Read Malay, Manado 1 Korintus 11 Bible Online

1 Korintus 11 - Malay, Manado bible

1 Korintus 11

¹Ngoni iko jo tu kita pe cara hidop, sama lei deng kita da iko tu Kristus pe cara hidop.

²Kita puji pa ngoni lantaran ngoni slalu ja inga tu kita pe cara hidop deng lei ngoni tetap pegang tu ajaran yang kita da se ajar pa ngoni.

³Mar kita suka ngoni tau tentang ini: yang jadi Kapala for laki-laki itu Kristus, trus yang jadi kapala for parampuang itu laki-laki, kong yang jadi Kapala for Kristus itu Tuhan Allah.

⁴Waktu da bakumpul for baibada, tiap laki-laki yang basombayang ato ja kase tau tu pesan yang Tuhan da se tau pa dia, kong waktu itu dia da pake tutu kapala, dia itu sama jo deng so beking malo pa Kristus tu de pe Kapala.

⁵Kalu tiap parampuang yang basombayang ato ja kase tau tu pesan yang Tuhan da se tau pa dia, kong waktu itu dia nyanda da pake tutu kapala, dia itu sama jo deng da beking malo pa de pe laki tu de pe kapala, dia itu lei sama deng da cukur tu de pe rambu.

⁶Soalnya kalu parampuang nimau mo tutu dia pe kapala, dia itu musti gunting se pende skali de pe rambu. Mar kalu tu parampuang gunting se pende skali ato cukur de pe rambu, itu beking malo pa dia, lebe bae dia pake tutu kapala.

⁷Soalnya tu laki-laki nyanda perlu mo pake tutu kapala, lantaran Tuhan Allah da beking pa laki-laki satu gambaran deng Dia kong orang mo puji deng hormat pa Tuhan Allah lantaran tu laki-laki itu. Trus kalu parampuang pake tutu kapala, orang mo puji deng hormat pa tu laki-laki.

⁸Soalnya dulu waktu Tuhan Allah beking manusia, Dia nyanda beking laki-laki dari tu parampuang, mar Dia beking parampuang dari tu laki-laki.

⁹Bagitu lei Tuhan da beking laki-laki bukang for parampuang, mar Tuhan beking parampuang for laki-laki.

¹⁰So itu, tu parampuang musti pake tutu kapala, itu no tu tanda wibawa pa dia, deng lei lantaran tu malaekat-malaekat ja tarukira pa dia.

¹¹Mar biar lei bagitu, for torang yang percaya pa Tuhan, nyanda ada parampuang yang nyanda perlu pa laki-laki, bagitu lei nyanda ada laki-laki yang nyanda perlu pa parampuang.

¹²Soalnya dulu Tuhan Allah beking tu parampuang dari pa laki-laki, trus serta itu komang tu laki-laki lahir dari pa parampuang, kong samua de pe asal dari pa Tuhan Allah.

¹³Co ngoni pikir bae-bae, apa pantas kalu tu parampuang nyanda pake tutu kapala waktu basombayang pa Tuhan Allah? Nyanda pantas to?

¹⁴Torang samua so tau kalu iko tong pe biasa, tu laki-laki nyanda pantas rambu panjang.

¹⁵Mar komang kalu parampuang pe rambu panjang, dia itu mo dapa puji deng dapa hormat. Soalnya tu rambu itu Tuhan da kase pa parampuang for jadi de pe tutu kapala.

¹⁶Mar kalu ada orang yang mo baku ambe tentang masala parampuang mo tutu kapala, torang se tau kalu torang deng Tuhan Allah pe jemaat-jemaat lei pe atoran rupa itu, mar tu atoran laeng dari itu nyanda ada.

¹⁷Kita mo kase tau bebrapa hal yang musti ngoni beking, mar komang kita nyanda puji pa ngoni di hal-hal ini. Soalnya kalu ngoni bakumpul for baibada, ngoni nyanda beking tu bae, malatare da beking tu besae.

¹⁸Pertama kita da dengar, kalu ngoni bakumpul for baibada, ngoni ada masala sampe ngoni tapica-pica, kong kita rasa yang kita da dengar itu ada de pe butul.

¹⁹Soalnya di antara pa ngoni memang musti ada tu tapica-pica, supaya dapa tau sapa dari antara pa ngoni yang butul-butul ja iko pa Tuhan deng yang nyanda.

²⁰Kong lei waktu ngoni bakumpul da beking perjamuan, ngoni nyanda beking itu for mo inga tu Tuhan Yesus pe kematian.

²¹Soalnya waktu beking perjamuan, ada orang yang so makang deng minum lebe dulu sampe yang laeng nyanda riki makang kong jadi lapar. Kong ada yang laeng minum sampe mabo.

²²Jadi bagimana lei itu? Apa ngoni nyanda ada ruma sandiri for makang deng minum? Ato apa ngoni mo hina pa Tuhan Allah pe jemaat deng beking malo pa tu orang-orang yang nyanda punya apa-apa? Apa dang tu kita mo bilang pa ngoni? Apa kita mo puji pa ngoni? Kalu bagitu komang, kita nyanda puji pa ngoni.

²³Kita se tau pa ngoni apa tu kita so trima dari pa Tuhan sandiri, bagini: tu malam waktu orang hianati pa Tuhan Yesus, di perjamuan itu Dia da ambe roti,

²⁴trus Dia bilang makase pa Tuhan Allah. Klar itu Dia se pela-pela tu roti deng babilang, “Ni roti Kita pe badan yang Kita srahkan for ngoni. Ngoni beking jo rupa tu torang da beking skarang ini for inga pa Kita.”

²⁵Bagitu lei waktu abis makang, Tuhan Yesus ambe tu cawan deng babilang, “Tu anggor di cawan ini, ini no tu perjanjian yang baru antara Tuhan Allah deng manusia, yang da se metrai pake Kita pe dara. Tiap kali ngoni minum di perjamuan, ngoni beking jo rupa tu torang da beking skarang ini for inga pa Kita.”

²⁶Jadi tiap kali ngoni beking perjamuan makang roti deng minum anggor di cawan, itu sama jo deng ngoni se tau ulang pa orang-orang tentang Tuhan pe kematian sampe Dia datang ulang.

²⁷So itu, kalu ada yang makang roti deng minum anggor for inga tu Tuhan pe kematian, mar dia pe kalakuan nyanda pantas waktu beking tu perjamuan itu, dia itu so berdosa lantaran dia nyanda hargai tu Tuhan Yesus pe badan deng dara.

²⁸So itu lebe bae tiap orang priksa dulu tu de pe hati sandiri kalu so siap, baru abis itu dia iko perjamuan makang tu roti deng minum tu anggor dari tu cawan.

²⁹Soalnya sapa tu da makang roti deng minum anggor, mar dia pe kalakuan nyanda pantas waktu beking tu perjamuan, dia itu nyanda da hargai tu Tuhan pe badan. So itu dia mo dapa hukuman dari pa Tuhan.

³⁰So lantaran itu no kong banya dari antara pa ngoni yang lemah, dapa saki deng ada lei yang mati.

³¹Mar kalu waktu itu torang lebe dulu priksa tu tong pe hati sandiri kalu so siap, torang nyanda mo trima tu hukuman.

³²Cuma kalu torang dapa hukuman dari Tuhan, de pe tujuan for mo se ajar pa torang beking tu butul, supaya nanti torang nyanda mo dapa hukuman kekal sama-sama deng orang-orang yang nyanda percaya tu ja iko dunia pe mau.

³³So itu kita pe sudara-sudara, kalu ngoni bakumpul for makang di perjamuan, ngoni musti baku tunggu for makang sama-sama.

³⁴Kalu ada orang yang lapar, lebe bae dia makang lebe dulu pa de pe ruma. Deng torang beking bagitu, torang pe perjamuan itu nyanda mo beking torang dapa hukum dari Tuhan. Kong tentang hal-hal yang laeng, nanti kita ator kalu kita so datang pa ngoni.