Read Malay, Manado Efesus 2 Bible Online

Efesus 2 - Malay, Manado bible

Efesus 2

¹Sudara-sudara, dulu seblum ngoni percaya pa Yesus Kristus, ngoni hidop ja beking tu dosa deng ngoni ja langgar tu Tuhan pe prenta. Waktu itu, ngoni bole mo se sama jo deng so mati.

²Ngoni hidop ja beking tu dosa, ngoni ja iko tu dunia pe cara hidop deng ngoni ja iko akang tu setang pe bos pe mau. Tu setang pe bos itu no tu pemimpin dari tu kuasa-kuasa jaha yang berkuasa di langit, kong sampe skarang ini dia masi bakarja di hati orang-orang yang nimau mo dengar-dengaran pa Tuhan Allah.

³Dulu torang samua lei sama deng dorang itu, torang pe kalakuan iko tu keinginan manusia yang suka ja beking dosa, torang hidop iko tu torang pe nafsu yang besae deng iko tu torang pe pikiran yang besae. So itu, torang pantas Tuhan Allah hukum sama deng samua orang yang ja beking dosa.

⁴Mar Tuhan Allah sayang skali pa torang, so itu Dia se tunjung tu Dia pe rasa kasiang yang pe basar skali pa torang.

⁵Sebenarnya waktu torang hidop ja langgar tu Tuhan Allah pe prenta, torang bole mo se sama jo deng so mati. Mar waktu Tuhan Allah kase hidop ulang pa Yesus Kristus, itu sama deng Dia so kase hidop ulang pa torang. Jadi, torang ini bole slamat dari hukuman dosa, itu cuma lantaran Tuhan Allah da se tunjung Dia pe bae pa torang.

⁶Kristus Yesus mati, mar Tuhan Allah kase hidop ulang pa Dia, bagitu lei yang Tuhan Allah beking pa torang yang so percaya pa Kristus Yesus. Tuhan Allah kase hidop baru pa torang, kong Dia kase pa torang tampa for pegang prenta sama-sama deng Kristus Yesus di sorga.

⁷Tuhan Allah beking bagitu supaya pa de pe waktu nanti Dia bole kase tunjung pa torang kalu pe basar skali tu Dia pe sayang deng tu Dia pe bae pa torang yang so percaya pa Kristus Yesus.

⁸So lantaran Tuhan Allah so se tunjung tu Dia pe sayang pa torang, so itu torang yang percaya pa Kristus Yesus bole slamat dari hukuman dosa. Torang bole slamat cuma lantaran Tuhan Allah pe sayang pa torang, bukang lantaran torang pe usaha ja beking tu hal-hal bae.

⁹Jadi nyanda ada orang bole mo basombong bilang dia slamat lantaran dia pe usaha ja beking tu hal-hal bae.

¹⁰Soalnya Tuhan Allah beking torang yang so percaya pa Kristus Yesus jadi manusia baru, supaya torang ja beking tu hal-hal bae. Dari dulu Tuhan Allah so beking rencana for torang supaya torang bole hidop ja beking tu hal-hal bae.

¹¹Sudara-sudara, co ngoni inga tu ngoni pe hidop dulu. Dari jo ngoni lahir, ngoni itu orang-orang bukang Yahudi. Kong tu orang-orang Yahudi ja bilang kalu ngoni itu ‘orang-orang yang nyanda da sunat’, dorang anggap ngoni bukang Tuhan Allah pe orang-orang. Trus dorang ja bilang kalu dorang itu ‘orang-orang yang da sunat’, so itu dorang itu tu Tuhan Allah pe orang-orang. Padahal tu sunat cuma manusia ja beking di badan.

¹²Waktu itu, ngoni blum percaya pa Kristus. Ngoni itu sama deng orang luar, bukang orang Yahudi tu Israel pe keturunan. Jadi ngoni nyanda mo dapa tu Tuhan Allah pe janji-janji yang Dia mo kase pa tu orang-orang Israel. Ngoni da hidop di dunia ini nyanda ada hubungan deng Tuhan Allah, jadi nyanda ada yang ngoni bole baharap akang for dapa tu hidop kekal.

¹³Mar skarang ngoni so percaya pa Kristus Yesus, ngoni so nyanda sama deng dulu waktu ngoni masi hidop jao dari pa Tuhan Allah, skarang ngoni so jadi dekat deng Dia lantaran Kristus Yesus mati kong Dia pe dara tacura.

¹⁴Soalnya Yesus itu no yang beking torang samua bole hidop baku-baku bae. Dia beking torang tu orang-orang Yahudi deng orang-orang bukang Yahudi yang da baku musu jadi baku bae kong jadi satu, itu sama deng Dia beking ancor tu dinding beton yang da se baku pisa pa torang.

¹⁵Yesus mati di kayu salib, so itu tu atoran-atoran di kitab Taurat nyanda berlaku for mo dapa slamat. Deng Yesus beking bagitu, tu orang-orang Yahudi deng tu orang-orang bukang Yahudi bole jadi satu. Dorang yang dari dua klompo itu bole jadi manusia yang baru lantaran dorang so percaya pa Kristus, kong Dia beking dorang itu bole hidop baku-baku bae.

¹⁶Jadi lantaran Yesus da mati di kayu salib, Dia beking tu orang Yahudi deng tu orang bukang Yahudi itu pe hubungan deng Tuhan Allah jadi bagus, deng lei Dia beking tu dua klompo itu jadi satu kong baku bae.

¹⁷Dia datang ka dunia ini kase tau pa dua klompo itu kalu dorang bole baku bae deng Tuhan Allah. Dia kase tau itu pa orang-orang bukang Yahudi tu dulu jao dari Tuhan Allah, deng Dia kase tau lei pa orang-orang Yahudi tu dari dulu so dekat deng Tuhan Allah.

¹⁸Jadi lantaran Yesus beking bagitu, torang tu orang Yahudi deng orang yang bukang Yahudi so tabuka jalang for mo badekat pa Tuhan Allah tu torang pe Bapa, kong Dia pe Roh yang satu itu yang tolong pa torang for badekat pa Dia.

¹⁹Jadi, ngoni tu sudara-sudara yang bukang Yahudi, ngoni bukang lei orang asing ato orang luar, mar ngoni skarang so jadi Tuhan Allah pe orang-orang sama-sama deng torang tu orang-orang Yahudi, deng ngoni so tamaso Tuhan Allah pe kluarga.

²⁰Sudara-sudara, biasanya kalu orang se badiri satu ruma dia musti taru lebe dulu tu batu yang paling penting deng fondasi, baru abis itu susung tu batu for beking ruma. No bagitu lei deng torang yang percaya pa Kristus Yesus. Kristus Yesus itu sama deng batu yang paling penting dari torang pe percaya. Tu nabi-nabi deng Yesus pe rasul-rasul, dorang itu bole mo se sama deng tu fondasi yang ada di atas tu batu yang paling penting. Kong torang yang percaya pa Kristus bole mo se sama deng tu ruma yang da se badiri di atas tu fondasi deng tu batu yang paling penting itu.

²¹Torang yang so percaya pa Yesus bole mo se sama deng tu bahan-bahan bangunan yang da susung di atas fondasi yang kuat for beking ruma. Torang yang so percaya pa Tuhan, torang itu so jadi satu, kong torang itu bole mo se sama deng satu ruma yang da se kusus for Tuhan mo tinggal akang.

²²Kong skarang ngoni tu orang-orang bukang Yahudi yang so percaya pa Kristus Yesus, ngoni deng samua orang Yahudi yang so percaya ini so jadi sama deng satu ruma yang tu Roh Kudus da se badiri for jadi Tuhan Allah pe tampa tinggal.