Read Malay, Manado 2 Korintus 5 Bible Online

2 Korintus 5 - Malay, Manado bible

2 Korintus 5

¹Torang pe badan di dunia ini sama deng ruma yang torang da tinggal akang cuma for samantara waktu. Kong torang tau, waktu torang mati, itu de pe arti tu torang pe ruma ini ancor, mar Tuhan Allah so sadia akang for torang satu ruma yang baru di sorga. Tu ruma di sorga itu, bukang manusia yang da beking mar Tuhan yang da beking, kong itu mo batahang for slama-lamanya.

²Kong slama torang masi hidop di dunia ini torang mengelu lantaran torang mendrita deng torang pe badan skarang ini, so itu torang suka mo dapa badan baru tu ada di sorga.

³Torang suka nanti waktu torang mati, torang mo dapa tu torang pe badan yang baru. Deng bagitu tu torang pe jiwa mo ada badan.

⁴Soalnya kalu torang masi hidop pa torang pe badan di dunia ini, torang mengelu lantaran tu beban yang brat tu torang da rasa pa torang pe badan yang lama ini. Cuma biar torang mengelu, torang bukang baharap mo mati supaya torang se lapas tu torang pe badan skarang, mar torang suka supaya torang dapa badan yang baru supaya torang pe jiwa ada badan yang baru, itu bole mo se sama deng tu orang yang da dapa baju baru. Torang suka tu torang pe badan di dunia tu nyanda batahang ini taganti deng badan yang mo batahang for slama-lamanya.

⁵Kong Tuhan Allah sandiri yang so se siap pa torang supaya torang bole mo dapa tu badan yang baru itu, so Dia tu da kase pa torang tu Dia pe Roh supaya itu bole jadi jaminan kalu memang torang mo dapa tu badan yang baru itu.

⁶So lantaran torang tau kalu torang mo dapa tu badan yang baru, torang pe hati slalu kuat. Torang tau lei kalu slama torang masi pa torang pe badan yang lama ini, torang blum mo tinggal sama-sama deng Tuhan di sorga.

⁷Soalnya torang hidop di dunia ini, torang hidop iko yang torang percaya, torang bukang hidop cuma iko apa yang torang bole mo lia.

⁸Jadi torang pe hati tetap kuat, kong torang lebe suka se tinggal tu tong pe badan di dunia ini trus tinggal sama-sama deng Tuhan di sorga.

⁹So itu no torang slalu brusaha beking snang pa Tuhan, bae itu waktu torang masi ada pa torang pe badan di dunia ini ato pa torang pe badan yang baru di sorga.

¹⁰Soalnya torang samua musti mangada pa Kristus for mo dapa adili, supaya tiap orang mo dapa apa yang pantas for dia mo dapa, iko apa tu dia da beking slama dia hidop di dunia, apa tu dia da beking itu tu bae ato tu jaha.

¹¹Kristus mo adili pa torang samua, so itu deng rasa tako pa Tuhan, torang brusaha supaya orang laeng bole jadi percaya pa Tuhan. Tuhan Allah tau butul tu torang pe isi hati, kong torang harap supaya ngoni lei bole tau tu torang pe isi hati.

¹²Ngoni jang pikir kalu torang bilang bagitu for mo bicara bangga lei tentang tong pe diri sandiri, nyanda kasiang. Mar torang cuma mo bilang tu bae yang torang da beking supaya ngoni ada alasan for mo babangga tentang torang, deng nanti ngoni ada sesuatu tu mo se manyao akang pa tu orang-orang yang suka ja basombong deng apa tu dorang ja beking. Dorang itu basombong deng apa tu orang bole mo lia deng mata mar dong pe hati nyanda butul pa Tuhan.

¹³Soalnya ada orang yang bilang kalu torang ini sama deng orang yang nyanda waras waktu ja kase tau tu firman, mar itu nyanda apa-apa lantaran torang da beking itu for Tuhan Allah. Trus laeng orang bilang kalu torang ini dapa lia waras, kong samua itu for ngoni pe bae.

¹⁴Torang beking samua itu lantaran Kristus pe sayang da kuasai pa torang pe hati. Soalnya torang tau kalu dulu waktu Dia mati, Dia mati for torang samua, so itu torang ini so sama deng orang yang so mati.

¹⁵Kristus so mati for samua orang, supaya tu orang-orang yang masi hidop di dunia ini nyanda lei hidop for dong pe diri sandiri, mar supaya dorang bole hidop for Kristus yang so mati deng lei yang Tuhan Allah so se hidop ulang for dorang.

¹⁶So itu, torang so nyanda lei ja banilai orang iko manusia pe ukuran. Biar dulu torang perna banilai pa Kristus iko tu manusia pe ukuran, mar skarang torang so nyanda lei banilai bagitu pa Dia.

¹⁷Jadi sapa jo yang percaya pa Kristus, dia itu so jadi manusia yang baru. Dia pe hidop so nyanda lei sama deng dulu seblum dia percaya pa Kristus, mar dia so hidop baru, itu sama deng yang lama so nyanda ada lei kong yang baru so ada.

¹⁸Samua itu Tuhan Allah yang da beking. Dia beking torang pe hubungan deng Dia jadi bagus lewat apa tu Kristus da beking. Trus Dia lei so se percaya akang pa torang tu tugas for bantu pa orang-orang supaya dorang bole jadi percaya kong dorang pe hubungan deng Dia bole lei jadi bagus.

¹⁹Kong ini tu brita yang torang ja se tau: Tuhan Allah beking manusia pe hubungan deng Dia jadi bagus lewat Kristus. Tuhan Allah beking itu deng nyanda baungkit-ungkit lei tu manusia pe dosa-dosa pa Dia. Kong Dia lei se percaya akang pa torang tu tugas for kase tau tu brita itu pa orang-orang supaya orang-orang pe hubungan deng Dia jadi bagus.

²⁰So itu, torang tu orang-orang yang Kristus da utus for kase tau tu brita tentang Dia. Kalu torang se tau tu brita itu, itu so kurang sama jo deng Tuhan Allah da pake pa torang for se nasehat pa ngoni. So itu, atas nama Kristus, torang mohon pa ngoni supaya kase jo tu ngoni pe diri pa Tuhan Allah kong ngoni pe hubungan deng Dia bole mo jadi bagus.

²¹Kristus itu nyanda perna beking dosa, mar Tuhan Allah beking Dia tanggong tu torang pe dosa-dosa, itu sama deng Tuhan Allah beking Kristus jadi orang yang ja beking dosa. Tuhan Allah beking pa Kristus rupa itu supaya sapa jo yang percaya pa Kristus, Tuhan Allah beking tu orang itu jadi orang yang butul di muka pa Dia.