Read Malay, Manado Kisah Para Rasul 5 Bible Online

Kisah Para Rasul 5 - Malay, Manado bible

Kisah Para Rasul 5

¹Ada tu satu laki-laki, de pe nama Ananias, kong de pe bini pe nama Safira. Dia deng de pe bini lei da jual tu dorang pe tana.

²Tu doi dari hasil bajual tana itu, sbagian Ananias da tahang, kong tu sbagian lei dia kase pa rasul-rasul. Dia pe bini lei tau samua tu Ananias da beking itu.

³Kong Petrus bilang, “Ananias, kiapa dang ngana kase biar tu setang pe bos kuasai tu ngana pe hati, sampe ngana so badusta pa Roh Kudus? Tu doi hasil da bajual tu tana, sbagian ngana da tahang.

⁴Bagini Ananias, waktu tu tana ngana blum jual, itu tetap ngana punya. Kong waktu so jual lei, tu de pe doi tetap ngana punya, itu samua mana-mana pa ngana. Mar kiapa ada rencana jaha pa ngana pe hati, sampe ngana beking bagini? Ngana nyanda badusta pa manusia, mar ngana so badusta pa Tuhan Allah.”

⁵Waktu Ananias dengar itu, dia iko tabanting ka tana kong mati. Samua orang yang da dengar tu kejadian itu jadi tako skali.

⁶Trus datang bebrapa nyong pi bungkus tu Ananias pe mayat deng kaeng puti, klar itu dorang bawa kaluar tu de pe mayat kong pi kase kubur.

⁷Serta so tiga jam, Ananias pe bini maso, mar dia nintau apa tu da jadi.

⁸Kong Petrus bilang pa dia, “Co ngana kase tau pa kita. Butul tu tana pe harga bagini?” Safira manyao, “Butul, de pe harga cuma bagitu.”

⁹Kong Petrus bilang pa dia, “Kiapa ngana deng ngana pe laki baku skongkol mo coba-coba pa Tuhan pe Roh? Co ngana lia, tu orang-orang yang baru klar se kubur ngana pe laki so di muka pintu, kong dorang lei tu mo kase kubur ngana pe mayat.”

¹⁰Waktu itu jo Safira iko tabanting di muka pa Petrus kong mati. Abis itu, tu bebrapa nyong maso ka dalam kong dorang lia tu Safira so mati. Trus dorang bawa kaluar tu de pe mayat kong se kubur di sei pa de pe laki.

¹¹Kong samua orang yang percaya jadi tako skali. Bagitu lei deng tu orang laeng yang da dapa dengar itu, dorang lei jadi tako skali.

¹²Waktu itu, tu rasul-rasul da beking banya tanda-tanda ajaib deng mujisat-mujisat di muka banya orang. Samua orang yang percaya deng satu hati ja bakumpul di Place Salomo di Ruma Ibada Pusat.

¹³Banya orang yang segan pa dorang, mar biar lei bagitu, tu orang-orang yang blum percaya nyanda brani bagabung deng dorang.

¹⁴Kong lebe hari lebe tatamba banya orang-orang yang jadi percaya pa Tuhan, bae itu laki-laki ato parampuang.

¹⁵Trus banya orang bawa tu orang-orang saki ka pinggir jalang kong kase tidor di tandu deng tikar. Dorang beking bagitu supaya kalu Petrus lewat di situ, biar cuma de pe bayangan takana pa tu orang-orang saki, dorang bole jadi bae.

¹⁶Waktu itu lei ada banya orang datang dari kota-kota laeng yang ada di dekat Yerusalem. Dorang datang rame-rame da bawa tu orang-orang saki deng orang-orang yang da kemasukan setang, kong dorang samua jadi bae.

¹⁷Waktu itu, imam basar deng de pe orang-orang Yahudi dari golongan Saduki jadi mangiri skali pa tu rasul-rasul.

¹⁸Jadi dorang tangka tu rasul-rasul itu trus kase maso ka bui.

¹⁹Mar de pe malam itu jo, Tuhan pe malaekat datang buka tu pintu-pintu bui, kong bawa kaluar pa dorang. Klar itu tu malaekat bilang pa dorang,

²⁰“Pigi jo ka Ruma Ibada Pusat kong kase ajar pa orang-orang tu firman yang bole beking dorang dapa hidop kekal.”

²¹Pe dengar tu malaekat da bilang, de pe amper siang dorang maso ka kintal Ruma Ibada Pusat kong mulai mangajar di situ. Waktu itu lei di tampa laeng, tu imam basar deng de pe orang-orang kase kumpul tu anggota-anggota Mahkamah Agama. Dorang itu penasehat-penasehat deng tua-tua Yahudi bangsa Israel. Kong dorang suru pi ambe tu rasul-rasul dari bui.

²²Mar waktu tu penjaga-penjaga sampe di bui, dorang lia tu rasul-rasul itu so nyanda ada di situ. Trus tu orang-orang yang da dapa suru itu babale pa tu pemimpin-pemimpin Yahudi. Kong dorang bilang,

²³“Waktu torang sampe di bui, tu pintu bui da takunci bae-bae, kong ada orang yang da bajaga di muka pintu. Mar serta torang buka tu pintu, so nyanda ada sapa-sapa di dalam.”

²⁴Pe dengar itu, tu kapala penjaga Ruma Ibada Pusat deng imam-imam kapala jadi bingo kong batanya-tanya apa tu mo jadi nanti.

²⁵Kong satu orang datang pa dorang kong kase tau, “Bapak-bapak, tu orang-orang yang bapak-bapak da se maso ka dalam bui, skarang ada di kintal kompleks Ruma Ibada Pusat. Dorang da mangajar pa orang banya di situ.”

²⁶Pe dengar itu, tu kapala penjaga Ruma Ibada Pusat deng de pe anak bua pi ambe deng bae-bae pa tu rasul-rasul lantaran tako pa tu orang banya yang snang pa rasul-rasul itu. Dorang tako jang sampe tu orang banya mo lempar deng batu pa dorang.

²⁷Dorang bawa tu rasul-rasul itu kong se mangada pa tu Mahkamah Agama. Trus tu imam basar mulai batanya pa tu rasul-rasul itu,

²⁸dia bilang, “Torang so larang deng kras pa ngoni supaya jang mangajar tentang Orang itu, mar ngoni tetap kase tau tu ngoni pe ajaran ka samua tampa di Yerusalem. Malatare, ngoni tudu pa torang kalu lantaran torang ini sampe tu Orang itu mati.”

²⁹Kong Petrus deng tu rasul-rasul laeng manyao, “Torang musti taat pa Tuhan Allah, bukang pa manusia.

³⁰Tuhan Allah yang torang pe nene moyang ja semba, Dia tu da se hidop ulang pa Yesus, yang ngoni so bunung di kayu salib.

³¹Yesus itu yang Tuhan Allah so angka ka tampa terhormat di sabla kanan pa Dia. Yesus so jadi Pemimpin supaya buka jalang for torang orang Israel bole dapa kesempatan bertobat, Dia lei so jadi Juruslamat supaya torang pe dosa-dosa bole dapa ampung.

³²Torang ini yang jadi saksi tentang samua itu, kong Roh Kudus lei tau kalu samua itu butul. Roh Kudus ini yang Tuhan Allah da kase pa samua orang yang ja iko De pe prenta.”

³³Pe dengar tu Petrus da bilang, tu pemimpin-pemimpin Yahudi jadi mara skali, kong dorang barencana mo bunung pa tu rasul-rasul itu.

³⁴Mar ada tu satu orang anggota Mahkamah Agama, de pe nama Gamaliel. Dia ini ahli Taurat dari golongan Farisi, deng orang-orang lei segan pa dia. Kong dia badiri di situ, trus suru orang-orang bawa kaluar pa tu rasul-rasul dari situ for samantara.

³⁵Trus Gamaliel bilang pa de pe tamang-tamang di Mahkamah Agama itu, “Hei sudara-sudara orang Israel, torang musti pikir bae-bae apa tu torang mo beking pa orang-orang itu.

³⁶Co ngoni inga, dulu, ada satu orang de pe nama Teudas. Dia angka de pe diri jadi orang penting, kong banya yang jadi de pe orang sampe dorang pe banya kira-kira ampa ratus orang. Mar waktu dia dapa bunung, samua de pe orang jadi tapisa-pisa sampe so nyanda ada sama skali.

³⁷Abis dia, ada lei satu orang de pe nama Yudas. Dia itu orang Galilea. Dia muncul waktu pemerenta Romawi da beking sensus penduduk. Dia pangge banya orang for jadi de pe orang kong malawang pa pemerenta Romawi. Mar de pe laste, dia lei dapa bunung kong samua de pe orang tapisa-pisa.

³⁸Jadi skarang sudara-sudara, kita bilang pa ngoni lebe bae ngoni jang beking apa-apa pa tu orang-orang itu. Se biar jo pa dorang. Kalu dorang pe ajaran itu cuma dari manusia, tantu nyanda mo batahang.

³⁹Mar kalu tu ajaran itu memang butul dari Tuhan Allah, torang nyanda mampu mo se brenti pa dorang, malatare torang sandiri stou tu mo malawang pa Tuhan Allah.” Pe dengar bagitu, tu anggota Mahkamah Agama itu trima tu samua Gamaliel da bilang.

⁴⁰Abis itu, dorang pangge tu rasul-rasul itu kong dorang cuma da suru cambok pa tu rasul-rasul. Trus dorang lei larang pa tu rasul-rasul for mo mangajar pa orang-orang tentang Yesus. Klar itu dorang se lapas tu rasul-rasul itu.

⁴¹Tu rasul-rasul kaluar deng hati snang dari tu sidang Mahkamah Agama, lantaran dorang rasa kalu Tuhan Allah anggap dorang itu pantas mendrita dapa hina lantaran ja iko pa Yesus.

⁴²Kong saban hari dorang mangajar di kintal kompleks Ruma Ibada Pusat deng lei di ruma-ruma. Dorang nyanda brenti kase tau tu Kabar Bae kalu Yesus itu Kristus tu Raja yang se slamat pa manusia.