Read Malay, Manado 1 Korintus 9 Bible Online

1 Korintus 9 - Malay, Manado bible

1 Korintus 9

¹Sudara-sudara, ngoni jang bapikir kalu kita ini nyanda bebas for beking samua hal yang bae. Ngoni lei jang sampe bapikir kalu kita ini bukang rasul. Trus ngoni jang sampe bapikir kalu kita ini blum perna lia pa Tuhan Yesus tu torang ja iko akang. Kong ngoni lei jang sampe blum tau kalu ngoni da jadi percaya pa Tuhan lantaran kita da se tau tu firman pa ngoni, ngoni itu no tu kita pe hasil karja.

²Kong biar lei ada orang-orang yang anggap kita bukang rasul, mar for ngoni, tantu ngoni anggap kita ini rasul. Soalnya ngoni so jadi percaya pa Tuhan, itu no de pe bukti kalu kita ini memang rasul.

³Kalu ada orang yang kritik pa kita, kita bela kita pe diri deng bilang bagini:

⁴torang ini ada hak for dapa makang deng minum dari pa tu orang-orang yang torang da layani.

⁵Torang lei ada hak for mo bawa bini yang sama-sama percaya iko deng torang for beking playanan, itu sama deng yang rasul-rasul laeng da beking, deng lei yang Tuhan Yesus pe sudara-sudara deng Kefas ja beking.

⁶Ato apa ngoni pikir cuma kita deng Barnabas yang musti karja di luar playanan for mo dapa tu torang pe perlu hari-hari kong tu rasul yang laeng nyanda? Pasti nyanda bagitu to?

⁷Apa ada orang yang jadi tentara kong dia se gaji tu dia pe diri sandiri? Kong apa ada lei petani yang da batanang anggor pa de pe kobong trus dia nyanda da makang tu hasil dari de pe kobong itu? Trus apa ada gembala yang da bapiara domba, kong dia nyanda da minum susu dari tu domba-domba yang dia da piara itu? So pasti nyanda to?

⁸Tu conto yang kita da bilang di atas, itu bukang cuma manusia pe pikiran kalu orang yang da karja pantas for mo dapa gaji, mar itu lei sama deng yang da tulis di atoran-atoran kitab Taurat.

⁹Soalnya di atoran-atoran kitab Taurat tu Musa da tulis, dia da tulis bagini, “Kalu sapi da bakarja kras[2] for torang, torang nimbole ika de pe mulu. Kase biar jo tu sapi itu pe mulu nyanda taika, supaya dia bole mo makang.” Jadi apa itu da tulis lantaran Tuhan Allah tarukira pa tu sapi?

¹⁰Ato tu tulisan itu pe tujuan for torang? Tantu katu tu tulisan itu da tulis for torang. Tu tulisan itu pe arti bagini: tu orang yang bapajeko tana, dia musti bapajeko kong baharap deng yakin kalu dia mo dapa tu de pe hasil karja dari situ. Bagitu lei deng orang yang bakarja se lapas tu gandum dari de pe kuli, dia musti bakarja kong baharap deng yakin kalu dia mo dapa de pe hasil karja dari situ.

¹¹Kong torang so se tau pa ngoni tu Kabar Bae tentang Kristus, itu bole mo se sama deng torang so batanang akang bibit rohani pa ngoni. No kalu bagitu, apa torang so talalu batuntut kalu torang minta tu torang pe perlu hari-hari dari pa ngoni? Soalnya itu to bole mo se sama deng torang da dapa tu tong pe hasil waktu bapanen.

¹²Kalu tu orang laeng yang mangajar tu firman pa ngoni ada hak for mo dapa tu dong pe perlu dari pa ngoni, tantu katu torang lei ada hak yang lebe basar for mo dapa itu dari pa ngoni! Mar biar lei bagitu, torang nyanda pake tu torang pe hak itu. Malatare biar lei torang susa, torang tetap tanggong samua tu torang pe perlu supaya torang nyanda minta itu pa ngoni, jang sampe deng torang minta bagitu, itu jadi halangan for orang mo trima tu Kabar Bae tentang Kristus.

¹³Ngoni tantu tau kalu orang-orang yang ja layani di Ruma Ibada Pusat, dorang itu ja dapa makanan dari situ. Kong lei tu orang-orang yang ja layani di tampa korban persembahan, dorang ja dapa bagean dari situ lei.

¹⁴Bagitu lei Tuhan so tetapkan kalu orang-orang yang ja kase tau tu Kabar Bae tentang Kristus, dorang itu musti dapa tu dong pe perlu hari-hari dari tu karja itu.

¹⁵Mar biar lei kita bole mo pake tu bebrapa hak for mo dapa apa-apa dari pa ngoni, kita nyanda perna pake tu hak itu biar lei cuma satu. Kong kita lei nyanda tulis ni surat supaya kita bole mo minta apa-apa dari pa ngoni. Nyanda ada tu bole mo paksa pa kita for minta pa ngoni tu kita pe perlu! Kita bangga lantaran kita nyanda minta apa-apa pa ngoni, kong lebe bae kita mati kalu kita pe bangga itu ilang dari pa kita.

¹⁶Kalu kita se tau tu Kabar Bae tentang Kristus, kita nyanda ada alasan for angka-angka tu kita pe diri sandiri, lantaran itu memang kita pe tugas yang kita musti mo beking. Cilaka jo kita ini kalu kita nyanda se tau tu Kabar Bae.

¹⁷Kong kalu kita kase tau tu Kabar Bae itu lantaran kita pe mau sandiri, kita memang ada hak mo dapa tu kita pe perlu dari situ. Mar sebenarnya kita da kase tau tu Kabar Bae itu bukang lantaran kita pe mau sandiri, kita kase tau itu lantaran Tuhan da se percaya akang pa kita for beking itu.

¹⁸No kalu bagitu, apa tu kita mo dapa dari situ for jadi kita pe upah? Tu kita mo dapa jadi kita pe upah ini: waktu kita se tau tu Kabar Bae, kita nyanda minta upah apa-apa. Deng bagitu, sbagai orang yang ja se tau tu Kabar Bae, kita nyanda da pake tu kita pe hak for dapa upah dari pa tu orang-orang yang kita ja layani.

¹⁹Biar lei kita ini orang bebas, bukang orang laeng pe budak, mar kita beking kita pe diri jadi sama deng samua orang pe budak. Deng bagitu kita bole mo se menang tu orang-orang dari kuasa jaha for bantu pa dorang percaya pa Yesus.

²⁰Jadi bagini: kalu kita ada deng orang dari bangsa Yahudi, kita beking kita pe diri jadi sama deng dorang, supaya kita bole bantu pa dorang itu jadi percaya pa Yesus, itu sama deng kita so se menang pa dorang dari kuasa jaha. Kong kalu kita ada deng orang dari bangsa Yahudi yang taika deng tu atoran-atoran di kitab Taurat, kita beking kita pe diri jadi sama deng dorang jadi taika deng tu atoran-atoran itu, biar lei kita sandiri so nyanda lei taika deng tu atoran-atoran itu. Kita beking bagitu, supaya kita bole bantu pa dorang yang taika deng tu atoran-atoran itu jadi percaya pa Yesus, itu sama deng kita so se menang pa dorang dari kuasa jaha.

²¹Kong kalu kita ada deng orang yang bukang dari bangsa Yahudi, kita beking kita pe diri jadi sama deng dorang tu nyanda hidop iko tu atoran-atoran yang ada di kitab Taurat. Mar itu bukang berarti kita nyanda ja iko tu atoran yang dari Tuhan Allah, malatare kita ja beking tu Kristus da prenta pa kita. Kita beking samua itu, supaya dorang yang bukang dari bangsa Yahudi itu bole mo percaya pa Yesus, itu sama deng kita se menang pa dorang dari tu kuasa jaha.

²²Kalu kita ada deng orang yang blum kuat percaya pa Yesus, kita lei nyanda beking tu hal-hal yang dorang anggap nyanda bagus mo beking, supaya kita bole bawa pa dorang itu jadi percaya pa Yesus. Kita so beking kita pe diri jadi sama deng samua orang, biar deng cara bagimana kita brusaha supaya bole bawa bebrapa dari antara pa dorang itu for mo dapa slamat.

²³Kita beking tu kita pe diri bagitu supaya lebe tatamba banya tu orang yang percaya tu Kabar Bae tentang Kristus, kong deng bagitu kita deng dorang bole sama-sama dapa berkat dari tu Kabar Bae itu.

²⁴Ngoni pasti tau kalu orang iko lomba lari, dorang samua brusaha balari, mar dari pa dorang itu cuma satu tu mo juara kong dapa piala. Ngoni lei musti sama deng tu orang yang da iko lomba lari: ngoni musti brusaha iko tu Tuhan Allah pe mau supaya ngoni bole mo dapa tu ngoni pe upah.

²⁵Tiap orang tu da iko lomba, dia musti disiplin deng dia pe latihan di samua hal lantaran dia suka mo dapa tu piala. Dorang beking bagitu for mo dapa tu piala yang nyanda mo batahang sampe slama-lamanya, mar torang mo dapa tu upah yang mo batahang sampe slama-lamanya, itu no tu hidop kekal.

²⁶So itu kita sama deng tu pelari yang nyanda sambarangan balari, mar kita brusaha lari sampe di finis. Kong lei kita sama deng tu petinju yang nyanda cuma sambarangan batinju.

²⁷Mar kita latih kras deng se disiplin tu kita pe diri supaya nanti waktu kita so klar se tau tu Kabar Bae tentang Yesus pa orang-orang, Tuhan nyanda mo tolak pa kita mar kita mo dapa tu upah.