Read Malay, Manado 1 Korintus 4 Bible Online

1 Korintus 4 - Malay, Manado bible

1 Korintus 4

¹Sudara-sudara, lia jo pa torang ini sbagai Kristus pe orang karja, tu orang-orang yang Tuhan Allah da se percaya akang for se tau tu Dia pe rencana for se slamat pa manusia, tu rencana yang dulu orang blum tau.

²Kong for torang tu Tuhan pe orang-orang karja, torang musti beking bae-bae samua tu tong pe karja itu, supaya dapa lia kalu torang ini bole mo se percaya akang.

³Mar kalu ngoni hakimi pa kita ato orang bawa pa kita di pengadilan, for kita itu nyanda masala. Kita sandiri lei nyanda ja banilai tu kita pe karja.

⁴Soalnya yang kita tau, kita nyanda da beking sala apa-apa. Mar biar lei kita tau itu, bukang berarti kita ini orang yang butul, nanti Tuhan sandiri yang mo hakimi pa kita.

⁵So itu, ngoni jang bahakimi pa orang laeng seblum de pe waktu. Nanti waktu Tuhan datang ulang, itu no tu waktu for mo bahakimi. Waktu Dia datang, Dia mo se trang samua hal yang orang da se sambunyi di dalam glap, Dia mo bongkar samua tu rencana yang ada pa orang pe hati. Kong waktu itu, Tuhan Allah mo puji tiap orang yang pantas mo dapa puji.

⁶Sudara-sudara, kita tulis tentang kita deng Apolos for ngoni pe bae. Kita pake torang dua sbagai conto, supaya ngoni bole blajar dari pa torang dua kong mangarti tu arti dari yang da bilang ini, “Beking jo apa tu da tulis di Kitab Suci.” Deng ngoni beking tu da tulis itu, nyanda ada dari pa ngoni yang mo basombong kalu dia da iko pa orang tertentu, sampe anggap tu orang itu lebe penting dari tu laeng.

⁷Ngoni pikir, apa ngoni itu lebe penting dari tu orang laeng? Nyanda kasiang. Kong apa so yang ada pa ngoni tu bukang ngoni da dapa dari pa Tuhan? Pasti samua dari pa Tuhan. Ngoni so dapa samua dari pa Dia, mar ngoni basombong sama jo deng itu ngoni da dapa dari ngoni pe pande sandiri kong bukang dari pa Dia.

⁸Ngoni so dapa cukup tu ngoni pe perlu, malatare lebe dari cukup sampe ngoni so dapa banya skali tu hal-hal rohani. Ngoni lei pikir ngoni so berkuasa sama deng raja, kong torang nyanda bantu apa-apa pa ngoni for jadi sama deng raja. Mar kalu nanti ngoni memang butul-butul da jadi raja, torang bole baprenta sama-sama deng ngoni.

⁹Soalnya menurut kita, Tuhan Allah so beking torang tu rasul-rasul jadi orang yang nyanda penting, torang ini so sama deng orang yang dapa hukuman mati di muka banya orang. Kita bilang bagitu lantaran orang-orang di dunia deng lei tu malaekat-malaekat da lia-lia apa tu da jadi pa torang kong tatawa akang pa torang.

¹⁰Torang ini jadi sama deng orang biongo lantaran torang ja se tau tentang Kristus. Kong ngoni pande lantaran ngoni percaya pa Kristus. Torang ini lemah, mar ngoni kuat. Ngoni dapa hormat, mar torang ini dapa hina.

¹¹Kong sampe skarang ini, torang lapar lantaran nyanda ja cukup makang deng torang ja aus lantaran nyanda ja cukup minum, deng lei torang pe baju so robe-robe. Torang ja dapa pukul deng torang lei nyanda ada ruma for mo tinggal akang.

¹²Torang lei karja kras deng torang pe tangan sandiri for torang pe hidop. Kalu orang hina pa torang, torang balas itu deng minta akang berkat pa Tuhan for dia. Kalu orang siksa pa torang, torang sabar mangada itu.

¹³Trus kalu orang se besae torang pe nama, torang balas pa dia deng kata-kata yang bae. Orang di dunia ini so beking torang ini so sama deng sampa, deng lei sampe skarang ini orang anggap torang ini so sama deng samua yang busu.

¹⁴Kita tulis samua ini bukang for mo se malo pa ngoni, mar for mo togor pa ngoni lantaran ngoni itu sama deng kita pe anak-anak yang kita sayang.

¹⁵Soalnya kita ini yang pertama tu da se tau Kabar Bae tentang Yesus pa ngoni sampe ngoni jadi percaya pa Kristus Yesus, so itu kita ini jadi ngoni pe papa rohani. Jadi biar lei ada spulu ribu orang yang ja se ajar pa ngoni tentang Kristus, ngoni pe papa rohani cuma satu.

¹⁶So lantaran kita ini ngoni pe papa rohani, kita se nasehat pa ngoni supaya ngoni iko jo tu conto yang kita da beking.

¹⁷So itu no kita utus tu Timotius pigi pa ngoni. Dia itu kita so anggap kita pe anak sandiri deng kita sayang pa dia. Dia itu lei setia pa Tuhan. Kita da utus dia pa ngoni supaya dia bole mo se inga ulang pa ngoni tu conto kita pe cara hidop iko pa Kristus Yesus. Tu cara hidop itu yang kita so se ajar pa samua jemaat di tampa-tampa yang laeng.

¹⁸Ada bebrapa orang dari pa ngoni tu jemaat di Korintus yang bapikir kalu kita so nyanda lei mo datang ulang pa ngoni, so itu dorang so jadi sombong.

¹⁹Padahal kita mo iko datang ulang pa ngoni kalu Tuhan kase kita mo datang. Nanti waktu kita so ada, kita nyanda mo cari tau apa tu orang-orang sombong itu da bilang-bilang, mar kita mo cari tau apa dorang itu ada kuasa dari pa Tuhan ato nyanda.

²⁰Soalnya tu orang yang jadi orang-orang dari Tuhan Allah yang Berkuasa sbagai Raja, orang laeng bole dapa tau itu bukang cuma dari tu orang itu pe kata-kata, mar lantaran tu Tuhan pe kuasa yang ada pa dia.

²¹Jadi mana tu ngoni suka dang? Kalu kita datang pa ngoni kong ngoni tetap sombong, kita mo togor deng kras pa ngoni, itu sama deng kita cambok pa ngoni. Ato apa ngoni suka kalu kita datang pa ngoni trus ngoni so nyanda sombong, kong kita mo sayang deng mo babae-bae akang pa ngoni?