Read Malay, Manado Kisah Para Rasul 8 Bible Online

Kisah Para Rasul 8 - Malay, Manado bible

Kisah Para Rasul 8

¹Saulus lei stuju waktu dorang da bunung pa Stefanus. Waktu itu, tu orang-orang yang percaya pa Yesus mulai dapa siksa hebat di Yerusalem. Jadi dorang tafiaro ka daera-daera di Yudea deng Samaria, mar tu rasul-rasul tetap tinggal di Yerusalem.

²Tu orang-orang yang ja iko Tuhan pe mau ambe Stefanus pe mayat kong se kubur, trus dorang manangis akang lei pa dia.

³Mar Saulus brusaha for mo kase abis tu orang-orang yang percaya pa Yesus. Dia maso ka ruma satu kong ka ruma laeng trus hela kaluar tu laki-laki deng parampuang, trus kase maso pa dorang ka bui.

⁴Tu orang-orang percaya yang so tafiaro itu kase tau tu Kabar Bae tentang Yesus kamana-mana.

⁵Kong Filipus pi ka satu kota di daera Samaria. Di situ dia se tau pa orang-orang tentang Kristus, tu Raja yang se slamat pa manusia.

⁶Tu orang-orang di situ da dengar tu Filipus da bilang deng lei da lia samua tanda-tanda ajaib tu dia da beking, jadi dorang samua tarukira bae-bae samua tu Filipus da bilang.

⁷Waktu itu, ada banya orang yang da kemasukan setang, kong Filipus user tu setang-setang dari pa dorang, trus tu setang-setang itu kaluar deng babataria. Ada banya lei orang lumpu deng orang kento yang dia da kase bae.

⁸So itu, orang-orang di kota itu jadi snang skali.

⁹Di situ, ada satu orang tu de pe nama Simon. Dia itu so lama ja bapokos-pokos kong beking tu orang-orang Samaria taheran-heran. Dia ja angka de pe diri sama deng dia itu paling jago.

¹⁰Samua orang di situ, sapa jo dia badengar pa Simon. Dorang ja bilang, “Tu orang ini ada kuasa dari Tuhan Allah, tu ja bilang Kuasa Basar.”

¹¹Dorang itu iko pa dia, lantaran so lama dia ja beking dorang taheran-heran pake de pe pokos-pokos.

¹²Mar Filipus da mangajar pa dorang tu Kabar Bae tentang bagimana Tuhan Allah Berkuasa sbagai Raja deng bagimana percaya kalu Yesus itu Kristus tu Raja yang se slamat pa manusia. Jadi waktu dorang da dengar tu Filipus da bilang, dorang jadi percaya kong dorang dapa baptis, bae itu laki-laki ato parampuang.

¹³Simon lei jadi percaya kong dapa baptis. Klar itu, dia ja iko pa Filipus ka mana jo Filipus pigi. Kong waktu dia lia tu mujisat-mujisat deng tanda-tanda ajaib tu Filipus da beking, dia jadi taheran-heran.

¹⁴Waktu itu, tu rasul-rasul yang ada di Yerusalem dapa dengar kalu banya orang di daera Samaria so percaya tu Tuhan Allah pe firman tentang Yesus. So itu dorang utus pa Petrus deng Yohanes ka sana.

¹⁵Pe sampe di sana, tu dua rasul itu basombayang supaya tu orang-orang Samaria yang so percaya bole mo trima tu Roh Kudus.

¹⁶Dorang basombayang bagitu lantaran Roh Kudus blum ada pa tu orang-orang Samaria itu. Soalnya tu orang-orang itu baru da dapa baptis dalam nama Yesus.

¹⁷Jadi, Petrus deng Yohanes taru dong pe tangan pa tu orang-orang Samaria itu, trus dorang trima tu Roh Kudus.

¹⁸Waktu itu, Simon da lia rasul-rasul itu taru dong pe tangan pa orang-orang, kong tu orang-orang itu trima tu Roh Kudus. So itu, dia coba kase doi pa Petrus deng Yohanes supaya dia lei bole beking bagitu.

¹⁹Dia babilang, “Bapak-bapak, kase akang lei pa kita tu kuasa itu supaya kalu kita taru ta pe tangan pa orang, tu orang itu bole mo trima Roh Kudus.”

²⁰Mar Petrus bilang pa dia, “Cilaka jo ngana deng ngana pe doi, lantaran ngana kira ngana bole mo bli tu Tuhan Allah pe kuasa.

²¹Kalu bagitu, ngana nimbole sama-sama deng torang beking tu Tuhan pe karja ini, lantaran ngana pe hati nyanda butul di muka pa Tuhan Allah.

²²So itu, bertobat jo dari ngana pe pikiran-pikiran jaha itu, kong basombayang jo pa Tuhan supaya Dia kase ampung tu ngana pe pikiran jaha itu.

²³Soalnya kita lei tau kalu ngana pangmangiri skali sama deng tu empedu yang pe pait skali, deng dosa so kuasai pa ngana sama deng ngana so maso di prangkap.”

²⁴Kong Simon bilang, “Bapak-bapak, se sombayang akang for kita pa Tuhan Allah, supaya tu ngoni da bilang pa kita itu nyanda mo jadi.”

²⁵Serta Petrus deng Yohanes so kase tau pa orang-orang tu Tuhan pe firman deng apa tu dorang da lia tu Yesus da beking dulu, trus dorang babale ulang ka Yerusalem. Kong di jalang, dorang ja basingga di kampung-kampung laeng di daera Samaria kong kase tau pa orang-orang tu Kabar Bae tentang Yesus.

²⁶Satu kali, Tuhan Allah pe malaekat suru pa Filipus, “Filipus, pigi jo ka slatan. Ngana iko jo tu jalang yang baturung dari Yerusalem ka Gaza.” Tu jalang itu pe sunyi.

²⁷Pe dengar itu, Filipus iko pigi. Waktu di tenga jalang, dia lia ada satu orang pejabat dari Etiopia. Tu orang itu ja urus samua harta dari Kandake ato Ratu yang kuasai negri Etiopia. Tu pejabat itu baru klar iko ibada di Yerusalem.

²⁸Waktu itu dia da bapulang ka Etiopia. Dia da dudu pa de pe kreta kong da babaca tu kitab nabi Yesaya.

²⁹Trus Roh Kudus bilang pa Filipus, “Pi badekat jo ngana di kreta itu!”

³⁰Filipus capat-capat pigi badekat di kreta itu, kong dia dengar tu pejabat itu da babaca tu kitab nabi Yesaya. Trus Filipus batanya pa dia, “Bapak mangarti apa tu bapak da baca itu?”

³¹Tu pejabat manyao, “Kita nyanda mangarti no. Musti ada orang yang mo trangkan pa kita baru kita mangarti.” Kong tu pejabat itu mohon pa Filipus supaya dudu sama-sama deng dia.

³²Tu pejabat da baca tadi, de pe bunyi bagini, “Orang-orang bawa pa Dia sama deng da bawa domba for mo potong. Dia lei cuma babadiam, nyanda bicara apa-apa, sama deng domba waktu orang da gunting de pe bulu.

³³Abis itu, orang-orang bahina pa Dia, kong Dia pe perkara dorang urus nyanda adil. Trus dorang bunung pa Dia, kong Dia nyanda ada keturunan.”

³⁴Trus tu pejabat batanya pa Filipus, “Tolong dang bapak kase tau akang pa kita. Tu nabi ini da bilang dia pe diri sandiri ato orang laeng?”

³⁵Abis itu, Filipus pake tu bagian-bagian itu kong mulai se cirita tu Kabar Bae tentang Yesus.

³⁶Waktu dorang bajalang trus deng dong pe kreta, dorang sampe di tampa yang ada aer. Kong tu pejabat itu bilang pa Filipus, “Co lia, di situ ada aer! Bagimana, so bole stou kita dapa baptis?” [

³⁷Kong Filipus manyao, “Kalu bapak percaya, bapak so bole dapa baptis.” Tu pejabat itu manyao, “Kita percaya kalu Yesus Kristus itu Anak Allah.”]

³⁸Abis bilang bagitu, tu pejabat suru se brenti tu kreta. Trus dorang dua turung maso ka dalam aer, kong Filipus baptis pa dia.

³⁹Waktu dorang dua kaluar dari aer, kage-kage Tuhan Allah pe Roh bawa pa Filipus dari situ ka tampa laeng, kong tu pejabat itu so nyanda perna lia lei pa dia. Mar tu pejabat se trus de pe perjalanan deng hati snang.

⁴⁰Tu Filipus kote, kage-kage so ada di satu kampung tu de pe nama Asdod. Dari situ dia bajalang trus kong se tau pa orang-orang tu Kabar Bae tentang Yesus di samua kota sampe di Kaisarea.