Read Malay, Manado 2 Korintus 10 Bible Online

2 Korintus 10 - Malay, Manado bible

2 Korintus 10

¹Kita, Paulus, kita minta pa ngoni supaya tarukira jo bae-bae tu kita mo bilang ini. Ada dari pa ngoni yang bilang kalu kita nyanda brani togor deng kras pa ngoni waktu kita ada sama-sama deng ngoni, mar kita brani togor deng kras lewat surat kalu kita jao dari pa ngoni. Kita skarang mo bicara pa ngoni deng lemah lembut sama deng Kristus pe sifat,

²kong kita bamohon pa ngoni supaya ngoni jang beking sampe kita terpaksa musti togor deng kras pa ngoni nanti waktu kita ada deng ngoni. Soalnya kita so pikir kalu kita mo togor deng kras pa tu orang-orang yang da babilang kalu torang ini ja hidop iko tu dunia pe mau.

³Memang torang masi hidop di dunia, mar torang kasiang nyanda da pake tu cara yang biasa dunia ja pake waktu torang berjuang malawang pa orang-orang yang malawang tu Tuhan pe firman.

⁴Soalnya tu senjata yang torang da pake waktu torang berjuang, itu bukang senjata yang dari ni dunia mar senjata yang dari pa Tuhan. Tu senjata yang dari pa Tuhan itu no tu kuasa yang dari pa Dia, tu kuasa yang mampu for se kala pa orang-orang yang malawang Tuhan pe firman, itu sama deng tu senjata yang da pake di prang for se ancor tu musu pe benteng-benteng.

⁵Kong tu Tuhan Allah pe kuasa itu beking torang mampu se kala samua tu prinsip deng tu pikiran yang sombong yang orang pake for ja halangi orang laeng kanal pa Tuhan Allah. Dorang pe pikiran yang sala itu torang roba supaya dorang bole iko Kristus pe mau.

⁶Kong kalu ngoni so butul-butul dengar-dengaran pa Kristus, torang siap for hukum pa sapa jo yang nyanda dengar-dengaran.

⁷Ngoni musti sadar deng tu keadaan yang ada di muka pa ngoni. Kalu ada orang yang butul-butul yakin kalu dia itu Kristus pe orang, dia lei musti se inga pa de pe diri sandiri kalu torang ini lei Kristus pe orang sama deng dia.

⁸Kita memang ja se bangga-bangga tu kuasa yang Tuhan Allah da kase pa torang. Tu kuasa itu Dia da kase for se kuat tu ngoni pe percaya, bukang for beking ancor pa ngoni. Jadi biar lei orang anggap so talebe kita se bangga-bangga tu kuasa itu, kita nyanda rasa malo deng itu.

⁹Kita nimau kalu ngoni anggap kita mo beking tako pa ngoni deng kita pe surat-surat.

¹⁰Soalnya ada yang ja bilang bagini, “Tu Paulus itu tegas deng kras cuma lewat de pe surat-surat, mar kalu baku mangada deng dia, dia sandiri nyanda kuat kong lei apa tu dia ja bilang nyanda ada de pe guna.”

¹¹Jadi biar jo tu orang yang ja bapikir rupa itu sadar kalu torang pe sikap tetap sama, biar lei itu lewat tong pe kata-kata di surat-surat ato kalu torang ada deng ngoni.

¹²Memang katu torang nyanda brani mo se sama ato mo se banding tu torang pe diri deng tu orang-orang yang ja puji tu dong pe diri sandiri. Dorang itu ukur tu dong pe diri pake tu dong pe ukuran sandiri. Dorang itu ja se banding tu dong pe diri deng dong pe diri sandiri jo. Dorang itu nintau apa-apa!

¹³Mar torang nyanda bagitu. Kalu torang mo se bangga-bangga tu torang pe karja, torang nyanda mo se bangga apa-apa di luar torang pe wilaya karja. Torang cuma mo se bangga tu karja yang Tuhan Allah so kase pa torang, kong ngoni itu tamaso pa tong pe wilaya karja.

¹⁴Soalnya waktu torang mangajar pa ngoni tentang Kristus, torang so sampe pa ngoni, ngoni itu torang pe wilaya karja jadi nyanda kaluar dari torang pe batas wilaya karja. Torang yang pertama tu da datang bawa tu Kabar Bae tentang Kristus pa ngoni.

¹⁵Torang nyanda ja se bangga-bangga tu torang pe diri for tu karja yang orang laeng da beking di wilaya karja tu bukang da tentukan for torang. Mar torang cuma karja pa torang pe batas wilaya karja, kong torang baharap kalu nanti ngoni pe percaya so lebe kuat, tu karja yang torang ja beking di antara pa ngoni mo jadi lebe basar lei.

¹⁶Deng bagitu, torang bole mo se tau tu Kabar Bae di daera-daera yang lebe jao dari pa ngoni pe daera, tu tampa yang orang nyanda da karja akang. Kong deng bagitu, torang nyanda da bangga-bangga deng tu orang laeng pe hasil karja di wilaya yang da tentukan for dorang.

¹⁷Di Kitab Suci da tulis bagini, “Sapa yang mo babangga, lebe bae dia babangga tentang Tuhan”.

¹⁸Soalnya bukang tu orang yang babangga de pe diri sandiri yang butul di mata pa Tuhan, mar tu orang yang Tuhan da se bangga-bangga, dia itu yang butul di mata pa Tuhan.