israel. Dengar jo samua tu Nabi itu mo bilang pa ngoni.

²³Sapa yang nyanda badengar pa tu Nabi itu, dorang itu Tuhan Allah mo buang dari antara orang-orang yang Dia so pili kong Dia mo se binasa pa dorang.’

²⁴Bukang cuma Musa tu da bilang tentang Dia, samua nabi mulai dari nabi Samuel sampe nabi-nabi laeng abis Samuel, dorang samua bilang tentang apa yang Yesus mo beking di jaman ini.

²⁵Dorang so bilang lebe dulu pa ngoni pe nene moyang tu janji dari Tuhan Allah tentang Kristus, so itu ngoni ini lei mo dapa bagean dari tu janji itu. Dulu Tuhan Allah da bilang pa Abraham bagini, ‘Dari ngana pe keturunan, samua bangsa di bumi mo dapa berkat.’

²⁶So itu, Tuhan Allah angka Dia pe playan itu, Dia utus lebe dulu tu Dia pe playan itu pa torang supaya bole jadi berkat deng cara bantu pa torang bertobat dari samua torang pe kalakuan jaha.”