Read Malay, Manado Kisah Para Rasul 4 Bible Online

Kisah Para Rasul 4 - Malay, Manado bible

Kisah Para Rasul 4

¹Waktu Petrus deng Yohanes da babicara pa orang banya, datang tu imam-imam, kapala penjaga Ruma Ibada Pusat deng orang-orang dari golongan Saduki.

²Tu orang-orang itu mara skali pa Petrus deng Yohanes lantaran dorang dua da mangajar pa orang banya kalu orang yang percaya pa Yesus mo hidop ulang.

³Kong dorang suru tangka pa Petrus deng Yohanes, trus kase maso pa dorang dua ka bui, mar dorang dua mo dapa urus de pe eso lantaran waktu itu so malam.

⁴Mar dari pa tu orang-orang yang da badengar tu ajaran itu banya yang jadi percaya sampe dorang pe jumla so kira-kira lima ribu laki-laki.

⁵De pe eso, tu pemimpin-pemimpin Yahudi, tua-tua Yahudi deng ahli-ahli Taurat beking sidang di Yerusalem.

⁶Di situ da hadir lei tu imam basar Hanas, deng tu Kayafas, Yohanes, Aleksander deng orang-orang laeng yang tamaso kluarga imam basar.

⁷Kong dorang suru orang pi ambe pa Petrus deng Yohanes for bawa di muka pa dorang. Abis itu dorang mulai tanya-tanya akang pa dorang dua, “Sapa yang da kase kuasa pa ngoni? Kong ngoni pake sapa pe nama da beking samua itu?”

⁸Kong tu Roh Kudus da kuasai pa Petrus, trus Petrus manyao pa dorang bagini, “Hei pemimpin-pemimpin deng tua-tua Yahudi.

⁹Kalu skarang torang musti dapa priksa lantaran torang da beking tu bae pa tu orang yang da saki lumpu, deng ngoni lei mo tanya bagimana sampe tu orang saki itu jadi bae,

¹⁰ngoni deng torang samua orang Israel musti tau kalu tu orang lumpu ini jadi bae lantaran tu kuasa dari Yesus Kristus. Yesus itu orang Nazaret yang ngoni so se salib. Mar waktu Dia mati, Tuhan Allah so kase hidop ulang pa Dia, kong Dia itu no yang beking orang lumpu ini jadi bae sampe bole badiri di muka pa ngoni.

¹¹Yesus itu, ‘Batu yang ngoni tukang-tukang bangunan da buang, batu itu so jadi batu fondasi yang paling penting.’

¹²Cuma Yesus yang bole se slamat pa manusia. Soalnya nyanda ada nama laeng di dunia ini yang Tuhan da kase tu bole se slamat pa manusia.”

¹³Tu orang-orang yang da sidang pa Petrus deng Yohanes lia kalu dorang dua itu pe brani. Dorang lei tau kalu dorang dua itu orang biasa yang nyanda skola. Samua itu beking tu orang-orang yang da sidang pa dorang dua itu jadi taheran-heran. Kong dorang dapa kanal kalu dulu tu dua orang itu ja iko pa Yesus.

¹⁴Mar tu orang-orang yang da sidang pa dorang dua nimbole mo bilang apa-apa for malawang pa dorang, lantaran tu orang-orang itu da lia sandiri kalu tu orang lumpu itu so bae kong da badiri di sabla pa dorang dua.

¹⁵Jadi dorang suru kaluar pa Petrus deng Yohanes dari tu tampa sidang. Abis itu, dorang badiskusi tentang tu masala itu,

¹⁶kong dorang baku tanya, “Apa tu torang musti beking pa dorang dua itu? Soalnya samua orang di Yerusalem so tau kalu dorang da beking mujisat yang luar biasa kong torang nimbole mo sangkal.

¹⁷Bagini jo, supaya tu brita itu nyanda tasiar pa orang banya, lebe bae torang ancam pa dorang supaya nyanda se ajar tentang Yesus pa orang-orang.”

¹⁸Abis itu, dorang pangge pa Petrus deng Yohanes maso ulang ka ruang sidang. Kong dorang larang pa dorang dua supaya jang bicara deng se ajar pa orang-orang tentang Yesus.

¹⁹Mar Petrus deng Yohanes manyao pa dorang, “Kalu menurut bapak-bapak, mana tu paling butul di muka pa Tuhan Allah? Iko bapak-bapak pe prenta ato iko Tuhan Allah pe prenta?

²⁰Soalnya tempo hari torang so lia apa yang Yesus beking deng so dengar sandiri apa yang Dia se ajar. Jadi skarang torang musti kase tau pa orang-orang apa tu torang so lia deng so dengar itu.”

²¹Pe dengar itu, tu pemimpin-pemimpin Yahudi lebe kras baancam pa Petrus deng Yohanes, mar tu pemimpin-pemimpin itu kase lapas pa Petrus deng Yohanes lantaran dorang nintau mo hukum bagimana pa dorang dua itu. Dorang lei tako jang sampe tu orang banya mo mangamu. Soalnya tu orang banya itu da puji deng hormat pa Tuhan Allah lantaran tu orang lumpu itu so bae.

²²Soalnya tu orang itu lumpu so ampa pulu taong lebe, kong skarang dia so bae.

²³Waktu Petrus deng Yohanes so se bebas dari bui, dorang babale pa dong pe tamang-tamang. Dorang dua se cirita pa dong pe tamang-tamang samua tu imam-imam kapala deng tua-tua Yahudi da bilang pa dorang.

²⁴Waktu dorang pe tamang-tamang dengar samua itu, dorang sama-sama basombayang pa Tuhan Allah, “Ya Tuhan, Tuhan tu da beking langit, bumi, laut, deng samua de pe isi.

²⁵Dulu, Tuhan babicara lewat Roh Kudus pa raja Daud tu Tuhan pe playan, tu torang pe nene moyang, supaya raja Daud bilang bagini, Kiapa orang-orang dari bangsa yang nyanda kanal pa Tuhan bamara? Kiapa orang-orang ini beking rencana tu nyanda ada de pe guna?

²⁶Tu raja-raja basiap-siap deng pemimpin-pemimpin dunia bakumpul for baprang malawang pa Tuhan deng tu Mesias yang Tuhan so pili dari dulu.

²⁷Tu raja Daud da bilang dulu so jadi pa torang, lantaran di kota ini raja Herodes, gubernur Pilatus, orang-orang laeng yang nyanda kanal pa Tuhan Allah deng lei tu orang-orang Israel so bakumpul. Dorang samua baku skongkol malawang pa Yesus tu Tuhan pe Playan yang kudus, Dia yang Tuhan Allah da pili itu.

²⁸Samua tu dorang da beking itu Tuhan Allah so tentukan dari dulu lantaran Dia pe kuasa deng Dia pe mau.

²⁹Kong skarang Tuhan, tolong lia akang tu dorang pe ancaman-ancaman. So itu, bantu akang pa torang tu ja beking Tuhan da suru supaya brani kase tau tu Tuhan pe firman.

³⁰Tuhan tolong pa torang supaya bole kase bae tu orang-orang saki, beking tanda-tanda deng hal-hal yang luar biasa pake kuasa dari Yesus, tu Tuhan Allah pe Playan yang kudus.”

³¹Abis dorang basombayang, tu tampa dorang da basombayang akang iko bagoyang. Trus tu Roh Kudus kuasai pa dorang samua kong deng brani dorang kase tau tu Tuhan Allah pe firman pa orang-orang.

³²Samua orang yang percaya pa Yesus itu satu pikiran deng satu hati. Dorang samua so baku bilang kalu apa yang dorang punya bukang cuma dorang punya sandiri, mar samua orang punya.

³³Kong deng kuasa yang basar tu rasul-rasul kase tau kalu Tuhan Yesus so hidop ulang, dorang itu jadi saksi waktu Yesus da hidop ulang. Kong Tuhan ja se tunjung Dia pe bae pa dorang pe hidop.

³⁴Nyanda ada satu orang dari pa dorang yang kekurangan apa-apa, lantaran tu orang-orang yang punya tana ato ruma, dorang jual dong pe kepunyaan itu, kong tu doi dari dorang da bajual itu,

³⁵dorang bawa pa rasul-rasul, kong tu rasul-rasul kase berbage samua tu doi pa orang-orang iko tu orang-orang pe keperluan.

³⁶De pe conto, ada tu satu orang de pe nama Yusuf. Dia itu dari suku Lewi kong da lahir di Siprus. Tu rasul-rasul se nama pa dia Barnabas, tu de pe arti orang yang ja se smangat pa orang laeng.

³⁷Dia da jual tu de pe kobong kong tu doi hasil da jual kobong itu, dia bawa pa rasul-rasul.