Read Malay, Manado 1 Korintus 8 Bible Online

1 Korintus 8 - Malay, Manado bible

1 Korintus 8

¹Sudara-sudara, skarang kita mo bicara tentang hal makang daging yang orang kase for persembahan pa opo-opo. Torang samua so tau yang orang ja bilang-bilang ini, “Torang tu orang percaya, torang samua so tau banya hal.” Cuma deng torang tau banya hal bagitu, itu bole beking torang jadi sombong. Mar kalu orang baku sayang, itu bole se kuat pa orang.

²Kalu ada yang pikir dia so tau banya hal, sebenarnya dia itu blum tau banya yang mustinya dia tau.

³Mar orang yang sayang pa Tuhan Allah, pasti Tuhan Allah kanal pa dia.

⁴Kong tentang tu hal makang daging yang da kase for persembahan pa opo-opo, torang so tau kalu tu opo-opo di dunia ini nyanda ada kuasa apa-apa, kong cuma ada satu Tuhan Allah, nyanda ada yang laeng.

⁵Soalnya biar lei di sorga ato di bumi ada sesuatu tu orang ja semba tu ja bilang “allah”, kong lei memang butul ada banya “allah” deng banya “tuhan” yang rupa itu,

⁶mar for torang, Tuhan Allah itu cuma satu, Dia itu torang pe Bapa. Dia yang beking samua, kong torang hidop for Dia. Kong cuma ada satu Tuhan, Dia itu Yesus Kristus. Samua yang ada da beking lewat Dia, trus lantaran Dia kong torang bole hidop.

⁷Mar biar lei bagitu, nyanda samua orang percaya yang tau kalu tu opo-opo itu nyanda ada kuasa apa-apa. Ada bebrapa orang yang so percaya pa Yesus, dorang dulu ja basemba pa opo-opo, trus sampe skarang dorang pe pikiran masi sama jo deng dulu. Dorang itu masi ja bapikir kalu dorang makang tu daging yang ja kase for persembahan pa opo-opo, itu dorang so semba pa opo-opo. So itu dorang pikir di hati kalu dorang so beking dosa lantaran dorang masi taika pa tu opo-opo kong dong pe percaya pa Yesus blum kuat.

⁸Sebenarnya makanan nyanda mo beking torang jadi lebe dekat deng Tuhan Allah. Jadi kalu torang nyanda makang tu makanan yang ja kase pa opo-opo, torang nyanda mo rugi apa-apa, deng biar lei torang makang tu makanan itu, torang nyanda mo untung apa-apa.

⁹Mar biar lei ngoni ini bebas for mo makang tu makanan itu, ngoni tetap musti hati-hati, jang sampe kalu ngoni makang itu, ngoni beking tu orang laeng yang dong pe percaya blum kuat jadi beking dosa, itu sama jo deng ngoni so jadi batu sandungan for dorang.

¹⁰Soalnya bagini: ngoni tu orang percaya, ngoni so tau kalu nyanda masala for makang daging yang orang so kase for persembahan pa opo-opo. Trus kalu ada orang percaya yang blum tau mo se beda tu butul deng nyanda butul, kalu dia lia ngoni da makang tu daging di dalam pa tu opo-opo pe kuil, dia pasti tapengaru mo makang tu daging itu.

¹¹Jadi deng ngoni tau kalu ngoni bebas mo makang tu daging kong ngoni makang itu, ngoni so beking tu ngoni pe sudara yang de pe percaya blum kuat itu jadi rusak de pe hubungan deng Tuhan. Padahal Kristus lei da mati for dia.

¹²Kalu ngoni beking tu ngoni pe sudara jadi rupa itu, ngoni so beking dosa pa ngoni pe sudara-sudara yang percaya lantaran pa dorang pe hati, dorang pikir kalu yang dorang da beking itu dosa. Deng cara bagitu, ngoni lei so beking dosa pa Kristus.

¹³Jadi kalu yang kita makang itu beking tu sudara yang percaya jadi berdosa, itu sama jo deng kita so jadi batu sandungan for dorang. Kalu kita beking dia berdosa lantaran tu makanan itu, kita so nyanda lei mo makang itu slama kita hidop.