Read Malay, Manado 2 Korintus 2 Bible Online

2 Korintus 2 - Malay, Manado bible

2 Korintus 2

¹Jadi kita so ambe keputusan supaya kita nyanda mo pigi ulang pa ngoni for togor kong beking ngoni jadi sedi ulang.

²Soalnya kalu kita beking ngoni pe hati jadi sedi, so nyanda ada lei dang yang bole mo beking kita pe hati jadi snang, lantaran ngoni yang mustinya beking snang pa kita so jadi sedi lantaran kita da togor.

³So itu no kita tulis tu surat yang lalu itu supaya kita togor pa ngoni di surat, deng bagitu nanti kalu kita datang ulang pa ngoni di Korintus, ngoni nyanda mo beking kita pe hati jadi sedi lantaran da lia tu ngoni pe kalakuan yang nyanda bagus. Soalnya sebenarnya ngoni itu orang-orang yang mustinya beking kita pe hati jadi snang. Kita yakin kalu kita snang, ngoni lei pasti snang.

⁴Soalnya waktu kita tulis tu surat yang lalu itu pa ngoni, waktu itu kita pe hati rasa kuatir skali, sedi, deng banya lei manangis. Kita nyanda tulis tu surat itu for mo beking tu ngoni pe hati jadi sedi, nyanda kasiang, mar supaya ngoni tau kalu pe basar tu kita pe sayang pa ngoni samua.

⁵Ada orang dari pa ngoni pe jemaat yang da beking dosa. Tu dia da beking itu beking sedi pa kita, mar bukang cuma kita, tu dia da beking itu beking sedi lei pa ngoni samua ato tare bebrapa orang dari pa ngoni. Kita nyanda da se lebe-lebe ini samua.

⁶Kong for tu orang yang beking torang samua sedi, banya dari pa ngoni yang so se hukum pa dia, kong so cukup jo tu hukuman itu for dia.

⁷Jadi skarang, ngoni musti kase ampung pa dia deng se kuat lei pa dia. Deng ngoni beking bagitu, dia nyanda mo sedi deng putus asa.

⁸So itu no kita se nasehat pa ngoni, supaya ngoni se tunjung ulang kalu ngoni memang butul-butul sayang pa dia.

⁹Soalnya kita tulis surat yang lalu tentang ngoni musti se hukum tu orang itu deng maksut mo tes pa ngoni kalu ngoni beking itu samua ato nyanda.

¹⁰Kalu ngoni se ampung tu orang itu, kita lei se ampung pa dia. Kalu memang ada yang kita musti se ampung, kita pasti se ampung. Kita se ampung pa tu orang itu for ngoni pe bae, kong Kristus jadi kita pe saksi kalu kita so se ampung pa dia.

¹¹Torang se ampung akang pa dia supaya tu setang pe bos nyanda dapa kesempatan for se bodok pa torang, lantaran torang tau tu dia pe rencana jaha.

¹²Waktu kita sampe di Troas for se tau tu Kabar Bae tentang Kristus, kita lia kalu Tuhan so buka akang jalang for kita se tau tu Kabar Bae di sana.

¹³Mar kita pe hati nyanda rasa tenang di situ, lantaran kita nyanda da baku dapa deng Titus tu kita pe sudara yang percaya. So lantaran itu no kong kita minta permisi dari sana kong brangkat ka daera Makedonia.[1]

¹⁴Mar kita bilang makase pa Tuhan Allah yang slalu pimpin pa torang tu percaya pa Kristus supaya torang bole slalu menang dari tu kuasa jaha. Tuhan Allah pake pa torang for pigi kamana-mana supaya torang bole se tau pa orang-orang tu Kabar Bae tentang Dia kong dorang bole kanal pa Dia. Waktu dorang dengar tu Kabar Bae itu, itu sama deng dorang da ciong tu bobou wangi yang dari pa torang.

¹⁵Soalnya di muka pa Tuhan Allah, so torang ini no yang sama deng tu bobou wangi itu, tu bobou wangi yang dari pa Kristus di antara tu orang-orang yang mo dapa slamat dari hukuman dosa, deng bobou kematian di antara tu orang-orang yang mo binasa.

¹⁶For orang-orang yang mo binasa lantaran nyanda percaya, menurut dorang, torang ini sama deng bobou kematian lantaran torang se tau kalu Tuhan Allah mo se binasa pa dorang. Mar for orang-orang yang mo dapa hidop kekal lantaran percaya, menurut dorang, torang ini sama deng tu bobou wangi lantaran torang se tau pa dorang tentang tu Kabar Bae yang mo beking dorang dapa hidop kekal. No kong sapa dang yang mampu mo beking tu karja ini? Pasti nyanda ada to?

¹⁷Torang ini kasiang nyanda sama deng tu banya orang laeng yang ja kase tau tu Tuhan Allah pe firman cuma supaya dorang bole mo dapa untung dari situ. Mar torang nyanda bagitu, torang ja se tau tu firman, kong torang ja se tau tu firman deng hati yang tulus. Tuhan Allah sandiri tu da kase tugas itu pa torang. Torang ini percaya pa Kristus kong Tuhan Allah da lia pa torang waktu torang se tau tu firman pa orang-orang.