Read Malay, Manado 2 Korintus 9 Bible Online

2 Korintus 9 - Malay, Manado bible

2 Korintus 9

¹Sebenarnya kita nyanda perlu lei mo tulis pa ngoni tentang kase doi sumbangan for bantu pa Tuhan pe orang-orang yang miskin tu ada di Yerusalem.

²Soalnya kita so tau kalu ngoni tu orang-orang yang ada di daera Akhaya rela mo babantu pa dorang, kong itu no tu kita da se bangga-bangga akang tentang ngoni pa tu orang-orang di daera Makedonia. Kita da bilang pa dorang di sana kalu ngoni so siap dari taong lalu for mo bantu kase doi sumbangan pa Tuhan pe orang-orang di Yerusalem. Kong ngoni pe smangat itu so beking banya orang lei di Makedonia jadi smangat for babantu rupa itu.

³Mar biar lei bagitu, kita utus tu sudara-sudara yang percaya itu pa ngoni supaya dorang bole bantu pa ngoni for urus tu doi sumbangan itu, deng bagitu orang bole lia kalu apa tu torang da se bangga-bangga akang tentang ngoni itu bukang cirita dusta. So itu, lebe bae ngoni siap jo sama deng tu kita so bilang pa orang-orang kalu ngoni so siap for babantu.

⁴Soalnya jang sampe waktu tu orang-orang dari Makedonia datang pa ngoni sama-sama deng kita, dorang dapa ngoni blum siap. Trus kalu dorang dapa ngoni blum siap, pe malo skali torang nanti, lantaran torang so bilang pa dorang kalu torang yakin ngoni mo babantu, kong ngoni lei tantu katu mo malo.

⁵So itu no kita rasa perlu for minta pa tu sudara-sudara yang percaya itu for brangkat lebe dulu dari kita pigi pa ngoni, supaya dorang bole lebe dulu se siap tu doi sumbangan yang ngoni so janji mo kase dulu. Kong kalu itu so tasadia, itu jadi bukti tu ngoni pe hati yang tulus ja bakase, deng bukang bakase lantaran da dapa paksa.

⁶Inga jo ini: tu orang yang da baambor bibit cuma sadiki, pasti dia mo bapanen cuma sadiki lei. Mar tu orang yang da baambor bibit banya, pasti dia mo bapanen banya lei.

⁷Tiap orang yang bakase, dia itu jang bakase deng rasa manyasal di hati ato bakase lantaran da dapa paksa, mar dia bakase jo lantaran dia so beking keputusan lebe dulu pa de pe hati kalu dia suka mo bakase. Soalnya Tuhan Allah sayang pa orang yang bakase deng hati snang.

⁸Kong Tuhan Allah itu mampu for kase tunjung samua tu Dia pe bae pa ngoni deng talebe-lebe, supaya ngoni slalu nyanda kurang di sgala hal malatare ngoni bole mampu beking banya hal yang bae for orang laeng.

⁹Di Kitab Suci da tulis bagini, “Tuhan Allah ja se berbage deng bakase pa orang-orang miskin, kong tu butul yang Dia ja beking itu mo ada for slama-lamanya.”

¹⁰Tuhan yang se sadia tu bibit for petani mo se ambor, Dia yang se sadia akang makanan for torang mo makang. Dia lei yang mo se sadia tu bibit deng beking lebe banya tu bibit yang ngoni mo se ambor, kong deng bagitu ngoni lei bole mo lebe beking tu bae pa orang laeng.

¹¹Ngoni mo kaya di samua hal sama deng itu supaya ngoni bole lei bakase deng lebe pa orang laeng. Kong nanti samua yang ngoni kase tu torang da se berbage pa orang-orang, itu mo beking banya orang bilang makase banya pa Tuhan Allah.

¹²Soalnya tu ngoni pe bakase for bantu se cukup akang tu Tuhan pe orang-orang yang kekurangan, itu bukang cuma beking cukup tu dorang pe keperluan, mar itu lei mo beking banya orang bilang makase pa Tuhan Allah.

¹³Kong lantaran ngoni pe bakase yang dorang lia itu, itu beking dorang mo puji deng hormat pa Tuhan Allah lantaran dorang lia kalu ngoni setia ja iko tu Kabar Bae tentang Kristus yang ngoni percaya, deng lantaran dorang lia tu ngoni pe pangbae suka ja bakase sumbangan itu pa dorang deng lei pa orang laeng.

¹⁴Kong dorang mo basombayang akang pa ngoni deng rasa sayang di hati, lantaran Tuhan Allah so se tunjung tu Dia pe bae pe banya pa ngoni.

¹⁵Torang bilang makase pa Tuhan Allah lantaran tu Dia pe bae yang Dia da se tunjung pa torang itu nyanda mampu torang mo kase tau deng kata-kata.