Read Malay, Manado Roma 6 Bible Online

Roma 6 - Malay, Manado bible

Roma 6

¹Tuhan sayang pa torang, Dia so se ampung tu torang pe dosa-dosa, mar jang sampe ada orang yang babilang bagini, “Kalu bagitu, torang beking dosa jo trus supaya Tuhan lebe se tunjung De pe sayang itu pa torang.”

²Tantu nyanda bagitu to? Soalnya waktu torang jadi percaya pa Kristus torang so putus hubungan deng dosa, torang itu sama deng orang yang so mati tu so nyanda ja beking dosa, jadi torang so nimbole trus-trus beking dosa lei.

³Ngoni tantu tau, torang dapa baptis, itu tanda kalu orang so percaya pa Kristus Yesus, itu sama deng torang pe hidop lama so mati sama-sama deng Dia.

⁴Jadi waktu torang dapa baptis, torang bole bilang kalu torang so kase tinggal tu hidop yang cuma iko torang pe mau sandiri kong cuma beking Kristus Yesus pe mau, itu sama deng torang so mati kong dapa kubur sama-sama deng Kristus. Deng bagitu torang yang so dapa baptis, torang pe kalakuan so bruba lantaran torang so hidop baru sama-sama deng Kristus yang hidop ulang lewat kuasa dari Tuhan Allah tu Bapa.

⁵Jadi kalu torang sama deng so mati sama-sama deng Kristus, torang lei mo hidop ulang sama deng Dia.

⁶Torang tau to, kalu torang pe hidop lama yang suka beking dosa so mati sama-sama deng Kristus di kayu salib, supaya torang so nyanda iko lei tu torang pe mau yang basar for beking dosa. Deng bagitu, dosa so nyanda lei kuasai pa torang.

⁷Soalnya torang itu sama deng orang yang so mati, jadi torang ini so bebas dari tu keinginan yang ja beking dosa lei.

⁸Jadi kalu torang itu sama deng so mati sama-sama deng Kristus, torang lei percaya kalu torang mo hidop sama-sama deng Dia.

⁹Torang bole percaya rupa itu lantaran torang tau kalu Kristus so hidop ulang, Dia so nyanda mo mati lei, kong nyanda ada satu kuasa lei yang bole beking Dia mati.

¹⁰Dia so mati for se kala tu kuasa dosa, kong Dia mati cuma satu kali for slama-lamanya. Kong skarang Dia so hidop ulang, Dia hidop supaya Tuhan Allah dapa puji.

¹¹Bagitu lei ngoni, ngoni bapikir jo kalu ngoni itu sama deng orang yang so putus hubungan deng dosa, kong skarang ngoni hidop for Tuhan Allah lantaran ngoni so percaya pa Kristus.

¹²So itu, ngoni jang kase biar dosa kuasai lei ngoni pe badan di dunia ini supaya ngoni jang iko tu keinginan yang jaha.

¹³Jang kase biar tu ngoni pe anggota badan itu dosa kuasai for beking tu jaha, mar srahkan jo tu ngoni pe diri pa Tuhan Allah for beking Dia pe mau, lantaran ngoni sama deng so mati kong skarang Dia so kase hidop baru. Ngoni kase biar jo tu ngoni pe anggota badan Tuhan pake for beking tu butul.

¹⁴Ngoni dapa slamat bukang lantaran da iko tu atoran-atoran di kitab Taurat, mar lantaran Tuhan da se tunjung tu Dia pe sayang pa ngoni, so itu tu dosa so nimbole mo kuasai lei pa ngoni.

¹⁵Tuhan Allah so kase slamat pa torang dari hukuman dosa, bukang lantaran torang da iko tu atoran-atoran di kitab Taurat mar lantaran Dia pe sayang pa torang. Jadi apa skarang torang bole mo beking trus-trus tu dosa? Tantu nyanda to?

¹⁶Ngoni tau kalu ngoni srahkan ngoni pe diri pa satu orang for iko apa tu dia ja suru, ngoni itu so jadi dia pe budak. Bagitu lei kalu ngoni ja iko tu ngoni pe keinginan yang jaha, de pe arti ngoni itu so jadi budak dari dosa kong ngoni mo dapa hukuman tapisa deng Tuhan slama-lamanya. Mar kalu ngoni dengar-dengaran pa Tuhan, ngoni so kase ngoni pe diri jadi Dia pe budak kong Dia beking ngoni jadi butul di muka pa Dia.

¹⁷Dulu waktu ngoni blum percaya pa Tuhan, ngoni itu sama jo deng budak dari dosa. Mar skarang serta ngoni so percaya, ngoni so butul-butul iko tu ajaran yang torang so se ajar pa ngoni. So itu, torang bilang makase pa Tuhan Allah.

¹⁸Jadi, ngoni so bebas dari kuasa dosa kong skarang ngoni so srahkan ngoni pe diri jadi Tuhan pe budak for beking trus tu butul.

¹⁹Kita pake conto budak supaya gampang for ngoni sbagai manusia yang ada kelemahan mo mangarti. Dulu ngoni budak dari dosa lantaran ngoni so iko tu hal-hal caparuni deng tu hal-hal yang malawang Tuhan pe prenta sampe ngoni tamba trus beking tu hal-hal yang malawang Tuhan pe prenta itu. Mar skarang ngoni musti srahkan tu ngoni pe anggota-anggota badan itu for beking trus tu butul di muka pa Tuhan supaya ngoni bole hidop deng hati yang bersi di muka pa Dia.

²⁰Waktu ngoni jadi budak dosa, ngoni nyanda perlu beking tu butul.

²¹Mar apa de pe untung yang ngoni dapa dari tu dosa yang ngoni ja beking? Nyanda ada to? Malatare ngoni jadi malo deng tu ngoni ja beking itu. Deng samua dosa beking orang mati tapisa deng Tuhan for slama-lamanya.

²²Skarang ini ngoni so bebas dari kuasa dosa, kong ngoni so srahkan ngoni pe diri jadi Tuhan Allah pe budak. Ngoni pe untung, Tuhan beking ngoni bole hidop deng hati bersi di muka pa Dia, kong de pe laste ngoni mo dapa hidop kekal deng Dia.

²³Soalnya orang yang ja beking dosa, de pe akibat dapa hukuman tapisa deng Tuhan for slama-lamanya, mar Tuhan Allah kase deng cuma-cuma tu hidop kekal pa orang-orang yang percaya pa Kristus, tu torang pe Tuhan.