Read Malay, Manado Efesus 1 Bible Online

Efesus 1 - Malay, Manado bible

Efesus 1

¹Ni surat dari kita, Paulus. Kita ini Kristus Yesus pe rasul tu Dia pe utusan lantaran itu Tuhan Allah pe mau. Ni surat for ngoni tu Tuhan pe orang-orang di Efesus, ngoni yang so percaya pa Kristus Yesus.

²Kita minta pa Tuhan Allah, tu torang pe Bapa deng pa Tuhan Yesus Kristus supaya kase tunjung tu bae pa ngoni deng beking ngoni hidop deng hati tenang.

³Mari jo torang puji pa Tuhan Allah, Dia itu Bapa dari torang pe Tuhan Yesus Kristus. Dia so kase samua berkat rohani dari sorga pa torang lantaran torang so percaya pa Kristus.

⁴Soalnya seblum Tuhan Allah beking ni dunia, Dia so pili pa torang for mo percaya pa Yesus Kristus. Dia pili pa torang supaya torang bole hidop kudus deng nyanda ada sala apa-apa di muka pa Dia.

⁵Tuhan Allah sayang pa torang, so itu dari lei dulu skali Dia so tentukan torang ini jadi Dia pe anak-anak. Torang jadi Dia pe anak-anak itu lewat Yesus Kristus, itu no tu Dia pe mau yang Dia suka beking.

⁶So itu, torang samua puji pa Tuhan Allah lantaran Dia so se tunjung tu Dia pe sayang yang luar biasa pa torang. Dia so se tunjung tu Dia pe sayang yang luar biasa itu, lantaran torang so percaya pa Yesus Kristus yang Dia sayang.

⁷Yesus Kristus mati kong Dia pe dara tacura, kong lewat Dia pe dara itu Tuhan Allah se bebas pa torang dari torang pe dosa-dosa lantaran torang so percaya pa Kristus, jadi torang bole dapa ampung dari torang pe dosa-dosa. Kong samua itu torang dapa lantaran Tuhan Allah pe sayang pa torang yang pe basar skali.

⁸Dia se tunjung tu Dia pe sayang itu deng nyanda ada batas, Dia lei beking torang jadi tau mana tu bae deng bole mo mangarti banya hal.

⁹Dulu nyanda ada yang tau tu Tuhan Allah pe mau, mar skarang Tuhan Allah so se tunjung tu Dia pe rencana pa torang, tu rencana yang Dia mo beking lewat Kristus.

¹⁰Ini tu Dia pe rencana itu: Tuhan Allah mo beking jadi satu samua yang di sorga deng samua yang di bumi di bawa Kristus pe kuasa, trus samua itu mo jadi pas di waktu yang Tuhan so tentukan.

¹¹Tuhan Allah ator samua yang ada itu, Dia ator itu iko tu Dia pe mau. Dari dulu skali, Dia so pili pa torang iko tu Dia pe mau, supaya torang bole mo trima apa yang Dia so janji mo kase pa torang lantaran torang so percaya pa Kristus.

¹²Jadi torang orang Yahudi yang so lebe dulu baharap deng yakin pa Kristus, torang bole mo puji deng hormat pa Dia yang luar biasa.

¹³Kong ngoni tu orang bukang Yahudi, skarang ngoni lei so dengar tu firman yang butul, trus ngoni so percaya pa Kristus. Tu firman yang butul itu no tu Kabar Bae tentang Yesus yang bole beking ngoni dapa slamat dari tu hukuman dosa. Ngoni so percaya pa Kristus, jadi Tuhan Allah kase tu Roh Kudus jadi tanda kalu ngoni itu Dia punya. Tu Roh Kudus itu yang Dia so janji mo kase.

¹⁴Tu Roh Kudus itu jadi jaminan for torang skarang ini sampe nanti torang trima apa yang Tuhan Allah so janji mo kase pa torang. Tu jaminan itu ada for torang yang jadi Tuhan Allah punya sampe di hari Tuhan Allah se bebas pa torang dari samua yang jaha. So itu, mari jo torang puji pa Tuhan Allah yang luar biasa.

¹⁵Tuhan Allah so beking banya hal yang bae rupa samua itu pa ngoni, so itu waktu kita dengar kalu ngoni so percaya pa Tuhan Yesus deng bagimana ngoni pe basayang pa samua tu Tuhan pe orang-orang,

¹⁶kita nyanda brenti-brenti bilang makase pa Tuhan Allah lantaran ngoni. Waktu kita basombayang, kita slalu inga for basombayang akang for ngoni.

¹⁷Kita minta pa Tuhan Allah tu Bapa yang luar biasa, tu torang pe Tuhan Yesus Kristus ja semba, supaya Dia pe Roh beking ngoni jadi tau mana tu bae deng mo kase tunjung tentang Tuhan Allah pa ngoni supaya ngoni bole butul-butul tau tentang Tuhan Allah.

¹⁸Kita minta lei pa Tuhan Allah supaya se trang tu ngoni pe hati, deng supaya ngoni bole mangarti butul tentang tu harapan for mo dapa slamat dari Tuhan Allah tu da pangge pa ngoni for iko pa Dia. Deng kita minta lei pa Dia supaya ngoni lei mangarti butul kalu pe luar biasa skali tu samua yang Dia so janji mo kase pa Dia pe orang-orang.

¹⁹Trus kita minta lei pa Tuhan Allah supaya ngoni bole mangarti butul kalu pe hebat skali tu Dia pe kuasa yang bakarja pa torang yang percaya. Tu kuasa itu no tu Tuhan Allah pe kuasa yang luar biasa skali,

²⁰yang Dia da pake waktu Dia se hidop ulang pa Kristus sampe Kristus taangka ka sorga kong dudu di tampa yang paling terhormat di sabla kanan dari pa Tuhan Allah.

²¹Tu kuasa itu so ada pa Kristus, kong kuasa itu jao lebe tinggi dari samua kuasa yang ada, jao lebe tinggi dari samua yang pegang prenta, deng jao lebe tinggi dari samua yang berkuasa di bumi deng di langit. Dia berkuasa bukang cuma skarang, mar Dia berkuasa sampe slama-lamanya.

²²Kong Tuhan Allah kase kala samua supaya Kristus yang kuasai samua itu, itu sama deng Tuhan Allah taru samua yang ada itu di bawa Kristus pe kaki. Dia angka pa Kristus jadi pemimpin dari tu Dia pe jemaat, sama deng Kristus jadi kapala for tu Dia pe jemaat.

²³Kong torang samua ini tu Dia pe jemaat, torang bole mo se sama deng Dia pe badan. Samua yang ada pa Kristus, Dia kase lei pa torang tu Dia pe jemaat, Dia itu yang berkuasa pa samua yang ada di samua tampa.