Read Malay, Manado 1 Tesalonika 5 Bible Online

1 Tesalonika 5 - Malay, Manado bible

1 Tesalonika 5

¹Sudara-sudara, torang nyanda perlu mo tulis pa ngoni tempo apa de pe waktu tu Tuhan Yesus mo datang ulang.

²Soalnya ngoni sandiri tau butul kalu nyanda ada orang tu tau tempo apa Tuhan Yesus mo datang ulang, sama deng papancuri yang datang malam-malam.

³Ada de pe waktu orang-orang mo bilang bagini, “Torang pe hidop tenang deng aman, kong torang nyanda perlu tako apa-apa.” Mar kage-kage dorang itu mo dapa pendritaan yang hebat skali. Dorang nyanda mo lolos dari tu pendritaan itu. Tu pendritaan yang dorang mo rasa itu, sama deng tu pendritaan yang parampuang da rasa waktu mo melahirkan.

⁴Mar ngoni sudara-sudara, ngoni pe hidop nyanda sama deng tu orang-orang yang hidop di dalam glap. So itu nanti waktu Tuhan Yesus datang ulang, ngoni nyanda mo takage sama deng tu orang yang da pancuri akang.

⁵Ngoni samua itu orang-orang trang deng orang yang hidop di siang. Torang nyanda hidop sama deng tu orang-orang malam ato orang-orang glap.

⁶So itu torang nimbole cuma tidor-tidor sama deng orang laeng. Torang musti bajaga-jaga deng kuasai diri.

⁷Soalnya tu orang-orang yang biasa tidor, dorang tidor waktu malam, kong tu orang-orang yang mabo, mabo waktu malam.

⁸Mar torang ini yang percaya pa Tuhan, torang musti kuasai diri sama deng anak-anak siang. Torang musti percaya pa Tuhan Allah deng baku sayang. Torang pe percaya deng sayang itu yang jaga pa torang sama deng tentara yang da pake baju besi for pele tu dada. Torang lei musti baharap deng yakin pa Tuhan for torang pe slamat, sama deng tentara yang da pake helem for jaga de pe kapala.

⁹Soalnya Tuhan Allah nyanda pili pa torang for Dia mo hukum, mar Dia pili pa torang for dapa slamat lewat torang pe percaya pa Yesus Kristus tu torang pe Tuhan.

¹⁰Yesus so mati for torang, supaya nanti waktu Dia datang ulang, biar waktu itu torang so mati ato masi hidop, torang bole hidop sama-sama deng Dia.

¹¹So itu, ngoni musti cirita ulang tu ajaran ini pa satu deng yang laeng for mo kase smangat deng baku kase kuat hati, sama deng tu ngoni ja beking sampe skarang ini.

¹²Sudara-sudara, torang minta supaya ngoni hargai tu orang-orang yang da karja kras for Tuhan di tenga-tenga pa ngoni. Dorang ja pimpin pa ngoni, dorang itu yang ja kase nasehat deng togor pa ngoni for se kuat tu ngoni pe percaya pa Tuhan.

¹³Ngoni musti hargai deng sayang pa dorang lantaran samua tu dorang ja beking for tolong pa ngoni. Kong ngoni musti slalu hidop baku-baku bae.

¹⁴Sudara-sudara, torang lei se nasehat pa ngoni supaya beking bagini: togor deng bae-bae tu orang pangmalas supaya dong rajin bakarja, beking brani tu orang yang panako, tolong tu orang yang perlu mo tolong, kong basabar jo pa samua orang.

¹⁵Ngoni tarukira jo, supaya jang ada orang yang balas tu orang pe jaha deng jaha lei, mar ngoni musti brusaha ja beking tu bae satu deng laeng deng lei pa orang-orang laeng.

¹⁶Ngoni pe hati musti snang trus.

¹⁷Ngoni musti trus basombayang.

¹⁸Biar ngoni dapa susa ato snang, ngoni musti slalu bilang makase pa Tuhan Allah. Soalnya Tuhan Allah suka ngoni beking bagitu pa ngoni pe hidop lantaran ngoni so percaya pa Kristus Yesus.

¹⁹Jang ja halangi tu Tuhan Allah pe Roh da bakarja.

²⁰Kalu Tuhan kase tau Dia pe pesan pa orang kong tu orang itu se tau tu pesan pa ngoni, jang ngoni pandang enteng tu pesan itu.

²¹Cuma ngoni memang musti cari tau bae-bae samua itu supaya tau kalu itu butul-butul dari Tuhan. Kalu memang itu butul dari Tuhan, ngoni musti trima kong iko itu.

²²Ngoni lei jang beking tu jaha.

²³Tuhan Allah tu da beking torang hidop deng hati tenang, kong torang minta pa Dia supaya Dia beking ngoni butul-butul jadi kudus. Torang minta supaya Dia jaga tu ngoni pe badan, hati deng jiwa supaya nanti kalu torang pe Tuhan Yesus Kristus datang ulang, nyanda ada tu mo se sala pa torang.

²⁴Tuhan Allah yang da pangge pa ngoni for iko pa Dia, Dia itu setia. Dia pasti mo beking yang Dia da bilang pa torang.

²⁵Sudara-sudara, torang minta ngoni basombayang akang pa torang.

²⁶Ngoni bilang akang tu torang pe salam sayang pa sudara-sudara yang percaya.

²⁷Kita minta pa ngoni deng kuasa dari Tuhan Yesus, supaya ngoni baca akang ni surat pa samua sudara yang percaya.

²⁸Torang minta supaya Yesus Kristus tu torang pe Tuhan kase tunjung tu Dia pe bae pa ngoni.