Read Malay, Manado Galatia 3 Bible Online

Galatia 3 - Malay, Manado bible

Galatia 3

¹Hei ngoni tu orang-orang percaya di Galatia, ngoni biongo. Sapa yang so pengaruhi pa ngoni for iko tu ajaran yang sala? Kita to so se tau deng jelas di muka-muka pa ngoni kalu Yesus Kristus da mati di kayu salib for torang samua.

²No skarang cuma ini tu kita mo cari tau dari pa ngoni: apa ngoni da trima tu Roh Kudus lantaran ngoni da beking tu atoran-atoran di kitab Taurat? Nyanda to? Ngoni da trima tu Roh Kudus lantaran ngoni da dengar tu Kabar Bae tentang Yesus trus ngoni percaya.

³Waktu ngoni baru percaya pa Yesus Kristus, tu Roh Kudus da bakarja kong kuasai tu ngoni pe hidop, mar skarang ngoni pake ngoni pe kekuatan sbagai manusia supaya ngoni jadi orang yang butul di muka pa Tuhan Allah. Mustinya ngoni jang jadi biongo rupa itu.

⁴Kalu ngoni mo babale bagitu, sia-sia dang tu siksa yang pe banya tu ngoni da dapa dulu waktu ngoni baru percaya pa Yesus. Masa dang kong mo jadi sia-sia rupa itu.

⁵Sudara-sudara, Tuhan Allah so kase tu Dia pe Roh pa ngoni deng beking mujisat di antara pa ngoni. Apa ngoni pikir Dia da beking tu samua itu lantaran ngoni da beking tu atoran-atoran di kitab Taurat? Nyanda kasiang, mar Dia beking tu samua itu cuma lantaran ngoni da dengar tu Kabar Bae tentang Yesus trus ngoni percaya.

⁶Bagitu lei deng Abraham, di Kitab Suci da tulis bagini, “Abraham percaya pa Tuhan Allah, kong Tuhan Allah beking dia jadi orang yang butul di muka pa Tuhan.”

⁷Jadi dari situ ngoni bole tau deng jelas kalu samua orang yang percaya pa Tuhan Allah, dorang itu jadi Abraham pe keturunan.

⁸Di Kitab Suci, torang bole tau kalu dari dulu Tuhan Allah so rencana mo beking tu orang-orang bukang Yahudi jadi orang yang butul di muka pa Dia kalu dorang percaya pa Kristus. Dulu Tuhan Allah da kase tau tu Kabar Bae tentang Yesus pa Abraham, bagini tu Kabar Bae, “Samua suku bangsa mo dapa berkat lewat pa ngana.”

⁹Jadi Tuhan Allah kase berkat pa Abraham lantaran Abraham pe percaya pa Tuhan. No bagitu lei deng torang samua yang percaya pa Tuhan, torang lei mo trima tu berkat dari Tuhan Allah, tu berkat yang sama deng tu Abraham da trima.

¹⁰Soalnya tu orang-orang yang brusaha for jadi orang yang butul di muka pa Tuhan deng cara iko tu atoran-atoran di kitab Taurat, dorang itu no tu orang-orang yang dapa kutuk dari Tuhan Allah lantaran nyanda ada dari pa dorang tu mampu iko samua tu atoran itu. Soalnya di Kitab Suci da tulis bagini, “Sapa yang nyanda iko samua tu atoran di kitab Taurat, dia itu mo dapa kutuk dari Tuhan Allah.”

¹¹Jadi torang tau deng jelas kalu nyanda ada orang yang Tuhan Allah mo beking jadi orang yang butul di muka pa Dia lantaran tu orang itu da iko tu atoran-atoran di kitab Taurat. Soalnya di Kitab Suci da tulis bagini, “Tu orang-orang yang percaya pa Tuhan, Tuhan beking dorang itu jadi orang yang butul di muka pa Dia kong dorang mo dapa tu hidop kekal.”

¹²Mar kalu torang iko tu atoran-atoran di kitab Taurat supaya Tuhan Allah bole beking torang jadi butul di muka pa Dia, itu de pe arti torang bagantong pa torang pe diri sandiri for jadi orang yang butul di muka pa Tuhan, torang nyanda bagantong pa torang pe percaya pa Tuhan Allah. Soalnya di Kitab Suci da bilang bagini, “Orang yang iko tu atoran-atoran di kitab Taurat, dorang hidop cuma ja beking tu atoran-atoran itu.”

¹³Kong torang samua pantas dapa kutuk lantaran torang nyanda mampu for iko atoran-atoran di kitab Taurat. Mar biar lei bagitu, Kristus se bebas pa torang dari tu kutuk itu deng cara Dia kase Dia pe diri dapa kutuk mati for torang. Soalnya dari lei dulu ada tatulis di Kitab Suci bagini, “Orang yang dapa hukuman mati di kayu salib, dia itu sama deng dapa kutuk dari Tuhan Allah.”

¹⁴Kristus Yesus se bebas pa torang dari tu atoran-atoran di kitab Taurat supaya tu orang-orang yang bukang Yahudi lei bole dapa bagean dari tu berkat yang beking torang jadi butul di muka pa Tuhan Allah, tu berkat itu yang Tuhan so janji pa Abraham dulu. Jadi, kalu torang samua percaya pa Kristus Yesus, torang samua lei mo trima tu Tuhan pe Roh yang Tuhan so janji dari dulu itu.

¹⁵Sudara-sudara, kita mo kase tau bagimana manusia pe biasa ja beking satu perjanjian. Biasanya kalu manusia beking perjanjian trus dorang beking sah tu dorang pe perjanjian itu, so nyanda ada lei orang laeng yang bole mo tamba akang sesuatu di perjanjian itu ato mo kase batal tu perjanjian itu, biar lei katu tu perjanjian itu cuma manusia yang da beking.

¹⁶Bagitu lei no deng Tuhan Allah pe janji-janji pa Abraham deng Abraham pe keturunan. Tuhan Allah nyanda bilang tu janji-janji itu pa “tu Abraham pe keturunan-keturunan,” rupa jo itu for banya orang mar Dia bilang tu janji-janji itu cuma pa satu orang “tu Abraham pe keturunan,” Dia itu no tu Kristus.

¹⁷Kita pe maksut bagini: Tuhan Allah so lebe dulu da beking tu perjanjian deng Abraham, kong Tuhan Allah so beking sah tu perjanjian itu. Abis itu, ampa ratus tiga pulu taong brikut, Tuhan Allah lei kase tu atoran-atoran pa Musa, tu atoran-atoran di kitab Taurat. Jadi tu atoran-atoran yang da muncul ka blakang itu nimbole mo kase batal tu perjanjian yang so lebe dulu ada itu deng lei nimbole mo beking hapus tu perjanjian itu.

¹⁸Soalnya kalu ngoni musti lebe dulu beking tu atoran-atoran itu supaya ngoni bole trima apa tu Tuhan Allah da janji, itu kasiang de pe nama bukang janji. Mar yang sebenarnya Tuhan Allah memang mo kase pa ngoni tu janji yang Dia so kase pa Abraham dulu, Dia mo kase itu pa ngoni deng cuma-cuma lantaran Dia so janji mo kase itu.

¹⁹Jadi kalu Tuhan Allah so lebe dulu beking perjanjian deng Abraham, no apa dang de pe maksut kong Tuhan Allah da kase lei tu atoran-atoran di kitab Taurat? Sebenarnya Tuhan Allah tamba akang atoran-atoran itu supaya torang manusia bole tau tu torang pe dosa. Jadi waktu dulu itu, orang-orang musti iko akang tu atoran-atoran itu sampe tu Abraham pe keturunan yang satu itu datang. Tuhan Allah suru tu Dia pe malaekat-malaekat for kase tau tu atoran-atoran itu pa Musa, kong Musa jadi prantara for bilang akang tu atoran-atoran itu.

²⁰Biasanya waktu beking perjanjian, musti ada orang yang jadi prantara for tu orang-orang yang da beking perjanjian. Mar waktu Tuhan Allah beking perjanjian deng Abraham, Dia nyanda pake prantara, Tuhan Allah sandiri yang beking tu perjanjian itu.

²¹Jang ngoni pikir kalu tu atoran-atoran di kitab Taurat yang Tuhan da kase pa Musa itu baku malawang deng tu Dia pe janji pa Abraham yang so lebe dulu ada, itu sama skali nyanda baku malawang. Kalu misalnya tu atoran-atoran itu da kase for torang iko akang supaya bole dapa tu hidop kekal, itu de pe arti torang iko jo tu atoran-atoran itu supaya Tuhan Allah bole beking torang jadi butul di muka pa Dia, mar yang sebenarnya bukang bagitu.

²²Di Kitab Suci da tulis bagini, “Samua manusia di dunia ini so taika deng dosa.” Jadi lantaran samua manusia so taika deng dosa, so itu Tuhan Allah beking tu Dia pe janji deng Abraham itu supaya sapa yang percaya pa Yesus Kristus, dia itu mo dapa tu janji hidop kekal yang Tuhan Allah mo kase.

²³Dulu seblum torang percaya pa Yesus, torang iko tu atoran-atoran di kitab Taurat. Waktu itu, torang sama deng tu orang yang dapa tahang di bui, lantaran torang taika skali deng tu atoran-atoran itu. Torang taika bagitu sampe di waktu Kristus datang kong torang bole percaya pa Dia.

²⁴Jadi tu atoran-atoran di kitab Taurat itu ada pa torang, itu for se tunjung pa torang tu cara hidop sampe di waktu Kristus datang ka dunia. Waktu Kristus datang, sapa jo yang percaya pa Dia, Tuhan Allah beking dia jadi orang yang butul di muka pa Tuhan Allah.

²⁵Jadi torang so nyanda perlu lei taika deng tu atoran-atoran di kitab Taurat, lantaran skarang torang so bole percaya pa Kristus.

²⁶Ngoni ini so percaya pa Kristus Yesus, so itu ngoni so jadi Tuhan Allah pe anak-anak.

²⁷Ngoni so dapa baptis, itu se tunjung kalu ngoni so percaya pa Kristus, ngoni so trima tu Kristus pe sifat pa ngoni pe diri. Tu Dia pe sifat yang ada pa ngoni pe diri itu bole mo se sama deng tu baju yang ngoni ja pake pa ngoni pe diri.

²⁸Di muka pa Tuhan Allah, samua orang yang so percaya pa Kristus so nyanda ada beda: biar itu orang Yahudi ato orang bukang Yahudi, biar budak ato orang bebas, biar laki-laki ato parampuang, torang samua ini sama-sama orang-orang yang so percaya pa Kristus Yesus.

²⁹Kong lei kalu ngoni itu Kristus pe orang-orang, itu de pe arti ngoni lei so jadi Abraham pe keturunan, ngoni lei mo trima yang Tuhan Allah da janji dulu pa Abraham.