Read Malay, Manado Kolose 1 Bible Online

Kolose 1 - Malay, Manado bible

Kolose 1

¹Ni surat dari kita, Paulus. Kita ini Kristus Yesus pe rasul tu Dia pe utusan lantaran itu Tuhan Allah pe mau. Ni surat ini lei dari Timotius tu torang pe sudara yang percaya.

²Ni surat for ngoni tu Tuhan pe orang-orang di Kolose, ngoni tu sudara-sudara yang setia pa Kristus. Kita minta pa Tuhan Allah tu torang pe Bapa supaya Dia kase tunjung tu bae pa ngoni deng beking ngoni hidop deng hati tenang.

³Waktu torang ja basombayang for ngoni, torang slalu ja bilang makase pa Tuhan Allah, tu Bapa dari Tuhan Yesus Kristus tu torang ja iko akang.

⁴Soalnya torang so dengar tentang ngoni pe percaya pa Kristus Yesus deng tentang tu ngoni pe sayang pa samua tu Tuhan pe orang-orang.

⁵Ngoni percaya deng basayang lantaran ngoni baharap deng yakin kalu ngoni mo dapa yang Tuhan Allah so se siap for ngoni di sorga. Kong tentang tu ngoni mo dapa itu ngoni da dengar dari tu ajaran yang butul, itu no tu Kabar Bae tentang Yesus.

⁶Tu Kabar Bae tentang Yesus itu ngoni so dengar, kong mulai waktu itu jo ngoni bole mangarti butul tu Tuhan Allah pe sayang pa ngoni sampe ngoni percaya tu Kabar Bae itu, kong ngoni hidop iko Tuhan Allah pe mau. Bagitu lei tu da jadi di sluru dunia, tu orang yang da dengar tu Kabar Bae itu so lebe tatamba kong dorang percaya tu Kabar Bae itu sampe dorang hidop iko Tuhan Allah pe mau.

⁷Tu Kabar Bae tentang Yesus itu Epafras so se ajar pa ngoni. Dia itu torang pe tamang karja yang torang sayang. Dia rajin ja beking tu Kristus da suru for mo se kuat tu ngoni pe percaya.

⁸Tu Epafras lei da se cirita pa torang di sini kalu ngoni samua ja baku-baku sayang lantaran tu Roh Kudus yang so ada pa ngoni pe hati.

⁹So itu, waktu pertama torang dengar ngoni pe percaya yang rupa itu, torang slalu basombayang for ngoni pa Tuhan. Torang minta pa Tuhan supaya ngoni bole tau mana tu bae deng bole mangarti tu hal-hal rohani, kong deng bagitu ngoni bole butul-butul tau tu Tuhan pe mau,

¹⁰supaya ngoni hidop deng kalakuan yang pantas sbagai orang yang percaya pa Tuhan kong beking snang Dia pe hati. Ngoni mo beking trus-trus tu bae, deng ngoni lei mo lebe tatamba kanal pa Tuhan Allah.

¹¹Kita minta lei pa Tuhan supaya Dia kase kuat tu ngoni pe hati pake tu Dia pe kuasa yang luar biasa, supaya biar apa jo tu pendritaan yang ngoni mo alami ngoni tetap batahang percaya, ngoni tetap sabar deng ngoni tetap rasa snang.

¹²Deng kita minta lei pa Tuhan supaya ngoni slalu ja bilang makase pa Dia tu torang pe Bapa. Dia yang beking ngoni jadi pantas mo dapa apa yang Dia so janji mo kase pa Dia pe orang-orang. Kong tu janji itu Dia so se sadia for Dia pe orang-orang di sorga tu tampa yang trang, tu tampa yang Dia berkuasa akang sbagai Raja.

¹³Dia so se bebas pa torang dari tu kuasa glap, kong Dia se pinda pa torang for tinggal di tampa tu Dia pe Anak yang Dia sayang itu berkuasa sbagai Raja.

¹⁴Dia pe Anak itu yang se bebas pa torang dari torang pe dosa-dosa, torang pe dosa-dosa itu so dapa ampung.

¹⁵Sudara-sudara, torang bole tau Tuhan Allah pe sifat deng kuasa dari Dia pe Anak waktu Dia pe Anak da hidop di dunia, Dia pe Anak itu sama deng gambaran dari Tuhan Allah yang torang nyanda dapa lia. Dia pe Anak satu-satunya itu yang paling berkuasa dari samua yang Tuhan Allah da ciptakan.

¹⁶Soalnya lewat Kristus itu Tuhan Allah ciptakan samua yang ada di bumi deng lei di sorga. Dia ciptakan samua tu dapa lia deng tu nyanda dapa lia, Dia ciptakan samua yang berkuasa, yang pegang prenta deng tu da berkuasa di langit. Samua yang ada itu Tuhan Allah da ciptakan lewat Kristus, kong samua itu ada supaya Kristus dapa hormat.

¹⁷Dia so ada seblum samua ini ada, kong Dia yang ator kong jaga samua itu.

¹⁸Yesus Kristus itu pemimpin yang baator tu De pe jemaat, sama deng kapala yang kontrol tu badan. Dia itu yang pertama yang hidop ulang dari orang-orang yang so mati, deng bagitu Dia jadi yang paling penting dari samua yang ada.

¹⁹Soalnya Tuhan Allah pe mau supaya samua tu Dia pe sifat deng kuasa ada pa Yesus Kristus.

²⁰Kong lewat Kristus, Tuhan Allah beking supaya samua yang ada di bumi deng di sorga bole baku bae ulang deng Dia. Tu hubungan deng Tuhan Allah itu jadi baku bae lantaran Kristus pe dara yang tacura di kayu salib.

²¹Ngoni dulu hidop jao dari Tuhan. Waktu itu ngoni jadi Tuhan Allah pe musu lantaran ngoni pe pikiran deng kalakuan jaha.

²²Mar skarang Yesus Kristus so mati, kong lewat Dia pe badan yang so mati itu Tuhan Allah so buka jalang for ngoni supaya bole baku bae deng Dia. Tuhan Allah beking bagitu supaya di muka pa Dia ngoni itu kudus, nyanda ada sala, kong nyanda ada yang mo se sala apa-apa pa ngoni.

²³So itu ngoni musti tetap percaya, jang skali-kali ngoni ragu. Ngoni percaya jo trus tu Kabar Bae tentang Yesus yang ngoni so dengar itu. Torang baharap deng yakin deng tu Kabar Bae tentang Yesus yang torang so dengar itu, kong torang nimbole se tinggal tu Kabar Bae itu. Tu Kabar bae itu so tasiar ka sluru dunia, deng kita ini lei Paulus, Tuhan Allah da pili pa kita for se tau tu Kabar Bae itu.

²⁴Skarang ini kita pe hati snang lantaran kita da dapa siksa waktu kita da se tau tu Kabar Bae. Tu siksa itu memang musti kita mo dapa lantaran kita ja karja for Yesus Kristus, itu sama deng kita ambe bagean dalam Kristus pe siksa yang Dia da dapa for Dia pe jemaat, kong Dia pe jemaat itu sama deng tu Dia pe badan sandiri.

²⁵Tuhan Allah pili pa kita jadi playan for beking tu Dia da suru pa Dia pe jemaat. Dia pili pa kita for kase tau samua tu Tuhan Allah pe firman pa ngoni tu orang-orang yang bukang Yahudi.

²⁶Dari torang pe nene moyang dulu tu firman itu Tuhan Allah masi da se rahasia, mar skarang Dia so se tau tu rahasia itu pa De pe orang-orang.

²⁷Tuhan Allah se tau pa Dia pe orang-orang tu rahasia yang bagus deng luar biasa. Tu rahasia itu bagini: Tuhan Allah mo se berkat pa tu orang-orang yang bukang Yahudi, tu berkat itu no tu Yesus Kristus mo hidop di hati pa tu orang-orang yang bukang Yahudi. So itu dorang bole baharap deng yakin kalu dorang lei nanti mo alami tu Tuhan pe luar biasa di sorga.

²⁸Jadi torang ja kase tau pa samua orang tentang Yesus Kristus. Torang ja se inga pa dorang deng lei ja se ajar pa dorang, pake tu hikmat yang Tuhan da kase pa torang. Torang beking bagitu, supaya di muka pa Tuhan tiap orang bole butul-butul percaya pa Yesus Kristus.

²⁹So itu kita karja kras ja beking tu kita pe karja ini. Kita pake Dia pe kuasa tu Dia da kase pa kita, tu da bakarja deng luar biasa pa kita pe diri.