Read Malay, Manado 1 Korintus 13 Bible Online

1 Korintus 13 - Malay, Manado bible

1 Korintus 13

¹Biar lei kita bole babicara deng macam-macam bahasa yang manusia ja pake deng lei tu bahasa yang malaekat ja pake, mar kalu kita nyanda basayang pa orang laeng, tu kita da bicara pake bahasa-bahasa itu nyanda ada de pe guna, itu sama jo deng gong deng simbal yang da se babunyi sambarang.

²Kong biar lei kita ada karunia for se tau tu Tuhan pe pesan, deng biar lei kita bole mangarti banya hal yang orang laeng blum tau, deng biar lei kita tau tentang samua hal, deng biar lei kita ada iman yang kuat sampe bole kase pinda gunung, mar kalu kita nyanda basayang pa orang laeng, kita sama skali nyanda ada guna.

³Trus biar lei kita kase tu samua yang ada pa kita for orang miskin, kong biar lei kita kase kita pe diri dapa bakar jadi korban, mar kalu kita nyanda basayang pa orang laeng, samua itu nyanda ada guna for kita.

⁴Orang yang basayang itu bagini: dia pangsabar, pangbae, nyanda pangcemburu, nyanda ja angka-angka dia pe diri, deng lei dia nyanda sombong.

⁵Kong lei dia nyanda ja beking tu nyanda sopan, nyanda ja bapaksa pa orang for dia pe kepentingan diri sandiri, nyanda pangmara, deng lei dia nyanda ja basimpang tu orang laeng pe sala.

⁶Tu orang yang basayang, dia itu nyanda snang kalu orang ja beking tu nyanda butul, mar dia snang kalu orang ja beking tu butul.

⁷Tu orang yang basayang, dia lei batahang mangada samua hal, dia slalu percaya samua yang bae, dia trus baharap yang bae di samua hal, deng dia tetap sabar di samua hal.

⁸Tu sayang itu mo ada sampe slama-lamanya. Mar tu karunia for kase tau tu Tuhan pe pesan, itu nanti so nyanda mo ada lei. Kong lei tu karunia for babicara deng bahasa yang Roh Kudus da kase, itu nanti mo brenti. Bagitu lei deng tu karunia for tau samua hal, nanti itu lei mo ilang.

⁹Soalnya samua hal yang torang tau itu nyanda lengkap, deng lei torang pe kemampuan se tau Tuhan pe pesan, itu lei ada de pe batas.

¹⁰Mar nanti kalu Tuhan datang ulang kong so beking samua jadi sempurna, nanti yang nyanda sempurna itu mo ilang lei.

¹¹De pe conto bagini: waktu kita masi anak kacili, kita babicara sama deng anak kacili, kita pe cara hidop deng cara bapikir sama deng anak kacili. No skarang, serta kita so dewasa, kita se tinggal tu sifat anak kacili itu.

¹²Skarang ini, torang blum kanal butul tentang Tuhan, itu sama deng torang da balia di satu kaca yang kabur, mar nanti torang mo baku mangada langsung deng Dia kong bole lia deng jelas pa Dia. Skarang tu hal-hal tentang Tuhan itu kita blum tau samua, mar nanti kita mo tau itu deng sempurna sama deng Tuhan da kanal pa kita deng sempurna.

¹³Jadi ada tiga hal yang torang tetap beking: torang percaya pa Tuhan, torang baharap deng yakin pa Tuhan, deng lei torang basayang. Mar dari tu tiga hal itu, yang paling penting, torang basayang.