Read Malay, Manado Roma 2 Bible Online

Roma 2 - Malay, Manado bible

Roma 2

¹Sudara-sudara, Tuhan memang mo hukum tu orang-orang yang ja beking tu hal-hal jaha, mar ngoni nyanda ada alasan mo adili tu orang-orang itu lantaran ngoni sandiri lei ja beking hal-hal jaha. Jadi kalu ngoni babilang pa dorang, dorang itu pantas Tuhan mo hukum, itu sama jo deng ngoni hukum pa ngoni pe diri sandiri.

²Torang tau kalu Tuhan Allah pe hukuman pa orang-orang yang ja beking tu hal-hal jaha itu butul.

³Jadi ngoni yang babilang pa orang laeng kalu dorang pantas Tuhan mo hukum, jang ngoni pikir kalu ngoni mo bebas dari Tuhan Allah pe hukuman, lantaran ngoni lei ja beking tu hal-hal jaha sama deng dorang.

⁴Tuhan Allah itu pangsayang, Dia itu sabar deng Dia pe hati bae, mar biar bagitu torang jang pandang enteng kong bilang pa torang pe hati, “Kita nyanda usa roba kita pe kalakuan.” Ngoni inga jo, Tuhan pe hati bae bagitu pa torang supaya torang bole bertobat.

⁵Mar ngoni ini kapala batu, ngoni nimau bertobat. So itu ngoni sandiri yang beking ngoni pe hukuman tatamba brat di hari kiamat, tu waktu yang Tuhan Allah mo kase tunjung De pe mara deng mo kase hukuman yang adil pa samua orang.

⁶Dia mo balas pa tiap orang iko apa tu orang-orang da beking.

⁷Dia mo kase tu hidop kekal pa tu orang-orang yang ja beking trus tu bae lantaran dorang suka dapa puji deng hormat dari Tuhan Allah, deng lei suka dapa tu hidop kekal deng Dia.

⁸Mar ada lei tu orang-orang yang cuma hidop for dong pe diri sandiri. Dorang nimau iko Tuhan Allah pe ajaran yang butul, dorang tare cuma suka ja beking tu jaha. Tuhan Allah mo mara skali pa dorang.

⁹Tuhan Allah mo kase hukuman pa samua orang yang ja beking tu jaha sampe dorang mo susa deng mendrita skali. Kong bukang cuma orang-orang Yahudi tu mo dapa hukuman, orang-orang bukang Yahudi lei mo dapa hukuman.

¹⁰Mar samua orang yang beking tu bae, nanti Tuhan Allah mo puji deng hormat pa dorang deng Dia beking dong hidop deng hati tenang, bukang cuma orang-orang Yahudi mar orang-orang bukang Yahudi lei.

¹¹Soalnya Tuhan Allah nyanda ja bapili-pili orang.

¹²Kalu tu orang-orang Yahudi, dorang itu so ada tu atoran-atoran di kitab Taurat, jadi kalu dorang langgar tu atoran itu, dorang itu so beking dosa kong Tuhan mo hukum pa dorang. Trus kalu tu orang-orang bukang Yahudi, biar dorang nyanda ada tu atoran-atoran itu, Tuhan Allah tetap anggap dorang itu berdosa kalu dorang beking sala, kong Tuhan Allah lei mo hukum lei pa dorang sampe tapisa deng Dia for slama-lamanya.

¹³Soalnya orang-orang yang butul di muka pa Tuhan Allah, bukang orang-orang yang cuma badengar tu atoran-atoran di kitab Taurat, mar yang da iko tu atoran-atoran itu.

¹⁴Orang-orang bukang Yahudi, dorang itu nintau tu atoran-atoran di kitab Taurat. Mar kalu dorang beking tu bae yang sama deng atoran-atoran di kitab Taurat, itu lantaran pa dorang pe hati so tau mana tu butul deng mana tu sala, biar dorang blum perna tau tu atoran-atoran di kitab Taurat itu.

¹⁵Dorang pe kalakuan yang bae itu no se tunjung kalu pa dorang pe hati sama deng so ada tu atoran-atoran di kitab Taurat. Pa dorang pe hati, dorang tau apa tu sala deng apa tu butul. Jadi laengkali, pa dorang pe hati dorang kase sala dorang pe diri sandiri, laengkali komang pa dorang pe hati dorang anggap dorang pe diri butul.

¹⁶Kong kalu so hari Kiamat, Tuhan Allah mo kase kuasa pa Kristus Yesus tu mo adili pa manusia iko tu dorang da beking, sampe tu hal-hal yang manusia nintau. Kong tu mo jadi di hari kiamat itu, kita so ja bilang waktu kita ja kase tau tu Kabar Bae.

¹⁷Torang tu orang-orang Yahudi, torang ini tu orang-orang yang Tuhan Allah da pili pertama jadi De pe orang-orang, deng yang Tuhan Allah da kase akang tu atoran-atoran di kitab Taurat. So itu ada di antara pa torang yang cuma baharap trus tu atoran-atoran di kitab Taurat deng ada yang babasombong lantaran pikir dorang ada hubungan dekat deng Tuhan.

¹⁸Kong torang tu orang-orang Yahudi, torang tau tu Tuhan pe mau yang musti torang beking. Torang lei tau mana yang butul yang torang musti beking lantaran torang so blajar dari tu atoran-atoran yang ada di kitab Taurat.

¹⁹Deng ada lei dari antara pa torang orang Yahudi yang yakin skali kalu dorang so bole ja se ajar pa orang tentang tu ajaran yang butul, sama deng orang yang se tunjung jalang pa orang buta, kong sama lei deng orang yang kase trang pa samua orang yang hidop di glap.

²⁰Trus ada lei di antara pa torang orang Yahudi yang anggap kalu dorang so bole se ajar pa orang yang blum tau tu butul. Dorang pikir dorang so bole jadi guru pa orang yang blum tau atoran sama tu anak kacili yang blum tau atoran. Dorang pikir dorang so banya tau tentang tu pengetahuan deng tu ajaran yang butul dari tu atoran-atoran di kitab Taurat.

²¹Jadi kalu torang ja se ajar tu butul pa orang laeng, no kiapa dang ada di antara pa torang orang Yahudi sandiri yang nyanda blajar dari apa yang torang ja se ajar itu? Torang kase ajar, ‘jang bapancuri’, no kiapa dang ada di antara pa torang orang Yahudi yang bapancuri?

²²Kong torang ja se ajar ‘jang bersina’, no kiapa dang di antara pa torang orang Yahudi ada yang bersina? Kong torang bilang torang orang Yahudi binci pa opo-opo, no kiapa dang ada di antara pa torang yang pancuri tu barang-barang di tampa yang ja basemba akang opo-opo?

²³Torang bangga lantaran torang so ada tu atoran-atoran di kitab Taurat, mar kiapa dang ada di antara pa torang yang beking besae tu Tuhan Allah pe nama deng cara langgar tu atoran-atoran di kitab Taurat itu?

²⁴Waktu torang tu orang Yahudi nyanda iko tu atoran-atoran di kitab Taurat, torang jadi sama deng tu da tulis di Kitab Suci yang bagini, “So lantaran orang-orang Yahudi nyanda butul-butul iko pa Tuhan Allah, itu yang beking bangsa-bangsa laeng yang bukang Yahudi bahojat Dia pe nama.”

²⁵Torang orang dari bangsa Yahudi, torang dapa sunat for jadi tanda kalu torang ini yang Tuhan da pili jadi Dia pe orang. Kalu torang iko tu atoran-atoran di kitab Taurat, tu sunat itu ada de pe arti kalu torang ini butul-butul Tuhan punya. Mar kalu torang nyanda ja iko tu atoran-atoran di kitab Taurat, tu sunat itu jadi nyanda ada de pe arti, torang sama jo deng orang yang nyanda kanal pa Tuhan.

²⁶Kong kalu orang-orang bukang Yahudi iko tu atoran-atoran di kitab Taurat, biar dorang nyanda sunat, Tuhan trima pa dorang jadi Dia pe orang.

²⁷Jadi kalu tu orang-orang yang bukang Yahudi iko tu atoran-atoran di kitab Taurat, dorang itu se tunjung kalu torang tu orang-orang dari bangsa Yahudi itu sala. Soalnya torang tu ada atoran-atoran yang so tatulis itu deng lei torang so sunat, malatare torang tu da langgar tu atoran-atoran di kitab Taurat.

²⁸Soalnya orang Yahudi yang butul Tuhan Allah pe orang, bukang cuma orang Yahudi lantaran da lahir dari de pe orang tua yang orang Yahudi, deng bukang cuma lantaran dapa sunat.

²⁹Mar orang Yahudi yang butul-butul Tuhan Allah pe orang, tu orang yang dapa sunat bukang lantaran cuma mo iko tu atoran-atoran di kitab Taurat, mar lantaran dia so kase tu dia pe diri pa Tuhan kong Tuhan pe Roh bakarja pa dia pe dalam hati sampe dia pe hidop bruba. Dia itu mo dapa puji bukang dari manusia mar dari Tuhan Allah.