Read Malay, Manado Kisah Para Rasul 6 Bible Online

Kisah Para Rasul 6 - Malay, Manado bible

Kisah Para Rasul 6

¹Waktu itu, tu orang-orang yang ja iko pa Yesus so lebe tatamba banya, kong tu orang-orang Yahudi yang pake bahasa Yunani nyanda snang pa orang-orang Yahudi yang pake dorang pe bahasa Yahudi asli[3]. Dorang nyanda snang lantaran tu dorang pe janda-janda nyanda dapa bagean waktu orang-orang se berbage tu keperluan hari-hari.

²So itu, tu rasul-rasul itu pangge bakumpul pa samua orang yang ja iko pa Yesus kong bilang, “Torang dua blas ini musti se tau trus pa orang-orang tu Tuhan Allah pe firman. Nyanda bagus kalu torang brenti se tau itu lantaran mo urus tu orang-orang pe makanan.

³Jadi bagini jo sudara-sudara, lebe bae ngoni pili tuju orang dari pa ngoni. Dorang itu musti orang bae-bae, bijaksana deng Roh Kudus da kuasai. Tu orang-orang itu yang nanti torang mo se tugas for urus tu soal makanan.

⁴Deng bagitu, torang bole lebe banya kase perhatian for basombayang deng kase tau tu Tuhan pe firman pa orang-orang.”

⁵Samua orang percaya di situ da trima deng bae tu usul itu. Jadi dorang pili tu tuju orang ini: Stefanus yang de pe percaya pa Yesus kuat deng Roh Kudus da kuasai pa dia, deng tu Filipus, Prokhorus, Nikanor, Timon, Parmenas, deng Nikolaus yang bukang orang Yahudi mar so maso agama Yahudi, dia ini dari Antiokhia.

⁶Kong tu tuju orang itu, dorang bawa di muka pa tu rasul-rasul. Trus tu rasul-rasul itu taru dorang pe tangan pa tuju orang itu kong basombayang for tuju orang itu pe playanan.

⁷Tu Tuhan Allah pe firman so lebe tasiar, kong tu orang-orang di Yerusalem yang ja iko pa Yesus so lebe tatamba banya. Ada banya lei imam yang jadi percaya pa Yesus.

⁸Waktu itu Tuhan Allah da se tunjung De pe bae pa Stefanus deng kase kuasa pa dia, so itu Stefanus beking tu hal-hal yang luar biasa deng tanda-tanda ajaib di muka banya orang.

⁹Mar di situ ada lei orang-orang yang nyanda trima pa Stefanus kong da baku ambe deng dia. Dorang itu orang Yahudi yang dari Kirene, dari Aleksandria, deng ada lei bebrapa orang dari daera Kilikia deng daera Asia. Dorang dulu perna jadi budak, mar skarang so nyanda. Dorang pe ruma ibada di situ pe nama, ‘Ruma Ibada orang yang dulu budak’.

¹⁰Dorang itu nyanda mampu baku ambe deng Stefanus lantaran dia babicara deng hikmat deng lei Tuhan pe Roh bantu pa dia for babicara.

¹¹So itu, deng babadiam dorang hasut bebrapa orang for mo basaksi dusta tentang Stefanus. Dorang suru bilang bagini, “Torang dengar Stefanus so bicara jaha tentang nabi Musa deng Tuhan Allah.”

¹²Bagitu no dorang pe cara bahasut tu orang banya, tua-tua Yahudi deng ahli-ahli Taurat. Jadi dorang pi tangka pa Stefanus, kong hela pa dia trus bawa pa Mahkamah Agama Yahudi.

¹³Di situ dorang suru bebrapa orang basaksi dusta tentang Stefanus, kong tu orang-orang itu bilang, “Orang ini nyanda brenti-brenti bicara jaha tentang tu Ruma Ibada Pusat deng tu atoran-atoran di kitab Taurat.

¹⁴Dia bilang kalu Yesus tu orang Nazaret itu mo kase rubu tu Ruma Ibada Pusat, deng dia lei bilang kalu Yesus mo roba tu adat istiadat yang dulu Musa so kase ajar pa torang pe nene moyang, kong torang ja pake sampe skarang.”

¹⁵Waktu itu, samua orang yang da bakumpul di sidang Mahkamah Agama Yahudi itu haga pa Stefanus kong dorang lia de pe muka bacahaya sama deng malaekat.