Read Malay, Manado 1 Tesalonika 3 Bible Online

1 Tesalonika 3 - Malay, Manado bible

1 Tesalonika 3

¹Torang so nyanda dapa tahang tu tong pe rindu pa ngoni. So itu, torang ambe keputusan kalu kita deng Silas tinggal jo di Atena,

²trus Timotius tu torang pe sudara yang percaya, torang utus pigi pa ngoni. Dia itu torang pe tamang yang ja beking tu karja for Tuhan Allah, dia da sama-sama deng torang ja kase tau tu Kabar Bae tentang Kristus. Torang da utus pa Timotius for kase kuat ngoni pe hati deng kase nasehat pa ngoni supaya ngoni pe percaya lebe tatamba kuat.

³Deng bagitu, biar lei ngoni dapa siksa, ngoni tetap percaya pa Yesus. Soalnya ngoni sandiri tau kalu orang yang percaya pa Yesus ditentukan for mendrita.

⁴Dulu waktu torang masi da sama-sama deng ngoni, torang so perna ja kase tau pa ngoni kalu nanti torang samua mo rasa tu siksa. Skarang torang so tau itu butul, torang so rasa tu siksa itu.

⁵So lantaran ngoni da rasa tu siksa, kita so nyanda tahang kalu nyanda ada kabar dari ngoni, jadi kita utus Timotius pa ngoni lantaran kita suka mo cari tau kalu ngoni masi percaya pa Yesus ato so nyanda. Kita kuatir jang sampe tu setang pe bos so goda pa ngoni, kong ngoni so nyanda percaya lei pa Yesus. Kalu jadi bagitu, percuma jo tu torang pe karja dulu.

⁶Skarang Timotius so bale dari pa ngoni di Tesalonika, kong dia da kase tau tu kabar tentang ngoni yang beking torang snang. Dia da cirita kalu ngoni tetap percaya pa Yesus deng da baku-baku sayang. Dia bilang lei kalu ngoni inga-inga pa torang, ngoni rasa snang. Kong ngoni suka mo baku dapa ulang deng torang, sama lei deng torang suka baku dapa deng ngoni.

⁷So itu no sudara-sudara, biar orang beking susa deng siksa pa torang, torang pe hati jadi kuat lantaran torang dengar kalu ngoni tetap percaya pa Yesus.

⁸Deng bagitu torang rasa torang pe hidop butul-butul ada de pe guna, lantaran ngoni pegang kuat tu ngoni pe percaya pa Tuhan.

⁹Torang bilang makase pa Tuhan Allah, soalnya torang pe hati snang di muka pa Dia lantaran ngoni pegang kuat tu ngoni pe percaya pa Dia.

¹⁰Siang deng malam torang basombayang deng sunggu-sunggu supaya torang bole baku dapa ulang deng ngoni. Torang mo se ajar pa ngoni for beking lengkap apa yang masi kurang pa ngoni pe iman.

¹¹Torang minta pa Tuhan Allah tu torang pe Bapa, deng pa Yesus tu torang pe Tuhan supaya mo kase jalang pa torang for mo baku dapa ulang deng ngoni.

¹²Torang minta pa Tuhan supaya beking ngoni lebe tatamba baku sayang, deng lebe tatamba se tunjung tu sayang satu deng laeng deng for samua orang, sama deng torang sayang pa ngoni.

¹³Torang minta bagitu supaya nanti kalu Yesus tu torang pe Tuhan datang ulang sama-sama deng samua tu Tuhan pe orang-orang, ngoni pe hati bersi deng lei nyanda ada tu mo se sala pa ngoni di muka pa Tuhan Allah tu torang pe Bapa.