Read Malay, Manado Galatia 6 Bible Online

Galatia 6 - Malay, Manado bible

Galatia 6

¹Sudara-sudara, kalu ngoni dapa satu jo dari antara pa ngoni yang beking dosa, lebe bae ngoni yang Roh Kudus da kuasai kase nasehat deng bae-bae pa dia supaya dia bole babale ka jalang yang butul. Ngoni lei musti bajaga-jaga supaya ngoni sandiri jang sampe tagoda for beking dosa sama deng tu orang itu da beking.

²Kalu ada dari pa ngoni yang dapa susa, ngoni musti baku-baku bantu jo satu deng laeng, itu sama deng ngoni bantu pikul tu orang laeng pe beban. Kalu ngoni baku bantu bagitu, ngoni so beking tu prenta yang Kristus da suru for ngoni mo beking.

³Soalnya kalu ada orang yang pikir dia pe diri itu lebe penting dari tu orang laeng padahal sama skali nyanda bagitu, dia so tipu tu de pe diri sandiri.

⁴Lebe bae tiap orang tarukira bae-bae tentang apa tu dia so beking, apa tu dia so beking itu bae ato nyanda. Kalu yang dia da beking itu bae, dia bole rasa bangga deng tu dia da beking itu, kong nyanda perlu dia se banding tu dia da beking itu deng tu orang laeng da beking.

⁵Soalnya tiap orang musti pikul tanggong jawab masing-masing dari apa tu dia da beking.

⁶Tiap orang yang da dapa se ajar akang tu Tuhan Allah pe firman, dia itu musti berbage akang tu dia pe hasil karja pa tu orang yang da mangajar pa dia tentang tu Tuhan Allah pe firman itu.

⁷Sudara-sudara, jang sampe ngoni sala mangarti: apa tu torang da beking, itu lei no yang nanti Tuhan Allah mo pake for tentukan apa yang Dia mo kase for se balas pa torang, itu sama deng apa tu torang da tanang di kobong, itu lei nanti yang torang mo panen. Jadi jang ada yang bapikir kalu dia bole mo beking bodok pa Tuhan Allah.

⁸Sapa yang hidop ja beking tu jaha iko tu dia pe keinginan yang nyanda bagus, nanti dia itu mo dapa balasan dari Tuhan Allah, dia itu mo binasa. Mar sapa yang beking tu bae iko tu Tuhan pe Roh pe mau, nanti dia itu mo dapa balasan dari Tuhan pe Roh, dia itu mo dapa hidop kekal.

⁹Torang jang pastiu for slalu ja beking tu bae, lantaran kalu torang tetap ja beking tu bae, Tuhan mo balas tu torang pe bae itu di waktu yang Dia so tentukan, itu sama deng petani mo dapa hasil dari apa yang dia da tanang di kobong.

¹⁰Jadi slama torang masi ada kesempatan, mari jo torang beking tu bae pa samua orang, lebe-lebe pa torang pe sudara-sudara yang sama-sama percaya.

¹¹Sudara-sudara, ngoni tarukira jo bae-bae. Kita da tulis tu bagean surat ini deng kita pe tangan sandiri, tu tulisan yang pake huruf basar-basar itu.

¹²Tu orang-orang Yahudi yang suka orang-orang puji, dorang itu yang da paksa pa ngoni yang so iko pa Kristus supaya ngoni lei musti dapa sunat. Dorang yang bapaksa itu, tu orang Yahudi yang so percaya pa Kristus, lantaran kwa dorang tako kalu tu orang-orang Yahudi laeng nanti mo siksa pa dorang kalu dorang cuma mangajar for percaya pa Kristus yang mati di kayu salib kong nyanda mangajar for iko tu atoran sunat.

¹³Padahal sebenarnya, dorang yang iko tu atoran sunat itu for beking tu atoran-atoran di kitab Taurat, dorang sandiri nyanda iko samua tu atoran di kitab Taurat. Mar dorang brusaha buju pa ngoni iko tu atoran sunat supaya dorang bole angka diri sandiri deng babilang kalu ngoni so iko pa dorang dapa sunat.

¹⁴Mar for kita, kita nimau mo angka diri tentang apa-apa, kita cuma mo angka-angka tu torang pe Tuhan Yesus Kristus deng apa tu Dia so beking di kayu salib. Soalnya waktu Yesus dapa salib, tu kita pe hubungan deng tu keinginan-keinginan duniawi so jadi putus, itu sama jo deng kita lei da dapa salib. Kong tu kita pe hubungan deng tu orang-orang yang iko dunia pe mau so jadi putus lei.

¹⁵Soalnya dapa sunat ato nyanda dapa sunat, itu bukang hal yang penting. Mar yang penting, torang dapa tu hidop baru dari pa Tuhan.

¹⁶Trus ngoni yang hidop iko apa tu kita da bilang ini, kita minta supaya Tuhan Allah beking ngoni hidop deng hati tenang deng lei se tunjung tu Dia pe rasa kasiang pa ngoni. Ngoni yang hidop bagitu, ngoni itu no tu Tuhan Allah pe orang-orang.[1]

¹⁷Kita minta supaya jang ada orang yang beking susa pa kita. Soalnya ada bekas-bekas luka pa kita pe badan lantaran waktu kita se tau tentang Yesus itu ada orang-orang yang siksa pa kita, itu samua tanda-tanda kalu kita ini Yesus pe orang.

¹⁸Sudara-sudara, kita minta pa Yesus Kristus tu torang pe Tuhan for se tunjung Dia pe bae pa ngoni. Amin.