Read Malay, Manado 1 Korintus 7 Bible Online

1 Korintus 7 - Malay, Manado bible

1 Korintus 7

¹Sudara-sudara, ngoni tu jemaat Korintus da tanya pa kita di ngoni pe surat, apa bagus kalu tu laki-laki nyanda kaweng. Menurut kita itu memang bagus,

²mar lantaran orang-orang gampang tagoda for baseks bebas, paling bagus kalu tiap laki-laki ada bini sandiri deng tiap parampuang ada laki sandiri.

³Kong tu laki, dia musti ja beking tu dia pe kewajiban seks pa de pe bini, bagitu lei deng tu bini ja beking tu de pe kewajiban itu pa de pe laki.

⁴Tu bini, dia itu nyanda ada hak pa de pe badan sandiri, mar yang punya hak pa de pe badan itu de pe laki. Bagitu lei deng tu laki, dia itu nyanda ada hak pa de pe badan sandiri, mar yang punya hak pa de pe badan itu de pe bini.

⁵Tu laki-bini, ngoni dua nimbole ada yang batolak for beking tu kewajiban itu. Mar ngoni bole nyanda beking tu kewajiban itu for samantara waktu, kalu ngoni dua mo ambe waktu kusus for mo basombayang, itu lei asal ngoni dua so stuju. Cuma serta tu waktu for ngoni basombayang so klar, ngoni bale jo pa ngoni pe hidop sbagai laki-bini. Deng bagitu, tu setang pe bos nyanda goda pa ngoni for beking dosa lantaran ngoni nyanda mampu mo tahang tu ngoni pe nafsu.

⁶Tu kita da bilang itu bukang prenta mar cuma usulan.

⁷Mar sebenarnya kita lebe suka kalu samua orang yang blum kaweng sama jo deng kita nyanda da kaweng. Cuma katu, nyanda samua orang yang Tuhan Allah da kase karunia for hidop nyanda kaweng, lantaran pa laeng Dia kase karunia ini, kong yang laeng Dia kase karunia itu.

⁸Kita mo se nasehat pa orang-orang yang blum kaweng, lebe bae dorang nyanda usa jo kaweng, deng lei kita se nasehat pa tu janda-janda, lebe bae dorang nyanda usa jo kaweng ulang, sama deng kita nyanda da kaweng.

⁹Mar kalu dorang nyanda mampu mo tahang dong pe nafsu, lebe bae jo dorang kaweng. Soalnya lebe bagus dorang kaweng daripada nyanda kaweng mar dorang pe nafsu itu kuasai pa dorang, itu sama deng dorang tabakar deng tu dong pe nafsu sandiri.

¹⁰Kong pa orang-orang yang so kaweng kita bilang, mar bukang kita kote, Tuhan yang prenta, Dia pe prenta bagini: tu bini jang bacere dari dia pe laki.

¹¹Kalu dia bacere, dia musti tetap hidop nyanda ada laki ato tare dia baku bale ulang jo deng de pe laki. Kong tu laki lei jang se cere dia pe bini.

¹²Kong yang kita mo bilang skarang, bukang dari pa Tuhan mar dari pa kita sandiri. Ini tu kita mo bilang: kalu ada laki yang percaya pa Tuhan kong dia pe bini nyanda percaya, trus tu dia pe bini itu suka jo mo tetap hidop sama-sama deng dia, tu laki itu nimbole se cere tu dia pe bini.

¹³Bagitu lei kalu ada bini yang percaya pa Tuhan kong de pe laki nyanda percaya, trus tu dia pe laki itu suka jo mo tetap hidop sama-sama deng dia, dia itu nimbole se cere tu dia pe laki itu.

¹⁴Soalnya tu laki yang nyanda percaya itu jadi kudus lantaran dia pe bini pe percaya pa Tuhan, kong tu bini yang nyanda percaya itu jadi kudus lantaran dia pe laki pe percaya pa Tuhan. Kalu nyanda bagitu, tantu katu tu dorang pe anak-anak lei nyanda kudus, mar lantaran ada satu dari dorang pe orang tua yang percaya, dorang jadi anak-anak kudus.

¹⁵Mar kalu tu laki ato tu bini yang nyanda percaya itu bakras for mo bacere, biar jo dia bacere. Ini komang tu bini ato tu laki yang percaya itu nyanda perlu taika deng tu dong pe janji waktu da kaweng. Soalnya Tuhan Allah so pili pa ngoni for hidop deng hati yang tenang.

¹⁶Hei ngoni tu bini yang percaya, ngoni musti tau kalu nanti ngoni stou bole mo se slamat tu ngoni pe laki dari hukuman dosa deng cara bantu pa dia percaya pa Yesus. Hei ngoni tu laki yang percaya, ngoni musti tau kalu nanti ngoni stou bole mo se slamat tu ngoni pe bini dari hukuman dosa deng cara bantu pa dia percaya pa Yesus.

¹⁷Tiap orang percaya, dia itu musti hidop trus sama deng waktu Tuhan Allah pangge pa dia for iko pa Dia. Tu orang yang so percaya pa Tuhan itu nyanda usa jo mo roba tu de pe hidop yang Tuhan so kase pa dia. Ini no tu atoran yang kita so se ajar for samua jemaat.

¹⁸De pe conto bagini: kalu ada orang yang so sunat, kong Tuhan pangge pa dia for iko pa Tuhan, dia itu nyanda perlu mo roba apa-apa pa de pe diri kalu dia itu so sunat. Kong kalu ada orang yang nyanda da sunat, kong Tuhan pangge pa dia for iko pa Tuhan, dia itu nyanda perlu mo sunat for iko pa Tuhan.

¹⁹Soalnya nyanda penting kalu orang itu da sunat ato nyanda. Yang penting di sini dia musti iko tu Tuhan Allah pe prenta.

²⁰Jadi bagus kalu tiap orang tetap jo hidop sama deng waktu Tuhan Allah pangge for iko pa Dia.

²¹Kalu satu orang yang Tuhan pangge for iko pa Tuhan, kong waktu itu dia budak, dia nyanda perlu pusing deng de pe keadaan itu. Mar kalu ada kesempatan urus for mo bebas, pake jo tu kesempatan itu for mo bebas.

²²Soalnya tu budak yang Tuhan da pangge for iko pa Tuhan, dia itu so sama deng orang bebas di muka pa Tuhan. Mar tu orang bebas yang Kristus da pangge, dia itu sama deng Kristus pe budak.

²³Ngoni itu Tuhan so bli kong da bayar lunas, jadi jang se biar orang beking budak pa ngoni.

²⁴Jadi sudara-sudara, kita pe maksut bagini: tiap orang hidop jo trus sama deng waktu Tuhan Allah pangge for iko pa Tuhan, kong hidop jo bagitu trus di muka pa Tuhan Allah.

²⁵Skarang kita mo bicara tentang orang-orang yang blum kaweng. Kita nyanda da dapa prenta apa-apa dari Tuhan for dorang itu. Cuma biar lei bagitu, kita mo kase kita pe pendapat pa dorang sbagai orang yang bole ngoni mo percaya akang, lantaran Tuhan so se tunjung tu Dia pe rasa kasiang pa kita.

²⁶Kita pe pendapat bagini: lebe bae ngoni yang blum kaweng, ngoni nyanda perlu roba apa-apa tu ngoni pe keadaan itu lantaran skarang ini tu keadaan so pe dapa tako.

²⁷Kalu ada laki-laki yang so kaweng, dia jang brusaha mo se cere tu dia pe bini itu. Kong kalu ada laki-laki yang blum kaweng, nyanda usa lei dia brusaha mo kaweng.

²⁸Cuma kalu laki-laki kaweng, dia nyanda berdosa. Bagitu lei kalu satu parampuang kaweng, dia nyanda berdosa. Mar tu orang-orang yang da kaweng, dorang mo dapa tu masala-masala pa dong pe hidop, kong kita brusaha supaya ngoni nyanda mo dapa tu masala-masala itu.

²⁹Sudara-sudara, ini tu kita pe maksut: tu waktu for hari kiamat so dekat. So itu di waktu-waktu yang tasisa ini, tu orang-orang yang ada bini, dorang musti hidop setia pa Tuhan, rupa jo dorang itu nyanda ada bini.

³⁰Bagitu lei deng orang-orang yang da manangis, dorang nimbole talalu bapikir tentang dorang pe sedi, dorang musti beking rupa jo dorang itu nyanda da manangis. Kong tu orang-orang yang snang, dorang lei nimbole talalu bapikir tu dong pe snang itu, dorang musti beking rupa jo dorang itu nyanda snang. Trus tu orang-orang yang da babli sesuatu, dorang nimbole talalu pikir-pikir tu dong pe kepunyaan itu, dorang musti beking rupa jo tu dorang da bli itu bukang dong punya.

³¹Kong tu orang-orang yang mo beking apa-apa di dunia ini, dorang jang cuma se abis tu dong pe waktu for mo talalu pikir-pikir deng tu hal-hal itu. Soalnya tu dunia yang torang tau skarang ini nanti so nyanda mo ada lei.

³²Kita suka supaya ngoni hidop nyanda kuatir. Tu laki-laki yang nyanda ada bini, dia pe perhatian cuma for Tuhan, bagimana dia mo beking snang pa Tuhan.

³³Mar tu laki-laki yang ada bini, dia pe perhatian lebe banya ka hal-hal dunia, rupa bagimana dia mo beking snang pa dia pe bini.

³⁴Deng bagitu, dia pe perhatian taberbage. Kong tu parampuang yang nyanda da kaweng deng lei tu nona-nona, dorang pe perhatian cuma pa Tuhan, dorang pake tu dong pe badan deng dong pe diri cuma for Tuhan. Mar tu parampuang yang da kaweng, dia pe perhatian lebe banya ka hal-hal dunia rupa bagimana dia mo beking snang tu dia pe laki.

³⁵Samua tu kita da bilang itu for ngoni pe bae, bukang mo larang-larang pa ngoni, malatare supaya ngoni hidop beking yang butul deng supaya ngoni ja layani pa Tuhan deng butul-butul kong ngoni pe pikiran cuma pa Tuhan.

³⁶Kalu ada laki-laki yang rasa dia so beking tu nyanda bagus pa de pe tunangan, kalu de pe tunangan itu so lebe tatamba tua, kong lei kalu dia suka mo kaweng deng tu de pe tunangan itu, lebe bae dia kaweng jo, itu bukang dosa.

³⁷Mar kalu ada laki-laki yang mampu tahang de pe nafsu, kong dia so ambe keputusan for nyanda mo kaweng deng de pe tunangan, deng lei nyanda ada yang paksa pa dia for ambe tu keputusan itu, dia itu lei so beking tu bae.

³⁸Jadi orang yang kaweng deng dia pe tunangan, dia itu so beking tu bae. Kong tu orang yang nyanda kaweng deng dia pe tunangan, dia itu so beking yang lebe bae.

³⁹Tu bini tetap ada ikatan kaweng deng dia pe laki slama tu de pe laki masi hidop. Kalu tu dia pe laki so mati, dia bebas for kaweng deng laki-laki sapa jo tu dia suka, asal tu orang yang dia mo kaweng akang itu orang yang percaya pa Tuhan.

⁴⁰Mar menurut kita, dia itu mo lebe snang kalu dia tetap jo janda. Kita se nasehat ini lantaran kita tau kalu Tuhan Allah pe Roh ada lei pa kita.