Read Malay, Manado Filipi 2 Bible Online

Filipi 2 - Malay, Manado bible

Filipi 2

¹Sudara-sudara, ngoni itu so percaya pa Kristus, so itu Dia so beking ngoni pe hati kuat, ngoni bole dapa hibur lantaran Dia sayang pa ngoni, ngoni so jadi satu deng Roh Kudus, ngoni so ada hubungan dekat satu deng laeng, deng ngoni lei ada rasa kasiang pa orang laeng.

²So itu, ngoni beking jo kita pe hati lebe tatamba snang deng cara ngoni beking bagini: ngoni hidop jo satu hati deng satu pikiran, hidop baku-baku sayang, ngoni ada hubungan dekat satu deng laeng, deng lei ngoni hidop deng tujuan yang sama.

³Ngoni jang beking sesuatu supaya ngoni itu jadi lebe penting dari orang laeng ato supaya ngoni dapa pujian yang nyanda ada arti apa-apa, mar lebe bae ngoni hidop jo deng nyanda sombong, ngoni anggap jo tu orang laeng lebe penting dari ngoni pe diri sandiri.

⁴Trus ngoni lei jang cuma ja tarukira tu ngoni pe kepentingan sandiri, mar tarukira lei tu orang laeng pe kepentingan.

⁵Kong ngoni pe sifat musti sama deng Kristus Yesus pe sifat, yang bagini:

⁶Biar Dia itu sama persis deng Tuhan Allah, mar Dia nyanda pikir Dia pe posisi sbagai Tuhan Allah itu sesuatu yang musti mo tahang,

⁷malatare Dia se tinggal tu samua itu, trus datang ka dunia jadi manusia, kong beking Dia pe diri itu jadi sama deng budak.

⁸Kong waktu Dia sbagai manusia, Dia beking Dia pe diri jadi renda, kong Dia taat pa tu Tuhan Allah sampe Dia mati, malatare sampe mati di kayu salib.

⁹So itu, Tuhan Allah angka pa Dia di posisi yang lebe tinggi dari samua, Tuhan Allah kase pa Dia kuasa yang lebe basar dari tu samua kuasa yang ada,

¹⁰supaya lewat Dia pe kuasa itu, samua mo berlutut for semba pa Dia, samua yang ada di sorga, yang ada di bumi, deng yang ada di bawa bumi tu tampa for orang mati.

¹¹Trus samua dorang itu mo mangaku, “Yesus Kristus itu Tuhan tu torang ja iko akang,” deng bagitu Tuhan Allah tu Bapa mo dapa puji deng mo dapa hormat.

¹²Sudara-sudara tu kita sayang, kita tau waktu kita ada sama-sama deng ngoni, ngoni slalu dengar-dengaran pa Tuhan. So itu, ngoni musti beking sama deng itu bukang cuma waktu kita ada deng ngoni, mar ngoni musti lebe lei beking bagitu skarang waktu kita jao dari pa ngoni. Ngoni brusaha jo for hidop deng kalakuan yang pantas for tu orang yang Tuhan Allah so se slamat dari tu hukuman dosa, ngoni hidop jo punung hormat deng rasa tako pa Tuhan Allah.

¹³Soalnya Tuhan Allah sandiri yang bakarja pa ngoni pe hati supaya ngoni bole hidop iko Dia pe mau deng lei supaya ngoni mampu beking yang Dia suka ngoni mo beking.

¹⁴Samua yang ngoni beking, ngoni beking jo itu deng nyanda babamengelu deng lei jang baku-baku ambe.

¹⁵Deng ngoni nyanda babamengelu deng lei nyanda baku-baku ambe, itu se tunjung kalu ngoni itu memang Tuhan Allah pe anak-anak, ngoni hidop nyanda beking sala pa orang kong orang nyanda mo se sala pa ngoni, ngoni da hidop deng bae-bae di tenga-tenga tu orang-orang yang jaha deng orang-orang yang nintau tu butul, ngoni itu sama deng jadi bintang-bintang yang bacahaya di dunia yang glap.

¹⁶Ngoni pegang kuat jo tu Tuhan pe firman yang bole beking orang dapa hidop kekal. Kalu ngoni beking bagitu, kita bole rasa bangga nanti waktu Kristus datang ulang, lantaran ngoni so butul-butul percaya pa Yesus, kong so lantaran itu kita bole tau kalu tu kita pe karja di tenga-tenga pa ngoni yang dulu itu nyanda sia-sia mar ada de pe hasil.

¹⁷Dulu waktu pertama kita da se tau tu Kabar Bae tentang Yesus pa ngoni, ngoni jadi percaya kong srahkan ngoni pe hidop for beking tu Dia pe mau. Jadi biar lei kita dapa bunung lantaran kita se tau Kabar Bae pa ngoni, sampe ta pe dara tacura sama deng anggor yang da tacura di atas korban persembahan, itu nyanda apa-apa for kita. Kita pe hati tetap snang deng kita rasa snang sama-sama deng ngoni samua.

¹⁸Bagitu lei deng ngoni, kita harap ngoni pe hati snang sama deng itu deng lei bole mo rasa snang sama deng kita.

¹⁹Kita baharap deng yakin pa Tuhan Yesus kalu so nyanda lama lei kita so bole mo suru Timotius pigi pa ngoni. Deng bagitu, waktu dia babale ulang pa kita di sini, kita pe hati lei bole snang lantaran kita dengar tu ngoni pe kabar dari pa dia.

²⁰Soalnya kita blum baku dapa deng orang yang satu hati deng satu pikiran deng kita rupa tu Timotius, dia itu memang butul-butul ja tarukira tu ngoni pe kepentingan.

²¹Orang laeng cuma ja pikir tu dorang pe kepentingan sandiri, dorang nyanda ja pikir tu Yesus Kristus pe mau.

²²Mar ngoni samua so tau tu Timotius pe bae. Dia karja sama-sama deng kita se tau tu Kabar Bae tentang Yesus, dia tolong pa kita se tau tu Kabar bae, itu sama deng anak yang tolong tu de pe papa.

²³So itu, kalu so jelas bagimana tu keputusan dari tu kita pe perkara nanti, kita mo iko suru dia for pigi pa ngoni.

²⁴Kita yakin kalu Tuhan mo tolong pa kita supaya so nyanda lama lei kita sandiri yang mo pigi pa ngoni.

²⁵Skarang ini kita pikir kalu kita perlu mo suru tu Epafroditus bale ulang pa ngoni, dia itu tu sudara yang sama-sama percaya. Dulu ngoni da suru pa dia for datang bantu tu kita pe perlu di sini, kong dia so berjuang sama-sama ja beking tu karja yang Tuhan da kase.

²⁶Kita rasa perlu mo suru dia bale ulang pa ngoni lantaran dia itu so rindu skali pa ngoni samua, kong lei dia pe hati rasa susa lantaran dia tau kalu ngoni so dengar dia da saki.

²⁷Memang butul dia da saki, malatare amper-amper mo mati. Mar Tuhan Allah kase tunjung tu Dia pe rasa kasiang pa dia sampe dia bole bae. Kong tu rasa kasiang yang Tuhan Allah da kase tunjung itu bukang cuma for dia pe bae mar for kita lei supaya tu kita pe susa jang sampe mo tatamba lei kalu misalnya dia da mati.

²⁸So itu kiapa kita suka skali mo suru dia babale ulang pa ngoni supaya ngoni pe hati snang baku dapa deng dia, trus kita pe hati lei jadi tenang.

²⁹Jadi, ngoni trima jo pa dia deng snang skali lantaran dia itu sudara yang sama-sama percaya pa Tuhan. Ngoni musti hormat tu orang-orang yang ja balayani Tuhan sama deng dia.

³⁰Soalnya Epafroditus itu ja beking tu karja yang Kristus da suru, kong dia amper mati waktu dia beking tu karja itu. Dia nyanda farduli apa dia mo hidop ato mo mati lantaran dia suka mo bantu pa kita, dia itu sama deng da ganti pa ngoni for bantu pa kita lantaran kita jao dari pa ngoni skarang.