Read Malay, Manado Roma 5 Bible Online

Roma 5 - Malay, Manado bible

Roma 5

¹Tuhan Allah so beking torang jadi butul di muka pa Dia lantaran torang so percaya pa Yesus Kristus. So itu, torang pe hubungan deng Dia so jadi bagus ulang lantaran Yesus Kristus tu torang pe Tuhan da beking di kayu salib.

²So lantaran tu Yesus da beking itu, torang bole dapa jalang kong bole rasa tu Tuhan Allah pe sayang yang Dia so se tunjung pa torang yang so percaya. Kong torang bole rasa snang lantaran torang baharap deng yakin kalu nanti torang mo sama-sama deng Tuhan Allah mo dapa puji deng hormat.

³Mar bukang cuma itu, torang rasa snang lei waktu torang dapa siksa dari orang lantaran torang da iko pa Tuhan. Soalnya torang tau tu siksa itu beking torang lebe batahang percaya.

⁴Kong kalu torang lebe batahang percaya, itu beking torang jadi lebe kuat sampe nyanda tagoda beking dosa. Trus kalu torang jadi lebe kuat sampe nyanda tagoda beking dosa, itu beking torang bole lebe baharap deng yakin pa Tuhan.

⁵Kong kalu torang baharap deng yakin pa Tuhan, torang nyanda mo kecewa lantaran torang tau bagimana Tuhan Allah pe sayang pa torang. Tuhan Allah so kase Roh Kudus bakarja pa torang pe hati supaya torang bole rasa tu Dia pe sayang yang basar itu.

⁶Bagini tu Tuhan Allah pe sayang: waktu torang nyanda mampu beking apa-apa supaya torang bole bebas dari hukuman dosa, Kristus mati for torang yang hidop jao dari pa Tuhan Allah, Dia mati pas de pe waktu yang Tuhan Allah so tentukan.

⁷Soalnya kalu cuma mo iko torang pe biasa, nyanda ada orang yang suka mo mati for dia pe tamang yang da hidop ja beking butul, mar ada stou orang yang suka mo mati for de pe tamang kalu de pe tamang itu bae-bae.

⁸Mar Tuhan Allah se tunjung De pe sayang pa torang waktu torang masi berdosa. Soalnya waktu torang masi berdosa, Kristus mati for torang.

⁹Jadi Tuhan so beking torang jadi orang yang butul di muka pa Dia lantaran Tuhan Yesus pe dara yang tacura waktu Dia mati for torang. So itu skarang torang yakin kalu torang pasti mo slamat dari Tuhan Allah pe hukuman.

¹⁰Soalnya hele waktu torang masi pangmalawang pa Tuhan Allah, Tuhan Allah sandiri yang beking bagus torang pe hubungan deng Dia deng cara Dia kase De pe Anak mati for torang, no apa lei skarang. Torang pe hubungan deng Dia so bagus ulang, pasti torang mo slamat lantaran De pe Anak so hidop ulang.

¹¹Deng bukang cuma dapa slamat, torang lei snang lantaran torang pe Tuhan Yesus Kristus sampe torang pe hubungan deng Tuhan Allah so jadi bagus ulang.

¹²Dosa mulai ada di dunia waktu Adam beking dosa, kong dia musti mati. Trus dari tu Adam pe dosa ini, samua orang jadi berdosa. Kong de pe laste, samua orang musti mati.

¹³Dosa so ada di dunia ini seblum Tuhan Allah kase tu atoran-atoran di kitab Taurat. Jadi kalu manusia beking dosa, itu blum tarekeng dosa lantaran blum ada atoran-atoran yang dorang langgar.

¹⁴Mar biar bagitu, dari Adam pe jaman sampe Musa pe jaman, samua orang pasti mati, biar lei tu orang-orang nyanda langgar Tuhan pe prenta sama deng tu Adam da beking. Adam deng Yesus ada de pe sama, dua-dua pe hidop da beking sesuatu yang kase pengaru pa orang-orang.

¹⁵Mar tu hasil dari apa yang Adam da beking deng yang Yesus da beking itu baku beda skali. Adam sandiri tu da langgar tu Tuhan pe prenta, de pe akibat samua orang mo mati. Mar tu Tuhan Allah da beking lewat Yesus Kristus jao lebe basar dari itu, Tuhan Allah da kase tunjung tu Dia pe bae deng Dia se tunjung tu De pe sayang deng cuma-cuma supaya samua orang yang percaya bole mo slamat dari tu hukuman dosa.

¹⁶Kong tu sayang yang Tuhan Allah da kase tunjung pa samua orang deng cuma-cuma itu jao lebe basar dari tu pelanggaran yang Adam da beking. Soalnya abis Adam langgar tu Tuhan pe prenta, Tuhan hukum pa dia. Mar serta samua orang so banya beking dosa, Tuhan kase tunjung Dia pe sayang pa samua orang, kong Dia pe sayang itu beking orang bole jadi butul di muka pa Dia.

¹⁷Soalnya Adam tu da langgar Tuhan pe prenta, itu beking samua orang mo mati. Mar yang Yesus Kristus da beking jao lebe basar. Orang-orang yang percaya pa Yesus Kristus, dorang itu mo hidop slama-lamanya deng Dia kong mo pegang prenta sama-sama deng Dia. Dorang dapa itu sama deng da dapa hadia cuma-cuma dari Tuhan lantaran Tuhan pe sayang pa dorang yang pe basar, kong Dia beking lei dorang itu jadi butul di muka pa Dia lantaran dorang so ada hubungan deng Yesus Kristus.

¹⁸Jadi lantaran Adam da langgar tu Tuhan pe prenta, itu beking samua orang dapa hukuman. Mar lantaran Yesus da beking yang butul, Dia buka jalang for samua orang supaya Tuhan beking dorang jadi butul di muka pa Tuhan kong dorang bole dapa hidop kekal.

¹⁹Soalnya lantaran Adam nyanda dengar-dengaran pa Tuhan Allah pe prenta, dia beking banya orang jadi berdosa. Mar lantaran Yesus sandiri yang dengar-dengaran pa Tuhan Allah, Dia beking banya orang bole jadi butul di muka pa Tuhan Allah.

²⁰Tuhan Allah kase tu atoran-atoran di kitab Taurat supaya manusia sadar kalu manusia pe dosa so lebe banya. Mar biar manusia pe dosa lebe banya, Tuhan Allah pe sayang lei pa manusia lebe tatamba banya.

²¹Jadi, dulu tu dosa da kuasai samua orang sampe dorang dapa hukuman tapisa deng Tuhan. Mar skarang Tuhan Allah se tunjung tu De pe sayang for mo kuasai pa torang yang percaya pa Yesus Kristus tu torang pe Tuhan, kong Tuhan Allah pe sayang itu beking torang jadi butul di muka pa Dia deng torang mo dapa hidop kekal deng Dia.