Read Malay, Manado 2 Korintus 1 Bible Online

2 Korintus 1 - Malay, Manado bible

2 Korintus 1

¹Ni surat dari kita, Paulus. Kita ini Kristus Yesus pe rasul tu Dia pe utusan lantaran Tuhan Allah pe mau. Ni surat lei dari Timotius, dia itu tu torang pe sudara yang percaya. Surat ini for ngoni tu Tuhan Allah pe jemaat di Korintus, deng lei for samua Tuhan pe orang-orang tu ada di sluru daera Akhaya.

²Torang minta supaya Tuhan Allah tu torang pe Bapa deng lei Tuhan Yesus Kristus kase tunjung tu bae pa ngoni deng lei beking ngoni hidop deng tenang.

³Puji jo pa Tuhan Allah, tu Bapa dari Tuhan Yesus Kristus. Dia itu Bapa yang ja se tunjung Dia pe rasa kasiang pa torang deng Dia lei slalu se kuat pa torang samua.

⁴Dia yang se kuat pa torang pe hati waktu torang da dapa macam-macam pendritaan. Dia se kuat bagitu pa torang supaya torang lei bole mo bantu se kuat orang laeng pe hati yang dapa tu macam-macam pendritaan. Torang bole se kuat pa dorang sama deng tu Tuhan Allah da se kuat pa torang.

⁵Torang so banya da rasa tu pendritaan yang Kristus da rasa, mar torang lei banya dapa tu kekuatan dari Kristus waktu torang dapa macam-macam pendritaan.

⁶Kalu torang dapa pendritaan, Tuhan pake tu torang pe pendritaan itu supaya torang bole se kuat pa ngoni, kong ngoni bole mo dapa slamat dari hukuman dosa. Kalu Tuhan se kuat pa torang, tu kekuatan yang torang da dapa itu bole torang pake for se kuat pa ngoni. Deng bagitu ngoni bole tetap batahang percaya biar lei dapa pendritaan, tu pendritaan yang sama deng tu torang lei perna da rasa.

⁷So itu torang baharap deng yakin kalu ngoni mo tetap batahang percaya pa Tuhan, lantaran torang tau kalu ngoni so mendrita sama deng tu torang da rasa, jadi pasti lei Tuhan se kuat pa ngoni sama deng tu torang da rasa.

⁸Sudara-sudara, torang mo se tau pa ngoni tentang tu pendritaan yang torang da rasa di daera Asia. Tu pendritaan yang torang da tanggong pe basar deng pe brat, sampe torang so nyanda mampu mo tahang itu, torang rasa tong pe hidop so nyanda ada harapan.

⁹Malatare torang rasa kalu torang ini sama jo deng so dapa hukuman mati. Itu samua jadi supaya torang nimbole percaya pa tong pe diri sandiri, mar torang cuma bole percaya pa Tuhan Allah, so Dia yang ada kuasa for se hidop ulang pa orang-orang yang so mati.

¹⁰Dia so se slamat pa torang dari tu hal-hal yang amper-amper beking mati pa torang, kong torang lei baharap deng yakin pa Dia kalu Dia mo se slamat ulang pa torang dari tu hal-hal bagitu.

¹¹Sudara-sudara, ngoni lei musti bantu pa torang deng cara basombayang akang jo trus pa torang. Kalu ngoni beking bagitu, itu bantu pa torang lantaran Tuhan mo dengar tu ngoni pe sombayang deng Tuhan mo se tunjung Dia pe bae deng tolong pa torang. Jadi lantaran tu ngoni pe sombayang itu, nanti banya orang yang mo bilang makase pa Tuhan lantaran Dia so dengar tu orang banya pe sombayang itu.

¹²Torang rasa bangga lantaran torang pe kalakuan pa orang-orang di dunia ini jujur deng torang pe tujuan butul-butul tulus dari Tuhan Allah, lebe-lebe lei torang beking itu waktu torang da sama-sama deng ngoni. Torang tau itu butul lantaran torang pe hati nurani bole jadi saksi tentang itu. Samua tu torang da beking itu nyanda iko manusia pe bijaksana, mar itu lantaran Tuhan Allah pe bae yang beking torang mampu for beking tu samua itu.

¹³Torang cuma da tulis pa ngoni apa yang ngoni bole baca deng mangarti akang. Kita harap deng yakin nanti ngoni mo mangarti samua ini deng butul.

¹⁴Mar biar lei skarang ngoni cuma mangarti sadiki tentang torang, kita harap nanti di hari waktu Tuhan Yesus datang ulang, ngoni mo bicara bangga tentang torang, sama deng torang lei mo bicara bangga tentang ngoni.

¹⁵Kita yakin kalu ngoni rasa bangga deng torang, so itu kita lei ada rencana for mo pigi dua kali pa ngoni supaya ngoni bole mo rasa dua kali tu Tuhan pe bae dari tu kita pe kunjungan itu.

¹⁶Jadi kita rencana waktu kita mo pigi ka daera Makedonia, kita mo basingga pa ngoni, kong abis itu baru kita se trus tu kita pe perjalanan ka Makedonia. Dari Makedonia kita mo babale ulang pa ngoni, supaya ngoni bole bantu tu kita pe perlu for se trus tu kita pe perjalanan ka daera Yudea.

¹⁷Mar biar lei kita blum sempat beking tu kita pe rencana itu, ngoni jang anggap kalu kita da ragu-ragu for beking tu kita pe rencana itu. Kita nyanda beking rencana iko cara bapikir yang duniawi. Kita nyanda ja bilang ‘iyo’ kong waktu itu lei pikir ‘nyanda’. Kita kasiang nyanda bagitu.

¹⁸Tuhan Allah itu setia deng tu Dia pe janji, bagitu lei deng torang, torang setia deng tong pe janji pa ngoni. Jadi torang nyanda bilang ‘iyo’ kong waktu itu lei torang pikir ‘nyanda’.

¹⁹Soalnya kita, Silas deng Timotius, torang so se tau pa ngoni tentang Yesus Kristus, tu Anak Allah. Kong Yesus Kristus beking apa tu Dia ja bilang. Dia nyanda bilang ‘iyo’, kalu Dia nyanda mo beking, mar Yesus itu ja beking apa yang Dia bilang ‘iyo’.

²⁰Soalnya samua tu Tuhan Allah da janji, itu samua Yesus so beking gnap. So lantaran itu kong torang bilang Yesus itu, “Amin, pasti butul”. Kong deng torang bilang kalu Yesus itu butul, torang so puji deng hormat pa Tuhan Allah.

²¹Kong Tuhan Allah tu da beking torang deng ngoni jadi kuat percaya pa Yesus Kristus, Dia lei yang so pili pa torang.

²²Tuhan Allah itu yang da kase tu Roh Kudus pa torang pe hati yang jadi jaminan for torang bole mo trima nanti samua tu Dia da janji pa torang. Tu Roh Kudus itu sama deng metrai for se tunjung kalu torang ini Dia punya.

²³Tuhan Allah tau kalu kita nyanda da jadi datang pa ngoni di Korintus lantaran kita nimau datang kong togor kras pa ngoni. Tuhan Allah itu tu kita pe saksi, Dia tau tu kita pe isi hati itu, kalu kita nyanda jadi datang pa ngoni di Korintus lantaran kita nimau mo kras pa ngoni.

²⁴Torang bilang bagitu bukang mo prenta pa ngoni tentang tu ngoni pe percaya, lantaran ngoni pe percaya pa Kristus so kuat. Torang pe tujuan supaya torang bole mo karja sama-sama deng ngoni supaya lei ngoni pe hati bole rasa snang.