Read Malay, Manado Roma 10 Bible Online

Roma 10 - Malay, Manado bible

Roma 10

¹Sudara-sudara, kita suka skali kita pe sudara satu bangsa orang Yahudi mo dapa slamat dari tu hukuman dosa. Itu yang kita da minta deng sunggu-sunggu pa Tuhan Allah.

²Kita sandiri bole basaksi kalu dorang memang smangat skali brusaha mo iko pa Tuhan Allah. Mar biar dorang smangat, dorang nyanda mangarti bagimana mo iko deng butul pa Tuhan Allah.

³Dorang nintau tu cara bagimana supaya Tuhan Allah beking dorang itu jadi orang yang butul di muka pa Dia. Dorang sandiri brusaha iko tu atoran-atoran di kitab Taurat, dorang pikir dorang mo jadi orang yang butul deng cara itu. So itu, dorang nimau mo iko tu Tuhan Allah pe jalang yang beking dorang bole jadi orang yang butul di muka pa Dia.

⁴Soalnya Kristus so beking samua maksut dari tu atoran-atoran di kitab Taurat. Jadi sapa jo yang percaya pa Dia, tu orang itu mo jadi butul di muka pa Tuhan kong dia so nyanda perlu lei mo iko tu atoran-atoran di kitab Taurat for mo jadi orang yang butul.

⁵Dulu nabi Musa da tulis tentang orang yang mo jadi butul di muka pa Tuhan asal dia iko tu atoran-atoran di kitab Taurat, Musa bilang: “Tu orang yang iko tu atoran-atoran di kitab Taurat, dia itu mo jadi orang yang butul.”

⁶Mar tentang bagimana Tuhan beking orang jadi butul di muka pa Dia lantaran percaya, ada tulis di Kitab Suci bagini, “Jang ngoni babilang pa ngoni pe dalam hati, ‘Sapa yang mo nae ka sorga dang?’ ” kalu ngoni bilang bagitu, itu de pe maksut mo bawa Kristus turung kamari dari sorga for se tau tu cara orang mo dapa slamat.

⁷Ato jang ngoni babilang pa ngoni pe dalam hati bagini, ‘Sapa yang mo turung ka tampa orang-orang mati dang?’ kalu ngoni bilang bagitu, itu de pe maksut mo angka pa Kristus dari antara orang mati kong bawa kamari for se tau tu cara orang mo dapa slamat.

⁸Ngoni nyanda usa bagitu lantaran di Kitab Suci da tulis bagini, “Tu firman itu so ada pa ngoni. Ngoni bole mangaku tu firman itu deng ngoni pe mulu, kong bole percaya tu firman itu pa ngoni pe hati.” Itu tu firman yang torang ja kase tau pa orang-orang, tu firman tentang percaya pa Yesus.

⁹Soalnya kalu ngoni mangaku Yesus itu tu Tuhan, kong percaya pa ngoni pe hati kalu Tuhan Allah so se hidop ulang pa Yesus, ngoni mo dapa slamat dari hukuman dosa.

¹⁰Kalu ngoni percaya, Tuhan mo beking ngoni jadi orang yang butul di muka pa Dia. Kong kalu ngoni mangaku Yesus itu ngoni pe Tuhan, ngoni mo dapa slamat dari hukuman dosa.

¹¹Di Kitab Suci da bilang, “Sapa jo yang percaya pa Tuhan, dia nyanda mo kecewa lantaran Tuhan mo beking samua tu De pe janji.”

¹²Samua orang bole dapa slamat lantaran nyanda ada de pe beda antara tu orang Yahudi deng orang bukang Yahudi. Tuhan yang satu itu for samua orang, deng Dia pangbae for orang yang minta tolong pa Dia.

¹³Itu sama deng tu da tulis di Kitab Suci, “Tuhan kase slamat pa sapa jo yang minta pa Dia for se slamat.”

¹⁴Mar bagimana orang-orang mo minta pa Tuhan supaya bole mo slamat kalu dorang blum percaya pa Dia? Kong bagimana orang-orang mo percaya pa Dia kalu dorang blum perna dengar tentang Dia? Deng bagimana orang-orang mo dengar tentang Dia kalu nyanda ada yang kase tau itu pa dorang?

¹⁵Trus bagimana lei orang-orang mo kase tau tentang Dia kalu dorang nyanda dapa utus? Jadi sama deng tu da tulis di Kitab Suci, “Pe snang skali kalu datang orang-orang yang ja kase tau tu Kabar Bae dari Tuhan Allah.”

¹⁶Mar nyanda samua orang yang so dengar tu Kabar Bae itu yang trima itu. Itu sama deng dulu Nabi Yesaya perna da bilang, “Tuhan, sapa yang percaya tu brita yang torang da kase tau?”

¹⁷So itu, orang musti dengar dulu baru dorang mo percaya, kong tu brita yang dorang da dengar itu no tu brita tentang Kristus.

¹⁸Mar kita mo tanya, apa tu orang Yahudi nyanda percaya lantaran dorang blum sempat dengar tu brita itu? Dorang pasti so dengar tu brita itu to? Soalnya di Kitab Suci da tulis bagini, “Orang-orang so pigi kase tau tu brita itu kamana-mana di dunia ini, dorang pe kata-kata itu so tasiar ka sluru dunia.”

¹⁹Ato stou dorang nyanda mangarti tu brita itu? Nyanda mungkin to? Dorang so mangarti tu brita itu, lantaran hele orang yang bukang Yahudi so mangarti itu. Nabi Musa tu pertama da tulis tu Tuhan Allah da bilang tentang itu, bagini, “Ngoni tu orang Yahudi, Kita mo beking ngoni cemburu waktu ngoni lia tu Kita pe sayang pa orang-orang dari bangsa laeng yang bukang Kita pe orang. Tu orang-orang bukang Yahudi itu no yang ngoni anggap bodok, mar Kita sayang pa dorang. Itu yang mo beking ngoni mara.”

²⁰Kong Nabi Yesaya lei deng brani babilang tu Tuhan Allah pe pesan tentang tu orang-orang yang bukang Yahudi bagini, “Orang yang nyanda perna cari tau tentang Kita, dorang so bole percaya pa Kita. Kita so se tunjung tu Kita pe diri pa orang-orang yang nyanda ja cari tau tentang Kita.”

²¹Mar tentang tu orang-orang Yahudi yang nyanda percaya, Nabi Yesaya kase tau Tuhan Allah pe pesan bagini, “Siang malam Kita minta pa ngoni supaya bale ulang pa Kita, mar ngoni nimau dengar pa Kita, ngoni memang kapala batu.”