Read Malay, Manado Kolose 3 Bible Online

Kolose 3 - Malay, Manado bible

Kolose 3

¹Sudara-sudara, Kristus so hidop ulang, kong ngoni yang so percaya pa Kristus, ngoni sama deng so dapa hidop baru sama-sama deng Dia. So itu ngoni brusaha jo cari tu hal-hal yang ada di sorga, tu tampa Kristus ada. Di situ Kristus dudu di tampa yang paling terhormat di sabla kanan pa Tuhan Allah.

²Ngoni pikir jo trus tu hal-hal yang di sorga, jang ngoni pikir tu hal-hal yang di dunia ini.

³Soalnya ngoni so nyanda iko tu dunia pe model, ngoni pe hidop yang dulu itu bole mo bilang sama deng so mati. Skarang Kristus so hidop sama-sama deng ngoni sampe ngoni so jadi satu deng Tuhan Allah. Kong tu ngoni pe cara hidop yang baru itu, tu orang-orang yang nyanda percaya nyanda mo mangarti.

⁴Yesus Kristus tu da kase hidop baru pa ngoni. Kong nanti waktu Dia datang ulang ka dunia, samua orang mo lia pa Dia, ngoni lei mo muncul kong dapa puji deng hormat sama-sama deng Dia.

⁵Jadi lantaran ngoni so hidop baru, ngoni se brenti jo ja beking tu kalakuan yang cuma ja iko tu dunia pe model rupa tu: ja baseks bebas, ja beking tu hal-hal yang caparuni, nafsu yang besae, deng tu keinginan yang suka beking tu jaha. Kong lei se brenti jo tu ngoni pe keinginan yang suka samua jadi ngoni punya lantaran itu sama deng so beking samua itu jadi lebe penting dari Tuhan.

⁶Kalu beking tu kalakuan-kalakuan besae rupa itu, pasti Tuhan Allah mo hukum.

⁷Dulu ngoni lei hidop ja beking tu hal-hal besae rupa itu waktu ngoni masi ja iko tu dunia pe model.

⁸Mar skarang ini ngoni musti se tinggal samua tu kalakuan yang besae rupa ini: pangmara, capat nae dara, suka beking jaha pa orang laeng, ja se besae orang laeng pe nama, deng ja bamomake.

⁹Ngoni jang ja badusta satu deng laeng lantaran ngoni so se tinggal samua tu ngoni pe hidop lama yang ngoni ja beking dulu.

¹⁰Ngoni yang so jadi percaya itu so jadi manusia baru, kong Tuhan Allah roba trus tu ngoni pe sifat jadi sama deng Dia pe sifat, kong ngoni bole tamba kanal pa Dia.

¹¹Jadi ngoni yang so jadi manusia baru, so nyanda penting kalu ngoni ini orang Yahudi ato orang bukang Yahudi, kalu ngoni da sunat ato nyanda da sunat, kalu ngoni orang asing ato orang yang tinggal di utang, kalu ngoni ini budak ato yang bebas. Mar yang paling penting itu Kristus, kong so Dia itu yang da hidop pa ngoni samua pe hati.

¹²Sudara-sudara, Tuhan Allah so pili pa ngoni, ngoni ini so jadi Dia pe orang-orang deng Dia sayang pa ngoni. Jadi ngoni pe hidop musti bagini: ngoni ada rasa kasiang pa orang, pangbae, nyanda sombong, nyanda kasar pa orang deng pangsabar.

¹³Ngoni musti sabar pa orang laeng, kong kalu ada orang laeng yang beking sala pa ngoni, ngoni lei jang ja badendam mar se ampung pa dia. Tuhan so se ampung tu ngoni pe sala jadi ngoni lei musti kase ampung orang laeng pe sala pa ngoni.

¹⁴Yang paling penting dari samua itu, ngoni musti baku-baku sayang satu deng laeng. Kalu ngoni baku-baku sayang, itu yang beking ngoni taika kong butul-butul jadi satu.

¹⁵Kristus so beking torang bole hidop baku-baku bae satu deng laeng, kong se biar jo tu damai yang dari Kristus itu ada pa ngoni pe hati for mo kuasai ngoni pe hidop. Ngoni samua sama deng Yesus Kristus pe badan yang musti hidop baku-baku bae lantaran Tuhan pangge pa ngoni supaya ngoni hidop baku-baku bae. Kong ngoni lei musti ja bilang makase pa Tuhan.

¹⁶Ngoni musti inga-inga trus tu Kristus pe firman, simpang jo bae-bae dalam ngoni pe hati. Kong ngoni pake tu Dia pe firman itu for ajar deng se inga pa satu deng laeng pake tu hikmat yang dari pa Dia. Ngoni manyanyi lagu-lagu Mazmur, manyanyi lagu-lagu rohani, deng lei manyanyi lagu-lagu yang Roh Kudus kase pa ngoni, kong kalu beking samua itu ngoni bilang lei makase pa Tuhan Allah.

¹⁷Samua yang ngoni beking deng yang ngoni bilang, samua itu ngoni beking bae-bae lantaran ngoni ini orang-orang yang ja iko pa Tuhan Yesus, kong ngoni lei ja bilang makase pa Tuhan Allah tu torang pe Bapa lewat Yesus Kristus.

¹⁸Sudara-sudara, ngoni tu bini-bini musti dengar-dengaran pa ngoni pe laki, ngoni beking jo itu sama deng tu parampuang yang percaya pa Tuhan musti beking.

¹⁹Ngoni tu laki, ngoni musti sayang pa ngoni pe bini, kong ngoni jang kasar pa dia.

²⁰Ngoni tu anak-anak, ngoni musti dengar-dengaran pa ngoni pe orang tua di samua hal lantaran itu yang beking Tuhan pe hati snang.

²¹Ngoni tu bapak-bapak, ngoni jang beking tu ngoni pe anak rasa saki hati supaya dorang nyanda mo putus asa.

²²Sudara-sudara yang jadi budak, ngoni musti dengar-dengaran pa ngoni pe tuang yang di dunia ini di samua hal. Jang ngoni cuma dengar-dengaran pa ngoni pe tuang lantaran dia da lia pa ngoni, itu cuma ngoni mo beking snang pa dia, mar ngoni bakarja deng sunggu-sunggu lantaran ngoni tako pa Tuhan.

²³Apa jo tu ngoni mo karja, ngoni karja jo itu deng sunggu-sunggu sama deng ngoni ja karja for Tuhan, bukang for manusia.

²⁴Ngoni so tau kalu ngoni mo trima warisan tu hidop kekal yang Tuhan so janji mo kase pa ngoni. Kristus itu tu ngoni pe Tuhan deng ngoni itu tu ja beking yang Dia da suru.

²⁵Soalnya sapa jo yang ja beking tu nyanda butul, dia mo dapa hukuman dari Tuhan lantaran Tuhan itu adil deng nyanda ja pili-pili orang kalu mo kase hukuman.