Read Malay, Manado Roma 16 Bible Online

Roma 16 - Malay, Manado bible

Roma 16

¹Kita mo se tau pa ngoni di surat ini tentang tu torang pe sudara parampuang yang percaya, de pe nama Febe. Dia ja layani jemaat di Kengkrea.

²Nanti waktu dia pigi pa ngoni, kita minta supaya ngoni trima jo pa dia deng bae lantaran dia so percaya pa Tuhan sama deng ngoni. Ngoni trima deng bae pa dia lantaran tu sikap rupa itu yang orang-orang percaya musti ja beking. Kong kita minta supaya ngoni kase dia tu dia perlu, lantaran dia so banya bantu pa orang-orang deng lei pa kita.

³Titip salam for Priskila deng de pe laki Akwila di sana. Dorang dua da karja for Kristus Yesus sama-sama deng kita.

⁴Dorang dua itu sampe amper mo mati waktu dorang da se slamat pa kita. Kita bilang makase pa dorang. Mar bukang cuma kita tu babilang makase pa dorang dua, deng lei tu jemaat-jemaat dari orang-orang bukang Yahudi babilang makase pa dorang.

⁵Kong titip salam lei pa tu jemaat yang ja bakumpul for baibada di ruma pa Priskila deng Akwila. Titip salam lei pa Epenetus, tu sudara yang percaya yang kita sayang. Dia itu orang pertama di daera Asia yang jadi percaya pa Kristus.

⁶Titip salam lei pa Maria, dia itu so karja kras for ngoni pe bae.

⁷Titip salam lei for Andronikus deng Yunias tu satu bangsa deng kita. Waktu kita blum percaya pa Yesus Kristus, dorang dua itu so percaya. Dorang itu so terkenal di antara tu rasul-rasul, kong dorang perna maso bui sama-sama deng kita.

⁸Titip salam pa Ampliatus. Kita sayang pa dia yang sama-sama percaya pa Tuhan.

⁹Titip salam lei for Urbanus tu torang pe tamang satu playanan for Kristus. Kong salam lei for Stakhis yang kita sayang.

¹⁰Titip salam for Apeles. Dia dapa banya cobaan mar tetap percaya pa Kristus. Kong titip salam lei for orang-orang yang ada pa Aristobulus pe ruma.

¹¹Titip salam for Herodion, tu orang Yahudi yang satu bangsa deng kita. Titip salam lei for orang-orang percaya pa Tuhan yang ada pa Narkisus pe ruma.

¹²Titip salam lei for Trifena deng Trifosa yang lei so karja for Tuhan. Salam lei pa Persis, kita sayang pa dia deng dia lei so karja kras for Tuhan.

¹³Titip salam for Rufus. Dia banya orang ja hormat lantaran de pe percaya pa Tuhan luar biasa. Deng salam for de pe mama. De pe mama sayang pa kita kong kita so anggap de pe mama itu kita pe mama sandiri.

¹⁴Kong salam lei for Asinkritus, Flegon, Hermes, Patrobas, Hermas deng samua tu sudara-sudara yang percaya yang ada sama-sama deng dorang.

¹⁵Trus titip salam lei for Filologus, Yulia, Nereus deng de pe sudara parampuang. Kong titip salam lei for Olimpas deng for samua tu Tuhan pe orang-orang yang ada sama-sama deng dorang.

¹⁶Kalu ngoni bakumpul for baibada, ngoni sambut jo deng snang hati satu deng laeng deng cara baku kase salam[1]. Kong ada salam lei for ngoni dari samua jemaat yang ada di sini.

¹⁷Sudara-sudara, kita se nasehat supaya ngoni hati-hati pa tu orang-orang yang beking torang jadi tapica-pica, deng lei pa tu orang-orang yang beking torang tagoda beking dosa kong jadi sesat. Dorang ja kase ajar tu ajaran yang baku beda deng tu ajaran yang butul yang torang so se ajar pa ngoni. Ngoni bajao jo dari pa dorang.

¹⁸Soalnya tu orang-orang yang bagitu, dorang bakarja bukang for Kristus tu torang pe Tuhan, mar dorang bakarja for iko akang tu dong pe mau sandiri. Dorang pake kata-kata yang manis deng kata-kata pujian for tipu pa tu orang-orang yang nyanda mangarti mana tu bae deng mana tu jaha.

¹⁹Sudara-sudara, samua orang so dengar tu kabar tentang ngoni pe dengar-dengaran pa Tuhan. So itu, kita snang skali deng ngoni. Mar kita mau supaya ngoni lebe tatamba tau mana tu bae, deng nyanda usa jo beking tu jaha.

²⁰Kita minta Tuhan Allah yang beking torang pe hati tenang, mo iko kase ancor tu kuasa dari tu setang pe bos kong beking setang pe bos tunduk pa ngoni. Kong Yesus tu torang pe Tuhan se tunjung trus tu Dia pe bae pa ngoni.

²¹Timotius da titip salam for ngoni. Dia itu kita pe tamang karja di sini. Deng ada salam dari Lukius, Yason deng Sosipater tu kita pe tamang-tamang tu satu bangsa deng kita.

²²Kita ini Tertius, kita yang tulis ni surat iko tu Paulus ja bilang, kita lei titip salam for ngoni yang so sama-sama percaya pa Tuhan.

²³Gayus lei da titip salam for ngoni. Dia yang da kase de pe ruma for kita Paulus manumpang akang, deng lei kase de pe ruma for jemaat bakumpul baibada. Kong Erastus, tu bendahara kota, deng torang pe sudara yang percaya Kwartus, dorang lei da titip salam for ngoni. [

²⁴Kita minta Yesus Kristus tu torang pe Tuhan kase tunjung trus tu De pe bae for ngoni.]

²⁵Puji jo pa Tuhan! Dia itu yang mampu beking ngoni pe percaya jadi kuat lantaran ngoni so dengar tu Kabar Bae tentang Yesus Kristus yang kita ja se tau pa orang-orang. Tu Kabar Bae itu dari dulu orang blum tau,

²⁶mar skarang ini Tuhan Allah so se tunjung itu pa manusia. Tu Kabar Bae itu, Tuhan Allah so se tau pa nabi-nabi dulu kong Dia suru dorang tulis itu supaya samua orang yang dari samua suku bangsa tau kong dorang jadi percaya deng iko pa Kristus. Tuhan Allah itu slalu ada sampe slama-lamanya.

²⁷Puji jo pa Tuhan Allah, Dia Tuhan yang slalu tau mana tu bae. Torang puji deng hormat trus pa Tuhan Allah sampe slama-lamanya lantaran apa yang Yesus Kristus so beking. Amin.