Read Malay, Manado Roma 15 Bible Online

Roma 15 - Malay, Manado bible

Roma 15

¹Torang yang so kuat percaya pa Tuhan, torang musti sabar deng tu kelemahan dari orang-orang yang de pe percaya blum kuat. Torang jang cuma cari torang pe snang sandiri.

²Mar torang musti beking tu hal-hal yang bae for torang pe tamang pe bae, supaya dorang pe percaya pa Tuhan tatamba lebe kuat.

³Torang musti beking bagitu lantaran Kristus nyanda cari Dia pe snang sandiri, malatare Dia siap dapa hina for Tuhan Allah. Tu so jadi pa Kristus itu, sama deng tu da tulis di Kitab Suci bagini, “Tu kata-kata besae yang orang-orang bilang pa Tuhan Allah, itu so kana pa Kita lei.”

⁴Samua tu da tulis di Kitab Suci dulu ada tulis for se ajar pa torang supaya torang bole tetap batahang percaya biar dapa siksa, deng supaya lewat tu Kitab Suci torang tetap smangat for baharap deng yakin pa Tuhan Allah.

⁵Kong Tuhan Allah yang beking orang bole batahang percaya biar lei dapa siksa, deng Dia lei yang kase smangat pa orang. Kong kita minta pa Tuhan Allah supaya Dia tolong pa ngoni hidop satu hati deng ngoni pe sudara yang percaya iko tu Kristus Yesus pe cara hidop.

⁶Jadi deng ngoni hidop satu hati bagitu, ngoni bole sama-sama puji deng hormat pa Tuhan Allah tu torang pe Tuhan Yesus Kristus pe Bapa.

⁷So itu sudara-sudara, ngoni musti trima satu deng laeng sama deng Kristus lei so trima pa ngoni. Kalu ngoni beking bagitu, Tuhan Allah dapa puji deng hormat.

⁸Kita se inga pa ngoni bagini: Kristus so datang ka dunia for mo layani pa torang orang Yahudi supaya mo tepati tu Tuhan Allah pe janji pa torang pe nene moyang. Deng bagitu Tuhan Allah mo se tunjung kalu Dia so bajanji pasti Dia mo tepati, Dia memang da beking tu butul.

⁹Deng lei Dia datang ka dunia for orang-orang yang bukang Yahudi lantaran Tuhan Allah kasiang pa dorang, supaya dorang lei bole puji deng hormat pa Tuhan Allah. Di Kitab Suci da tulis kalu nanti tu orang Yahudi mo puji pa Tuhan sama-sama deng orang-orang bukang Yahudi, bagini tu da tulis: “Kita mo puji-puji pa Tuhan di tenga-tenga orang-orang bukang Yahudi. Kita mo manyanyi lagu pujian for puji Tuhan pe nama.”

¹⁰Kong ada lei yang da tulis bagini, “Hei bangsa-bangsa bukang Yahudi! Snang jo sama-sama deng tu Kita pe orang-orang.”

¹¹Trus ada lei tu da tulis, “Hei ngoni orang-orang dari samua bangsa bukang Yahudi, ngoni puji jo pa Tuhan! Biar jo samua suku bangsa puji pa Dia.”

¹²Kong nabi Yesaya lei da tulis di Kitab Suci bagini, “Dari Isai pe keturunan nanti mo muncul tu mo berkuasa pa bangsa-bangsa bukang Yahudi, kong dorang mo baharap deng yakin pa Dia.”

¹³Kita minta pa Tuhan Allah yang torang ja baharap akang, supaya Dia beking ngoni pe hati snang deng ngoni hidop deng hati tenang lantaran ngoni percaya pa Dia. Deng bagitu kuasa Roh Kudus bakarja pa ngoni pe hati for beking ngoni tamba trus baharap deng yakin pa Tuhan.

¹⁴Sudara-sudara, kita tau butul kalu ngoni so banya ja beking tu bae, ngoni so banya mangarti tentang tu Tuhan pe ajaran, deng lei ngoni so mampu for baku kase ajar tu butul.

¹⁵Mar biar lei bagitu, kita nyanda malo se nasehat pa ngoni di surat ini tentang bebrapa hal for mo se inga pa ngoni. Kita nyanda malo beking itu lantaran Tuhan Allah pe bae pa kita; Dia da kase tugas itu pa kita.

¹⁶Kita karja for Kristus Yesus, kita dapa tugas for pi kase tau tu Kabar Bae dari Tuhan Allah pa bangsa-bangsa bukang Yahudi. Kita pe karja sama deng imam yang ja kase korban persembahan pa Tuhan. Kalu ada dari pa orang-orang yang bukang Yahudi jadi percaya tu Kabar Bae lantaran kita ja kase tau pa dorang, tu orang-orang yang percaya itu sama deng tu korban persembahan yang beking snang pa Tuhan. Kong Tuhan trima pa dorang lantaran Roh Kudus beking dorang jadi Tuhan punya.

¹⁷Kita percaya pa Kristus Yesus, kong kita so rasa snang deng tu samua karja yang kita so beking for Tuhan Allah.

¹⁸Jadi yang kita brani bilang pa orang, itu cuma tu hal-hal yang kita so beking pake Kristus pe kuasa tu ada pa kita supaya beking bangsa-bangsa yang bukang Yahudi jadi dengar-dengaran pa Tuhan. Skarang so ada tu bangsa-bangsa bukang Yahudi yang so dengar-dengaran pa Tuhan lantaran apa yang kita da se ajar deng apa tu kita ja beking itu.

¹⁹Deng lei lantaran tu tanda-tanda ajaib deng mujisat-mujisat yang kita da beking pake Tuhan Allah pe Roh pe kuasa. Deng bagitu, kita so se tau tu Kabar Bae tentang Kristus pa orang-orang di samua kota yang kita pigi akang, dari Yerusalem sampe ka daera Ilirikum.

²⁰Kita pe tujuan utama kita kase tau tu Kabar Bae tentang Kristus di tampa-tampa yang orang-orang blum perna dengar tu Kabar Bae itu, supaya kita nyanda sama deng da se badiri ruma di atas fondasi yang orang laeng da beking.

²¹Kita so beking sama deng da tulis di Kitab Suci, “Orang-orang yang blum perna trima brita tentang Dia, dorang mo tau sapa Dia. Orang-orang yang blum perna dengar tu brita tentang Dia, dorang mo mangarti tentang Dia.”

²²Kita ja kase tau tu Kabar Bae di tampa-tampa yang orang-orang blum perna dengar tu Kabar Bae itu, so lantaran itu kita blum sempat pigi pa ngoni.

²³Mar skarang kita so se klar tu kita pe karja di tampa-tampa itu. Kong so lama kita suka mo pi pa ngoni, so deng taong-taong lei.

²⁴Kita ada rencana mo pigi ka negara Spanyol. Jadi waktu kita mo pigi ka sana, kita mo singga baku dapa dulu deng ngoni supaya kita pe hati jadi snang bole sama-sama deng ngoni. Abis itu, kita harap ngoni bole bantu akang pa kita pigi ka negara Spanyol.

²⁵Mar skarang kita mo ka Yerusalem dulu, mo antar tu sumbangan for Tuhan pe orang-orang yang miskin di sana.

²⁶Soalnya tu Tuhan pe orang-orang dari daera Makedonia deng Akhaya so kumpul doi for basumbang pa dorang.

²⁷Dorang da sumbang itu deng snang hati deng memang pantas dorang mo bantu tu dorang pe sudara yang percaya tu orang-orang Yahudi di Yerusalem. Soalnya, tu orang-orang bukang Yahudi da dengar tu Kabar Bae tentang Yesus dari pa orang-orang Yahudi, jadi pantas katu no dorang balas tu orang Yahudi pe bae deng cara bantu dorang pe perlu.

²⁸So itu kalu kita so klar kase tu sumbangan, baru kita mo brangkat ka Spanyol kong mo basingga dulu pa ngoni di Roma.

²⁹Kong kita tau waktu kita singga pa ngoni, kita nanti mo bawa banya berkat dari Yesus Kristus pa ngoni.

³⁰Sudara-sudara, torang so percaya pa Yesus Kristus tu torang pe Tuhan, deng lei Roh Kudus bakarja pa torang pe hati sampe torang bole baku sayang. So lantaran itu, kita bamohon pa ngoni supaya ngoni basombayang akang butul-butul for kita pa Tuhan Allah.

³¹Basombayang akang minta Tuhan jaga waktu kita pigi ka daera Yudea supaya tu orang-orang Yahudi yang nyanda percaya pa Yesus nyanda mo beking tu hal yang jaha pa kita. Kong lei basombayang akang supaya tu Tuhan pe orang-orang di Yerusalem bole trima deng bae tu sumbangan yang kita mo bawa.

³²Ngoni basombayang akang bagitu for kita supaya kalu memang Tuhan Allah mau kita datang pa ngoni, kita bole datang deng snang hati kong lei di tenga-tenga pa ngoni kita bole kuat ulang.

³³Tuhan Allah yang beking torang pe hati jadi tenang, kong kita basombayang pa Dia supaya Dia sama-sama deng ngoni samua. Amin.