Read Malay, Manado 1 Korintus 1 Bible Online

1 Korintus 1 - Malay, Manado bible

1 Korintus 1

¹Ni surat dari kita, Paulus. Tuhan Allah so pangge pa kita jadi rasul tu Kristus Yesus pe utusan iko Dia pe mau. Ni surat lei dari Sostenes tu torang pe sudara yang percaya.

²Surat ini for ngoni tu Tuhan Allah pe jemaat yang ada di Korintus. Ngoni so percaya pa Kristus Yesus, Dia so beking ngoni jadi kudus. Tuhan Allah so pangge pa ngoni for jadi Dia pe orang-orang sama-sama deng samua orang percaya di samua tampa. Ngoni samua itu yang ja semba pa Yesus Kristus tu torang samua pe Tuhan yang torang samua ja iko akang.

³Kita minta pa torang pe Allah Bapa deng Tuhan Yesus Kristus for kase tunjung tu bae pa ngoni deng beking ngoni hidop deng hati tenang.

⁴Kita slalu bilang makase pa Tuhan Allah yang kita ja semba lantaran ngoni. Soalnya Dia so se tunjung tu Dia pe bae pa ngoni lewat Kristus Yesus.

⁵Soalnya lewat ngoni pe percaya pa Kristus, ngoni jadi kaya di samua hal rupa ini: Dia beking ngoni mampu babicara deng lei mampu mangarti banya hal.

⁶Itu jadi bukti yang kase kuat kalu tu kesaksian tentang Kristus yang dulu torang da bilang pa ngoni itu memang butul.

⁷Ngoni so trima samua karunia dari Roh Kudus, jadi ngoni nyanda kurang karunia apa-apa samantara ngoni batunggu-tunggu tu torang pe Tuhan Yesus Kristus datang ulang.

⁸Dia lei no yang mo se kuat pa ngoni slama ngoni hidop supaya nanti waktu Dia datang ulang, Dia dapa pa ngoni nyanda ada sala apa-apa.

⁹Tuhan Allah mo beking samua itu lantaran Dia setia. Dia tu da pangge pa ngoni supaya ngoni bole ada hubungan dekat deng Dia pe Anak Yesus Kristus, tu torang samua pe Tuhan yang torang ja iko akang.

¹⁰Sudara-sudara, kita se nasehat pa ngoni atas nama torang pe Tuhan Yesus Kristus, supaya ngoni samua satu pendapat, nimbole tapisa-pisa, malatare ngoni musti tetap satu pikiran deng satu tujuan.

¹¹Kita bilang bagitu pa ngoni sudara-sudara, lantaran ada orang-orang dari Kloe pe ruma tu da kase tau pa kita tentang ngoni. Dorang bilang kalu di antara pa ngoni ada tu da baku ambe pendapat.

¹²Tu kita pe maksut bagini: ada dari pa ngoni yang da babilang, “Kita ja iko pa Paulus.” Ada yang laeng babilang, “Kita ja iko pa Apolos.” Tu laeng lei babilang, “Kita ja iko pa Petrus.” Kong ada lei yang babilang, “Kita ja iko pa Kristus.”

¹³No kalu ngoni bicara bagitu, itu sama jo deng Kristus da taberbage, butul to? Padahal sebenarnya nyanda. Deng lei tentang kita ini Paulus, apa kita da mati di kayu salib for ngoni? Nyanda to? Kong waktu ngoni da dapa baptis, apa ngoni da dapa baptis pake kita pe nama? Nyanda lei to?

¹⁴Kita bilang makase pa Tuhan lantaran dari pa ngoni, kita cuma da baptis pa Krispus deng Gayus.

¹⁵Jadi nyanda ada orang yang mo babilang kalu dia itu ja iko pa kita lantaran dia da dapa baptis pake kita pe nama.

¹⁶Oh iyo kote, kita lei da baptis pa Stefanus deng tu orang-orang pa dia pe ruma. Mar selain dari pa dorang itu, kita nyanda inga apa ada orang laeng lei yang kita da baptis.

¹⁷Soalnya Kristus da utus pa kita bukang for babaptis orang mar for se tau pa orang-orang tu Kabar Bae tentang Dia. Kita dapa utus se tau tu Kabar Bae itu bukang pake tu kita pe pande ja babicara, lantaran kalu bagitu nanti orang-orang cuma iko tu kita pe pande itu, itu sama jo deng tu Kristus pe kematian di kayu salib nyanda ada de pe guna.

¹⁸Ada yang bapikir kalu tu brita tentang Yesus da mati di kayu salib, itu brita yang nyanda ada de pe arti apa-apa. Dorang itu no tu mo binasa. Mar for torang yang dapa slamat, torang tau kalu lewat tu brita tentang Yesus itu, Tuhan Allah se tunjung tu Dia pe kuasa lantaran kalu orang percaya tu brita itu, dia pasti mo slamat.

¹⁹Soalnya di Kitab Suci da tulis bagini, “Pa tu orang yang tau banya hal, Kita mo se ilang apa yang dia tau itu. Kong pa tu orang yang pande, Kita mo beking tu dia pe pande itu so nyanda ada lei.”

²⁰No bagimana skarang deng tu orang yang tau banya hal? Bagimana deng ahli-ahli Taurat deng lei tu orang-orang yang pande baku ambe pendapat di jaman skarang ini? Samua yang dorang tau itu pengetahuan yang dari ni dunia, kong Tuhan Allah so beking tu samua itu jadi nyanda ada arti apa-apa.

²¹Soalnya biar bagimana lei manusia pe hikmat, manusia nyanda mampu mo kanal pa Tuhan Allah cuma pake tu dong pe hikmat sandiri. Kong memang Tuhan Allah yang so putuskan bagitu, lantaran Tuhan Allah itu tau samua hal. Yang Dia suka itu, se slamat pa manusia yang percaya deng tu brita tentang Yesus yang torang da se tau, biar lei orang-orang di dunia ja anggap kalu tu brita tentang Yesus itu nyanda ada de pe guna.

²²Biasanya orang-orang Yahudi minta se tunjung tanda-tanda ajaib lebe dulu, deng lei biasanya tu orang-orang Yunani cari tau pake manusia pe hikmat.

²³Mar torang, torang ja se tau tentang Kristus yang mati di kayu salib. Tu brita itu for orang-orang Yahudi, itu sama deng jadi batu sandungan for dorang. Kong for tu orang-orang yang bukang Yahudi, dorang anggap tu brita itu nyanda ada de pe arti.

²⁴Mar tu orang-orang yang Tuhan da pangge for iko pa Dia, dorang itu orang-orang Yahudi deng lei tu orang-orang yang bukang Yahudi. Kong for dorang samua itu, Kristus itu no yang se tunjung tu Tuhan Allah pe kuasa deng Tuhan Allah pe hikmat.

²⁵Biar manusia pikir yang Tuhan da beking itu nyanda ada de pe guna, mar tu Tuhan Allah da beking itu jao lebe basar de pe hikmat dari apa yang manusia pikir itu. Kong biar lei manusia pikir kalu tu Tuhan Allah da beking itu nyanda ada kuasa, mar tu Dia da beking itu lebe basar de pe kuasa dari yang manusia bole beking.

²⁶Sudara-sudara, co ngoni inga bagimana tu ngoni pe keadaan waktu Tuhan da pangge pa ngoni iko pa Dia. Waktu itu, menurut orang-orang di dunia ini, cuma sadiki tu dari pa ngoni yang ada hikmat, cuma sadiki tu ada posisi penting deng lei cuma sadiki tu dari kluarga penting.

²⁷Mar apa tu dunia ja anggap nyanda ada de pe guna, itu yang Tuhan Allah pili for beking malo tu orang-orang yang dunia ja anggap ada hikmat. Kong apa tu dunia ja anggap nyanda berkuasa, itu yang Tuhan Allah pake for beking malo tu orang-orang yang dunia ja anggap berkuasa.

²⁸Tuhan Allah lei pili tu orang-orang yang dunia ja anggap nyanda penting, hina deng lei nyanda ada guna. Dia pili pa dorang for beking tu orang-orang yang dunia ja anggap penting mo jadi nyanda ada arti apa-apa.

²⁹Tuhan beking bagitu supaya nyanda ada manusia yang mo basombong de pe diri di muka pa Tuhan Allah.

³⁰Soalnya Tuhan Allah yang da buka jalang supaya torang bole hidop satu deng Kristus Yesus. Torang bole tau tu Tuhan Allah pe hikmat lewat Kristus Yesus. Yesus itu yang beking torang jadi butul di muka pa Tuhan Allah, Yesus beking torang ini jadi Tuhan Allah pe orang-orang, kong Yesus lei yang tubus tu torang pe dosa.

³¹So lantaran itu, torang musti beking sama deng tu da tulis di Kitab Suci, “Sapa jo yang mo basombong, lebe bae dia basombong tentang apa yang Tuhan da beking for dia.”