Read Malay, Manado Roma 9 Bible Online

Roma 9 - Malay, Manado bible

Roma 9

¹Sudara-sudara, kita so percaya pa Kristus, jadi kita mo bicara deng sunggu-sunggu pa ngoni, kita nyanda badusta. Kita pe suara hati yang Roh Kudus da kuasai yang bantu pa kita mo bilang tu butul.

²Bagini kwa tu kita mo bilang: bukang main kita pe sedi deng saki hati lantaran kita pe sudara-sudara orang Yahudi nimau mo percaya pa Yesus.

³Dorang itu kita pe sudara satu bangsa, kita suka skali dorang dapa slamat dari tu hukuman dosa. Jadi kalu kwa bole, kita yang ganti akang pa dorang for dapa hukuman deng lei tapisa dari Yesus Kristus.

⁴Dorang itu Israel pe keturunan, Tuhan Allah so angka pa dorang dari dulu for jadi Dia pe anak-anak. Deng lei Tuhan so se tunjung tu Dia pe kuasa yang luar biasa pa dorang pe nene moyang. Tuhan beking perjanjian deng dorang pe nene moyang yang beking dorang itu jadi Dia pe orang-orang. Tuhan so kase tu atoran-atoran di kitab Taurat pa dorang deng se tunjung tu cara basemba pa Dia. Dia kase lei banya janji pa dorang pe nene moyang.

⁵Dorang itu lei no tu keturunan dari torang pe nene moyang Abraham, Ishak deng Yakub, deng dari keturunan ini lei da lahir Yesus Kristus tu Raja yang se slamat pa manusia. Kristus itu, tu Tuhan Allah yang Dia pe kuasa lebe basar dari samua, Dia yang musti dapa puji sampe slama-lamanya. Amin.

⁶Memang banya orang Yahudi yang nimau percaya pa Yesus Kristus, mar biar bagitu kita nyanda ada maksut mo bilang kalu tu Tuhan Allah pe janji-janji dulu pa dorang tu Israel pe keturunan itu so nyanda mo berlaku lei. Mar tu kita pe maksut nyanda samua yang lahir dari tu Israel pe keturunan yang jadi Tuhan pe orang-orang.

⁷Deng lei, nyanda samua tu Abraham pe keturunan yang Tuhan Allah anggap De pe orang tu mo dapa tu De pe janji. Soalnya Tuhan Allah da bilang bagini pa Abraham, “Cuma ngana pe anak Ishak pe keturunan yang mo jadi ngana pe keturunan tu mo dapa Kita pe janji.”

⁸Itu de pe arti, bukang samua tu Abraham pe keturunan yang Tuhan Allah anggap Tuhan Allah pe anak-anak, mar cuma orang-orang yang percaya tu janji yang Tuhan Allah kase pa dorang yang Tuhan Allah anggap De pe anak-anak.

⁹Tuhan Allah da bajanji pa Abraham bagini, “Satu taong lei Kita mo datang ulang kamari, kong waktu itu Sara mo se lahir anak laki-laki.” Deng bagitu, Abraham tau Ishak yang dapa Tuhan Allah pe janji.

¹⁰Bagitu lei deng tu Tuhan da beking pa Ribka pe anak-anak. Ribka da se lahir dua anak laki-laki kembar. Tu dorang pe papa itu no tu Ishak tu torang pe nene moyang.

¹¹Waktu tu dua anak itu blum lahir, Tuhan Allah so bilang bagini pa Ribka, “Ngana pe anak bungsu yang nanti mo baprenta pa de pe kaka.” Waktu itu, tu dua anak itu blum tau mo beking tu bae ato tu jaha, Tuhan Allah da pili bukang iko apa tu dorang dua da beking mar iko Dia pe mau.

¹³Tentang Yakub deng Esau itu, da tulis di Kitab Suci bagini: “Yakub Kita sayang, mar Esau Kita binci”.

¹⁴No kalu bagitu apa torang mo bilang kalu Tuhan Allah itu nyanda adil lantaran Dia da pili orang iko De pe mau? Nyanda to.

¹⁵Tuhan so perna bilang pa Nabi Musa bagini: “Kita sandiri yang pili pa sapa jo yang Kita mo kase tunjung Kita pe rasa kasiang. Deng Kita mo kase tunjung Kita pe rasa sayang pa sapa jo yang Kita suka mo kase tunjung tu Kita pe rasa sayang itu.”

¹⁶Jadi Tuhan Allah da pili orang nyanda ja iko tu orang itu pe mau ato apa tu orang itu ja beking, mar Tuhan Allah da pili orang iko tu Dia pe mau lantaran Dia suka kase tunjung De pe rasa kasiang pa orang-orang.

¹⁷Di Kitab Suci da tulis tentang apa yang Tuhan Allah da bilang pa raja Mesir, bagini, “Kita da angka pa ngana jadi raja ada de pe maksut. De pe maksut supaya waktu ngana malawang pa Kita, Kita mo kase tunjung Kita pe kuasa for malawang pa ngana, sampe samua yang ada di bumi ini puji Kita pe nama.”

¹⁸Jadi, Tuhan Allah kase tunjung Dia pe rasa sayang pa sapa jo yang Dia suka, deng Dia lei mo beking orang jadi kras hati pa sapa jo yang Dia suka itu mo jadi.

¹⁹Mar komang jang sampe ada orang bilang, “Kalu samua tu da jadi iko Tuhan pe mau, no kiapa dang Tuhan masi kase sala pa torang kalu torang beking dosa? Sapa yang bole mo lawang tu Dia pe mau?”

²⁰Sapa so torang kong brani mo malawang pa Tuhan Allah? Tuhan tu da ciptakan pa torang, kong masa torang mo babilang pa Dia, “Kiapa Tuhan ciptakan bagini pa kita?”

²¹De pe conto sama deng tukang babeking pot dari tana liat. Tu satu loku tana liat, dia bole beking dua macam pot, dua-dua iko dia pe mau. Tu pot yang satu dia beking for pake di acara-acara yang penting, kong tu pot yang satu lei dia beking for mo pake hari-hari.

²²Bagitu lei no deng Tuhan Allah, Dia pe hak beking pa torang iko Dia pe mau. Dia mara pa orang yang beking dosa deng kase tunjung kalu Dia pegang kuasa for mo bahukum. Mar Dia lei sabar skali pa dorang sampe nyanda jadi hukum pa dorang, biar dorang itu pantas for Dia mara kong hukum, kong biar lei dorang itu so se siap for se binasa.

²³Tuhan Allah lei mo se tunjung Dia pe sayang yang luar biasa pa orang-orang yang Dia rasa kasiang. Tu orang-orang yang Dia so se sadia dari pertama for mo alami tu De pe luar biasa.

²⁴Tu orang-orang itu, torang samua bukang cuma orang Yahudi, mar lei deng tu orang-orang bukang Yahudi.

²⁵Tentang tu orang-orang bukang Yahudi, nabi Hosea tulis tu Tuhan Allah da bilang bagini, “Orang-orang yang blum jadi Kita pe orang-orang, nanti Kita mo pangge jadi Kita pe orang-orang. Bangsa yang dulu Kita nyanda sayang, nanti mo jadi bangsa yang Kita sayang.”

²⁶“Di tampa yang Kita mo bilang pa dorang, ‘Ngoni ini bukang Kita pe orang,’ Di tampa itu Kita mo bilang bagini pa dorang, ‘Ngoni itu Tuhan Allah yang hidop pe anak-anak.’ ”

²⁷Mar tentang tu orang Israel, nabi Yesaya so bicara kras bagini, “Biar orang Israel pe keturunan jadi banya skali sama deng paser di laut, mar nanti cuma sadiki yang mo dapa slamat dari hukuman dosa.

²⁸Soalnya so nyanda lama lei Tuhan pasti mo kase hukuman pa orang-orang di dunia ini. Dia mo kase hukuman deng tegas deng nyanda mo tunda-tunda.”

²⁹Nabi Yesaya lei so perna bilang bagini tentang dorang, “Tuhan yang Mahakuasa da kase biar hidop bebrapa orang dari torang pe keturunan. Kalu nyanda bagitu, torang samua so abis da dapa hukuman, sama deng tu da jadi pa orang-orang di Sodom deng Gomora dulu.”

³⁰Jadi kalu bagitu, torang bole bilang bagini, “Tu orang-orang yang bukang Yahudi, dorang nyanda brusaha for mo jadi butul di muka pa Tuhan, mar Tuhan beking dorang itu jadi orang yang butul di muka pa Dia lantaran dorang percaya.

³¹Mar laeng deng tu orang-orang Israel. Dorang brusaha iko tu atoran-atoran di Kitab Taurat supaya dorang bole jadi orang yang butul di muka pa Tuhan, mar dorang nyanda mampu beking itu.”

³²No kiapa dang sampe orang Yahudi jadi bagitu? Soalnya tu orang-orang Yahudi brusaha jadi orang yang butul di muka pa Tuhan deng cara iko tu atoran-atoran di Kitab Taurat, bukang deng percaya pa Tuhan. Itu sama deng orang da tasontong di batu kong jatung.

³³Kong dorang yang nyanda percaya, itu sama deng tu da tulis di Kitab Suci, “Tarukira jo bae-bae, Kita so taru pa Dia di gunung Sion. Dia itu bole mo se sama deng satu batu, kong kalu orang nyanda percaya pa Dia, orang itu sama deng da tasontong di batu itu kong jatung. Mar sapa yang percaya pa Dia, orang itu nyanda mo malo.”