Read Malay, Manado Galatia 4 Bible Online

Galatia 4 - Malay, Manado bible

Galatia 4

¹Sudara-sudara, kita mo jelaskan hal itu deng conto bagini: kalu ada satu orang yang nanti mo trima warisan dari de pe orang tua, mar kalu dia masi di bawa umur, dia blum bole trima itu. Dia itu kurang sama jo deng tu budak yang nyanda ada hak apa-apa deng tu de pe bos pe warisan. Jadi biar dia itu sebenarnya yang punya tu warisan, mar lantaran dia masi di bawa umur, dia blum bole mo dapa tu warisan itu.

²Jadi ada orang-orang yang urus pa dia deng lei awasi tu dia pe warisan sampe di waktu yang de pe orang tua so tentukan for mo trima tu warisan.

³Bagitu lei no deng torang manusia waktu Yesus blum datang, waktu itu torang bole mo se sama deng tu anak yang masi di bawa umur, torang masi taiko-iko deng tu atoran-atoran di dunia ini sampe torang sama deng da jadi budak dari tu atoran-atoran itu.

⁴Mar serta tu waktu yang Tuhan Allah da tentukan so sampe, Tuhan Allah utus tu Dia pe Anak datang ka dunia. Tu Dia pe Anak itu yang da lahir dari satu parampuang, kong tu Anak itu hidop iko tu atoran-atoran di kitab Taurat.

⁵Tu Anak Allah itu datang ka dunia for se bebas pa torang yang taika deng tu atoran-atoran itu supaya torang bole jadi Tuhan Allah pe anak-anak.

⁶So lantaran torang so jadi Tuhan Allah pe anak-anak, so itu Tuhan Allah suru tu Dia pe Anak pe Roh maso pa torang pe hati, kong tu Roh yang ada pa torang pe hati itu bole mo bapangge pa Tuhan Allah itu, “Ya Abba, ya Bapa”.

⁷Jadi ngoni itu bukang lei budak dari tu atoran-atoran mar ngoni itu Tuhan Allah pe anak-anak. Kong kalu ngoni itu anak, ngoni itu pasti mo dapa samua warisan yang Tuhan Allah so janji mo kase pa Dia pe anak-anak.

⁸Dulu waktu ngoni blum kanal pa Tuhan Allah, ngoni itu ja iko pa opo-opo, itu sama deng ngoni jadi tu opo-opo itu pe budak, padahal tu opo-opo itu bukang Tuhan Allah.

⁹Mar skarang ngoni so kanal pa Tuhan Allah, ato de pe butul ngoni ini Tuhan Allah so kanal. Jadi mustinya ngoni sama skali jang babale lei for iko tu adat deng tu atoran-atoran yang nyanda kuat itu deng yang nyanda ada de pe guna for ngoni. Mar kiapa dang ngoni so babale iko ulang tu adat deng atoran-atoran itu, itu sama deng ngoni jadi budak ulang dari tu atoran-atoran itu.

¹⁰Ngoni slalu ja rayakan tu hari-hari raya iko tu atoran-atoran di kitab Taurat rupa tu hari raya di hari-hari tertentu, bulan-bulan, waktu-waktu yang so tetap deng lei tu prayaan tiap taong.

¹¹Kita kuatir deng ngoni rayakan tu hari-hari itu, jang sampe ngoni so nyanda lei bagantong pa Yesus kong kita pe karja kras for se tau pa ngoni tentang Yesus itu so nyanda ada de pe guna lei.

¹²Sudara-sudara, kita ini orang Yahudi mar biar kita orang Yahudi, kita so jadi sama deng ngoni tu orang yang bukang Yahudi lantaran kita so nyanda taika lei deng tu atoran-atoran di kitab Taurat. So itu, kita bamohon pa ngoni supaya ngoni conto jo tu kita pe cara hidop skarang ini yang so nyanda taika lei deng tu atoran-atoran itu. Waktu kita ada sama-sama deng ngoni, ngoni nyanda perna beking sala apa-apa pa kita.

¹³Ngoni pasti masi inga waktu kita da datang pertama pa ngoni. Waktu itu, kita da datang pa ngoni lantaran kita da dapa saki trus kita se tau lei tu Kabar Bae tentang Yesus pa ngoni.

¹⁴Waktu itu, kita saki sadiki brat sampe kita pe badan yang saki ini jadi beban pa ngoni, mar ngoni nyanda perna hina ato tolak pa kita, ngoni trima pa kita sama deng kita ini Tuhan Allah pe malaekat, ngoni da sambut pa kita rupa deng kita ini Kristus Yesus sandiri.

¹⁵Ngoni dapa lia pe snang skali waktu itu. Mar skarang, kiapa dang ngoni so nyanda snang rupa itu lei? Kita sandiri bole mo basaksi tentang bagimana ngoni dulu, waktu itu ngoni suka skali bantu pa kita, kalu perlu lei biar ngoni cungkel tu ngoni pe mata kong kase pa kita.

¹⁶Mar skarang ngoni pikir kita ini tu ngoni pe musu, padahal kita cuma da kase tau tu butul pa ngoni tentang Kristus Yesus.

¹⁷Tu orang-orang yang se ajar tu atoran-atoran itu, dorang brusaha skali tarek pa ngoni supaya ngoni iko pa dorang, mar tu dorang da beking itu nyanda bagus. Dorang suka beking putus tu torang pe hubungan deng ngoni supaya ngoni mo iko pa dorang kong bukang pa torang.

¹⁸Memang bagus kalu orang brusaha trus for beking sesuatu yang bae asal trus-trus bagitu, jang sampe cuma waktu kita ada tu orang itu beking bagitu.

¹⁹Hei ngoni yang kita so anggap kita pe anak-anak, skarang kita pe hati saki skali da pikir-pikir tentang ngoni, tu saki yang kita da rasa sama deng tu saki yang parampuang da rasa waktu mo melahirkan. Kalu ngoni pe sifat so bruba jadi sama deng Kristus pe sifat, waktu itu baru no tu kita pe saki hati mo ilang.

²⁰Kita suka skali kalu kita da sama-sama deng ngoni di situ supaya kita bole mo babicara lebe bae-bae pa ngoni, lantaran kita so nintau mo beking bagimana lei pa ngoni.

²¹Hei ngoni tu sudara-sudara yang suka hidop iko tu atoran-atoran di kitab Taurat, ngoni sebenarnya memang nyanda mangarti deng apa tu da tatulis di kitab Taurat.

²²Di kitab Taurat da tulis kalu tu Abraham pe anak laki-laki ada dua. Tu satu anak lahir dari satu budak parampuang, kong tu anak yang satu lahir dari satu parampuang yang bukang budak.

²³Tu anak yang lahir dari tu budak parampuang, tu anak itu lahir lantaran manusia pe mau sandiri. Mar tu anak yang lahir dari tu parampuang yang bukang budak, dia itu lahir lantaran Tuhan Allah so janji pa Abraham.

²⁴Tu Abraham pe dua bini itu bole mo se sama deng dua perjanjian yang ada di Kitab Suci. Tu Abraham pe bini Hagar itu bole mo se sama deng tu perjanjian antara Tuhan Allah deng orang Israel waktu di Gunung Sinai. Hagar itu sama deng mama dari samua orang yang da jadi budak dari tu atoran-atoran di kitab Taurat.

²⁵Jadi tu Hagar itu bole mo se sama deng tu Gunung Sinai yang ada di tana Arab, deng lei bole mo se sama deng Yerusalem skarang ini. Soalnya kwa tu orang-orang Yerusalem so jadi budak dari tu atoran-atoran di kitab Taurat, dorang itu so jadi budak sama deng tu Hagar.

²⁶Mar tu janji yang laeng itu da se sama deng Abraham pe bini tu Sara. Sara itu bole mo se sama deng tu Yerusalem yang di sorga. Dia itu mama dari torang samua tu orang yang percaya, tu orang-orang yang so bebas dari taika deng tu atoran-atoran di kitab Taurat.

²⁷Soalnya di Kitab Suci da tulis bagini, “Hei ngana tu parampuang yang mandul, yang nyanda perna se lahir anak, ngana musti snang! Snang jo deng bersorak jo ngana tu parampuang yang nyanda perna rasa tu saki lantaran da se lahir anak! Soalnya tu parampuang yang de pe laki da se tinggal, dia dapa anak lebe banya dari tu parampuang yang ada laki.”

²⁸Jadi ngoni sudara-sudara, ngoni itu so jadi Tuhan Allah pe anak-anak. Ngoni itu sama deng Sara pe anak Ishak yang lahir lantaran Tuhan Allah so janji pa Abraham.

²⁹Dulu tu Hagar pe anak lahir sama deng biasa anak ja lahir lantaran manusia pe mau sandiri, tu anak itu da siksa tu Sara pe anak, tu anak yang lahir lantaran tu kuasa dari Tuhan pe Roh. Jadi bagitu lei deng tu da jadi skarang, tu orang yang iko tu atoran-atoran di kitab Taurat ja siksa pa torang yang percaya pa Kristus.

³⁰Mar di Kitab Suci da tulis bagini, “User jo se kaluar tu budak parampuang itu deng de pe anak. Soalnya dia pe anak itu nimbole trima tu warisan dari pa de pe papa sama-sama deng tu anak yang da lahir dari tu parampuang yang bukang budak itu.”

³¹Jadi sudara-sudara, torang ini bukang sama deng anak-anak dari tu parampuang yang da jadi budak lantaran da iko tu atoran-atoran di kitab Taurat, mar torang ini sama deng anak-anak dari tu parampuang yang bukang budak lantaran torang percaya.