Read Malay, Manado Roma 1 Bible Online

Roma 1 - Malay, Manado bible

Roma 1

¹Ni surat dari kita, Paulus. Kita ini orang yang ja beking tu Kristus Yesus da suru. Tuhan da pangge pa kita jadi rasul tu Kristus Yesus pe utusan, kong Dia da se kusus pa kita for kase tau tu Kabar Bae dari Tuhan Allah.

²Tu Kabar Bae itu Tuhan Allah so janji dari dulu pa Dia pe nabi-nabi, kong dorang tulis itu di Kitab Suci.

³Tu Kabar Bae itu tentang Anak Allah. Waktu Dia datang ka dunia sbagai manusia, Dia lahir dari raja Daud pe keturunan.

⁴Dia itu no Yesus Kristus tu torang pe Tuhan. Kong torang dapa tau pasti kalu Dia itu Anak Allah lantaran waktu Dia mati, Roh Kudus pe kuasa kase hidop ulang pa Dia.

⁵Kong lewat Yesus Kristus itu, Tuhan Allah se tunjung tu Dia pe bae pa kita sampe Dia pili pa kita jadi rasul for kase tau tu Kabar Bae tentang Yesus Kristus pa samua suku bangsa, supaya dorang percaya deng iko tu Yesus Kristus pe mau, kong banya orang puji pa Dia.

⁶Kong ngoni lei tamaso di samua tu suku bangsa itu, ngoni lei yang Tuhan pangge jadi Yesus Kristus pe orang.

⁷Kita tulis ni surat for ngoni samua yang percaya yang ada di Roma. Ngoni ini Tuhan Allah sayang, deng Dia pangge pa ngoni for hidop deng hati bersi di muka pa Dia. Kita minta pa Tuhan Allah tu torang pe Bapa deng Tuhan Yesus Kristus se tunjung tu bae pa ngoni, kong beking ngoni hidop deng hati tenang.

⁸Pertama kita bilang makase pa Tuhan Allah yang kita semba lewat Yesus Kristus lantaran ngoni. Soalnya ngoni pe percaya pa Tuhan Allah so tasiar ka sluru dunia.

⁹Kita slalu basombayang akang for ngoni; Tuhan Allah yang jadi saksi kalu kita butul ja beking itu. Tuhan Allah itu yang kita ja layani deng hati yang sunggu-sunggu waktu kita kase tau tu Kabar Bae tentang Dia pe Anak.

¹⁰Tiap kali kita basombayang, kita minta pa Tuhan Allah supaya skarang Tuhan kase kesempatan pa kita for pigi pa ngoni kalu itu memang Dia pe mau.

¹¹Soalnya kita suka skali mo baku dapa deng ngoni for mo se ajar pa ngoni tu Tuhan pe Roh da ajar pa kita supaya ngoni pe percaya lebe kuat.

¹²Kita pe maksut, kalu kita ada sama-sama deng ngoni di sana, kita bole se kuat ngoni pe hati supaya ngoni pe percaya pa Tuhan lebe kuat, kong tu ngoni pe percaya itu bole lei se kuat kita pe hati supaya kita pe percaya pa Tuhan lebe kuat.

¹³Sudara-sudara, supaya ngoni tau, kita so banya kali mo pigi pa ngoni, mar sampe skarang slalu ada halangan. Kita mo se tau tu Kabar Bae supaya tu orang yang blum percaya bole jadi percaya sama deng tu da jadi di antara bangsa-bangsa bukang Yahudi yang laeng.

¹⁴Kita ada beban for kase tau tu Kabar Bae pa samua orang: pa tu orang-orang yang tinggal di kota, pa orang-orang yang tinggal di kampung, pa orang-orang yang pande, deng lei pa tu orang-orang yang nintau apa-apa.

¹⁵So itu, kita suka skali mo pi se tau tu Kabar Bae tentang Yesus pa ngoni lei tu ada di Roma.

¹⁶Kita nyanda malo mo kase tau tu Kabar Bae tentang Yesus. Soalnya tu Kabar Bae itu ada kuasa dari Tuhan Allah yang kase slamat dari hukuman dosa tu tiap orang yang percaya. Kong bukang cuma bangsa Yahudi tu mo dapa slamat, tu orang-orang bangsa bukang Yahudi lei mo dapa slamat.

¹⁷Lewat tu Kabar Bae itu, Tuhan Allah so se tunjung tu Dia pe cara for beking torang jadi butul di muka pa Dia. Kalu torang mo jadi butul di muka pa Tuhan Allah, torang musti percaya pa Dia dari pertama sampe slama-lamanya. Itu sama deng tu da tulis di Kitab Suci bagini, “Orang yang percaya pa Tuhan, Tuhan mo beking dia jadi orang yang butul di muka pa Tuhan, dia mo hidop deng Tuhan slama-lamanya.”

¹⁸Tuhan Allah tu ada di sorga mara pa samua orang yang nyanda iko tu Dia pe mau deng pa samua orang yang ja beking tu jaha. Kong dorang pe kejahatan itu beking orang nyanda iko tu ajaran yang butul.

¹⁹Tuhan mo hukum pa manusia yang rupa itu lantaran sebenarnya dorang bole mo tau tentang Tuhan Allah, soalnya Tuhan Allah sandiri yang beking jelas pa dorang tentang sapa Dia.

²⁰Soalnya mulai dari dulu waktu Tuhan Allah da beking ni dunia sampe skarang, biar nyanda lia pa Dia, manusia bole tau deng jelas Dia pe sifat. Dorang bole tau Dia pe kuasa yang ada sampe slama-lamanya, deng dorang lei bole tau kalu Dia itu Tuhan. Jadi nyanda ada alasan for dorang mo bilang kalu dorang nintau Tuhan itu ada.

²¹Dorang so tau kalu Tuhan Allah itu ada kong Dia pantas mo dapa puji deng hormat, mar dorang nyanda puji deng hormat pa Dia, dorang lei nyanda bilang makase pa Dia. Dorang so nyanda pikir tentang Tuhan malatare dorang cuma pikir tu hal-hal yang nyanda ada guna. Dorang pe hati so jadi glap, so nyanda mangarti apa yang butul.

²²Dorang bilang, dorang so tau banya, padahal sebenarnya dorang itu bodok.

²³De pe laste dorang nyanda semba pa Tuhan Allah, padahal Tuhan Allah itu luar biasa kong hidop slama-lamanya. Dorang tare cuma da semba pa samua yang nyanda mo batahang slama-lamanya. Tu dorang da semba itu, patong-patong yang de pe model rupa ini: manusia, burung, binatang yang de pe kaki ampa, deng lei binatang yang ja bamaraya.

²⁴So lantaran dorang nyanda semba pa Tuhan Allah, Dia se biar dorang iko tu dorang pe mau for beking tu hal-hal yang cabul, sampe dorang beking malo tu dorang pe diri sandiri deng lei orang laeng.

²⁵Soalnya dorang nyanda trima yang butul yang dari Tuhan Allah tu da ciptakan langit deng bumi, malatare dorang cuma puji deng semba apa yang Tuhan Allah da ciptakan. Tuhan Allah itu no yang pantas mo dapa puji for slama-lamanya. Amin.

²⁶So lantaran dorang so nyanda semba pa Tuhan Allah, so itu Tuhan Allah se biar dorang iko tu dorang pe nafsu yang beking dorang itu jadi malo. Dorang pe bini-bini so nyanda ja beking tu hubungan seks yang biasa dorang beking deng dong pe laki, malatare dorang cuma ja beking tu hubungan seks deng parampuang laeng.

²⁷Bagitu lei deng tu laki-laki, dorang so nyanda ja beking tu hubungan seks yang biasa laki-laki ja beking deng dong pe bini, mar ada nafsu besae yang kuasai pa dorang sampe cuma suka beking tu hubungan seks deng laki-laki. Tu dorang ja beking itu sebenarnya beking malo, kong dorang dapa hukuman yang pantas iko tu dorang pe kalakuan yang nyanda butul itu.

²⁸Dorang rasa dorang nyanda perlu tau tentang Tuhan Allah, so itu Tuhan Allah kase biar dorang pe pikiran yang nyanda ada de pe guna kuasai pa dorang. De pe laste, dorang beking tu hal-hal yang nyanda pantas dorang beking.

²⁹Dorang pe hati punung deng tu hal-hal nyanda butul deng tu hal-hal yang jaha. Dorang sraka, bapikir tu jaha, mangiri, deng babunung. Dorang ja baku ambe, batipu, suka kalu orang laeng dapa cilaka, deng suka ja bicara tentang orang laeng.

³⁰Dorang itu lei ja se besae orang laeng pe nama, binci pa Tuhan Allah, pandang enteng, sombong, suka bicara tinggi-tinggi, jago beking tu jaha, kong lei nyanda dengar-dengaran pa orang tua.

³¹Kong dorang lei biongo, nyanda setia, nyanda ja basayang, deng nyanda ada rasa kasiang.

³²Dorang itu so tau Tuhan Allah pe atoran yang bilang kalu orang yang ja beking samua hal jaha itu, tu orang itu pantas mo hukum mati. Mar biar lei dorang tau, dorang tetap beking tu hal-hal jaha itu, kong dorang lei stuju kalu orang laeng ja beking tu hal-hal jaha itu.