Read Malay, Manado 1 Tesalonika 2 Bible Online

1 Tesalonika 2 - Malay, Manado bible

1 Tesalonika 2

¹Sudara-sudara, ngoni sandiri tau kalu nyanda percuma torang da datang pa ngoni.

²Ngoni lei tau, seblum torang datang pa ngoni, torang da dapa siksa deng da dapa hina di Filipi. Mar biar lei bagitu, Tuhan Allah tolong pa torang supaya torang tetap brani kase tau pa ngoni tu Kabar Bae dari Tuhan Allah biar lei tu orang-orang pa ngoni pe kota malawang pa torang.

³Soalnya torang da kase tau tu Kabar Bae itu, torang bukang babilang tu ajaran yang sesat, torang nyanda ada maksut jaha deng nimau mo tipu orang.

⁴Mar Tuhan Allah yang so se percaya pa torang for kase tau tu Kabar Bae, lantaran Dia anggap torang pantas for itu. So itu torang kase tau tu Kabar Bae bukang for mo se snang pa manusia, mar for mo se snang pa Tuhan Allah yang bauji torang pe hati.

⁵Tuhan Allah tu torang pe saksi, Dia tau butul torang pe isi hati. Ngoni sandiri lei tau kalu torang nyanda sraka, torang nyanda perna pake tu kata-kata for mo cari untung dari orang.

⁶Torang lei nyanda perna cari pujian dari pa manusia, bae itu dari pa ngoni ato pa orang-orang laeng. Padahal torang ini Kristus pe rasul-rasul, jadi torang bole minta apa jo dari pa ngoni, mar torang nimau bagitu.

⁷Malatare torang ja babae-bae waktu torang da sama-sama deng ngoni, sama deng tu mama yang baurus deng bajaga de pe anak yang masi kacili.

⁸Torang sayang skali pa ngoni. Jadi torang bukang cuma snang ja kase tau tu Kabar Bae dari Tuhan Allah pa ngoni, mar torang lei snang kase torang pe hidop for ngoni. Soalnya torang memang so sayang skali pa ngoni.

⁹Sudara-sudara, ngoni pasti masi inga bagimana torang da brusaha deng karja kras siang malam supaya torang bole mo tanggong sandiri tu tong pe hidop. Deng bagitu torang nyanda jadi beban pa sapa-sapa di antara pa ngoni waktu torang kase tau tu Kabar Bae dari Tuhan Allah pa ngoni.

¹⁰Ngoni deng Tuhan Allah lei yang jadi saksi, kalu torang slalu hidop deng hati yang bersi, adil deng nyanda ada tu mo se sala pa torang waktu torang tinggal di antara pa ngoni tu orang-orang yang percaya.

¹¹Ngoni tau kalu torang pe cara pa ngoni samua sama deng tu papa pa de pe anak-anak sandiri. Torang se nasehat pa ngoni masing-masing deng se kuat tu ngoni pe hati,

¹²torang lei minta deng sangat pa ngoni supaya hidop iko Tuhan Allah pe mau. So Dia itu yang pangge pa ngoni for jadi orang-orang dari Dia yang Berkuasa sbagai Raja, kong ngoni mo rasa tu Dia pe luar biasa.

¹³Waktu torang da kase tau tu Tuhan Allah pe firman pa ngoni, ngoni trima tu firman itu sbagai Tuhan pe kata-kata, bukang manusia pe kata-kata. Kong memang itu butul dari Tuhan Allah. So itu torang nyanda brenti bilang makase pa Tuhan Allah. Tu Tuhan Allah pe firman itu yang samantara da bakarja pa ngoni tu orang yang percaya.

¹⁴Sudara-sudara, ngoni so dapa siksa dari ngoni pe satu bangsa di Tesalonika. Deng bagitu ngoni so sama deng tu orang Yahudi yang percaya pa Kristus Yesus di daera Yudea, dorang lei dapa siksa dari dorang pe satu bangsa sandiri yang ada di sana.

¹⁵Tu orang Yahudi yang da basiksa itu dulu tu da bunung pa nabi-nabi deng lei pa Tuhan Yesus, kong dorang itu lei tu da siksa deng user pa torang. Dorang itu nyanda ja beking tu Tuhan Allah pe mau, deng dorang itu beking samua orang jadi dorang pe musu,

¹⁶lantaran dorang da brusaha supaya torang nimbole kase tau tu Tuhan Allah pe pesan pa tu orang-orang yang bukang Yahudi supaya tu orang-orang bukang Yahudi itu nimbole mo slamat. Deng bagitu dorang pe dosa lebe tatamba trus sampe jadi gnap,[1] kong Tuhan Allah mara kong mo hukum deng brat pa dorang.

¹⁷Sudara-sudara, orang beking torang baku pisa deng ngoni for samantara waktu. Cuma, biar lei torang jao dari pa ngoni, ngoni tetap dekat pa tong pe hati. Torang rindu skali pa ngoni kong torang so brusaha for mo baku dapa deng ngoni.

¹⁸Soalnya torang memang suka mo pigi pa ngoni. Kita Paulus so brapa kali da coba mo pigi pa ngoni, mar setang pe bos beking sampe torang nyanda tapigi pa ngoni.

¹⁹Torang mo pigi pa ngoni, lantaran nanti kalu Tuhan datang ulang, ngoni tu torang pe harapan, ngoni tu beking torang pe hati snang, deng ngoni ini tu torang pe mahkota kebanggaan di muka pa Tuhan.

²⁰Butul komang, so ngoni yang beking torang dapa puji deng hormat, deng beking torang snang.