Read Malay, Manado 2 Korintus 4 Bible Online

2 Korintus 4 - Malay, Manado bible

2 Korintus 4

¹Tuhan Allah so se tunjung Dia pe rasa kasiang pa torang, Dia so pili pa torang for se tau pa orang-orang tentang tu perjanjian yang baru, so itu torang nyanda perna putus asa beking tu torang pe karja.

²Kong torang so ambe keputusan for nyanda pake tu cara-cara yang besae for se tau tu Kabar Bae, tu cara-cara yang cuma beking malo pa torang. Trus torang lei nyanda ja beking bodok pa orang deng torang nyanda se putar bale tu Tuhan Allah pe firman, mar torang se tau deng jelas pa orang tu butul yang iko Tuhan pe mau. Kong deng torang beking bagitu, samua orang bole nilai pa dorang pe hati kalu tu brita yang torang da se tau itu butul ato nyanda.

³Kalu ada orang yang masi lei nyanda mo mangarti deng tu Kabar Bae dari Tuhan yang torang da se tau itu, itu sama deng tu Kabar Bae itu tatutu for dorang. Itu bukang lantaran torang nyanda se tau deng jelas pa dorang, mar itu lantaran dorang nimau mo percaya jadi dorang tu mo binasa.

⁴Tu orang-orang yang nyanda percaya itu, setang pe bos so kuasai. Setang pe bos itu yang da kuasai ni dunia. Dia so tutu tu dorang pe pikiran sampe dorang nyanda mangarti deng tu Kabar bae, jadi dorang nimbole lia lei tu trang dari tu Kabar Bae yang mo se trang tu dorang pe hati. Tu Kabar Bae itu tentang Kristus yang luar biasa, tu Kristus yang sama persis deng Tuhan Allah.

⁵Tu torang da se tau bukang tentang torang pe diri sandiri mar tentang Yesus Kristus tu Tuhan yang torang ja iko akang. Kong torang beking tong pe diri sama deng budak for layani pa ngoni, lantaran torang ini ja beking Yesus pe mau.

⁶Dulu Tuhan Allah da bilang bagini, “Dari glap mo muncul trang!” Kong skarang so Dia no tu da kase Dia pe trang for bacahaya pa torang pe hati, supaya torang bole tau tentang Dia pe luar biasa. Kong skarang tu Tuhan Allah pe luar biasa itu, torang bole lia pa Yesus Kristus pe hidop.

⁷Tu Kabar Bae yang Tuhan da se percaya akang pa torang, tu Kabar Bae itu bole mo se sama deng tu harta yang mahal. Kong torang yang da se tau tu Kabar Bae itu, torang bole mo se sama deng tu tampa simpang yang dari tana liat tu gampang pica. Deng bagitu, itu jelas skali dapa lia kalu tu kuasa yang basar yang ada pa torang itu memang dari pa Tuhan Allah, bukang dari pa torang sandiri.

⁸Torang ja dapa tindas di samua hal, mar torang nyanda ancor. Torang ja dapa tu susa sampe nintau mo beking bagimana, mar torang nyanda perna putus asa.

⁹Torang dapa siksa, mar Tuhan nyanda se biar torang sandiri. Torang dapa pukul sampe rubu, mar torang nyanda mati.

¹⁰Torang nyanda perna bebas dari bahaya yang bole mo beking mati pa torang sama deng tu Yesus da rasa, deng bagitu orang laeng bole mo lia kalu Yesus so hidop ulang lantaran dorang bole lia tu Dia pe kuasa pa torang pe diri.

¹¹Soalnya slama torang masi da hidop, slalu ada orang-orang yang mo cari bunung pa torang lantaran torang da iko pa Yesus. Deng dorang beking bagitu, itu jadi jelas for samua orang kalu Yesus so hidop ulang, lantaran dorang bole lia Dia pe kuasa pa torang pe badan yang nyanda mo batahang lama ini.

¹²Jadi torang slalu ja mangada tu orang-orang yang mo cari bunung pa torang, itu sama deng torang slalu ja mangada tu maut. Mar biar lei torang mangada tu maut, yang penting ngoni bole dapa tu hidop kekal.

¹³Di Kitab Suci da tulis tentang satu orang yang da bilang bagini, “Kita percaya, so lantaran itu kita brani babicara”. Jadi bagitu lei no katu deng torang, so lantaran torang percaya kong torang brani babicara.

¹⁴Soalnya torang tau kalu Tuhan Allah tu da se hidop ulang pa Tuhan Yesus, Dia lei nanti mo se hidop ulang pa torang for hidop sama-sama deng Yesus. Dia mo se kumpul pa torang deng ngoni sama-sama di muka pa Dia.

¹⁵Torang dapa samua tu siksa ini waktu se tau tu Kabar Bae, itu samua for ngoni pe bae, deng lei supaya Tuhan Allah bole mo se tunjung tu Dia pe bae pa lebe banya orang, trus lebe banya lei orang yang mo bilang makase pa Tuhan Allah, kong samua ini beking Tuhan Allah dapa puji deng dapa hormat.

¹⁶So itu torang nyanda perna putus asa, biar lei tu torang pe badan lebe hari lebe nyanda kuat deng lei saki, mar tu torang pe hati lebe hari lebe tatamba kuat.

¹⁷Tu pendritaan yang torang da rasa skarang ini, itu cuma ringan deng lei cuma for samantara waktu. Mar kalu torang tetap batahang deng tu pendritaan, itu beking torang siap supaya nanti torang mo trima yang luar biasa di sorga for slama-lamanya. Kong tu luar biasa yang torang mo trima itu jao lebe basar kalu mo se banding deng tu pendritaan yang torang da rasa.

¹⁸Soalnya torang nyanda ja tarukira deng tu hal-hal yang bole mo dapa lia deng mata yang di dunia ini, lantaran itu kwa cuma for samantara waktu. Mar tu torang ja tarukira, itu hal-hal yang nimbole mo dapa lia deng mata yang ada di sorga, tu hal-hal itu no yang mo ada for slama-lamanya.