Read Malay, Manado 1 Tesalonika 1 Bible Online

1 Tesalonika 1 - Malay, Manado bible

1 Tesalonika 1

¹Ni surat dari kita, Paulus deng kita pe tamang-tamang tu Silas deng Timotius, for ngoni tu jemaat di Tesalonika. Ngoni yang percaya pa Allah Bapa deng pa Tuhan Yesus Kristus. Torang minta supaya Tuhan kase tunjung Dia pe bae pa ngoni deng lei beking ngoni hidop deng hati tenang.

²Torang slalu bilang makase pa Tuhan Allah lantaran ngoni samua, kong torang ja basombayang akang pa ngoni.

³Waktu torang basombayang pa Tuhan Allah, tu torang pe Bapa, torang inga trus tu playanan yang ngoni ja beking lantaran ngoni pe percaya. Torang inga bagimana ngoni da layani pa orang laeng lantaran ngoni pe sayang pa dorang. Torang inga lei biar ngoni dapa siksa, ngoni tetap batahang percaya lantaran slalu baharap deng yakin pa torang pe Tuhan Yesus Kristus.

⁴Sudara-sudara yang Tuhan Allah sayang, torang tau kalu Tuhan Allah so pangge pa ngoni for iko pa Dia,

⁵lantaran tempo hari torang da pigi pa ngoni di Tesalonika for kase tau tu Kabar Bae tentang Yesus pa ngoni. Waktu itu torang nyanda pake torang pe kata-kata, mar Tuhan pe kuasa deng tu Roh Kudus yang beking ngoni jadi yakin deng tu Kabar Bae itu. Ngoni lei so lia tu torang pe cara hidop, jadi ngoni tau kalu tu Kabar Bae itu butul.

⁶Trus ngoni iko tu torang pe conto deng lei tu conto dari Tuhan sandiri, biar ada orang yang siksa pa ngoni, ngoni tetap trima deng snang tu Tuhan pe firman lantaran tu Roh Kudus da bantu pa ngoni.

⁷Deng bagitu ngoni jadi conto for samua orang yang percaya pa Yesus di daera Makedonia deng Akhaya.

⁸Soalnya ngoni so kase tau tu Tuhan pe firman pa orang-orang di daera Makedonia deng daera Akhaya. Bagitu lei tu ngoni pe percaya pa Tuhan Allah so tasiar bukang cuma di tampa-tampa itu, mar so tasiar sampe di samua tampa. So itu, torang so nyanda perlu lei mo bilang apa-apa lantaran orang-orang so dengar tentang ngoni pe percaya.

⁹Soalnya orang-orang itu bacirita tentang bagimana ngoni da trima pa torang dulu waktu torang da pigi pa ngoni. Dorang bacirita lei tentang bagimana ngoni so kase tinggal tu opo-opo kong bertobat trus semba pa Tuhan Allah yang hidop deng yang butul.

¹⁰Dorang lei da bacirita tentang bagimana ngoni da tunggu-tunggu tu Anak Allah mo datang dari sorga. So Dia itu Yesus yang da mati mar Tuhan Allah so se hidop ulang. Yesus itu lei tu mo se slamat pa torang yang percaya pa Dia dari tu hukuman nanti.