Read Malay, Manado 2 Tesalonika 1 Bible Online

2 Tesalonika 1 - Malay, Manado bible

2 Tesalonika 1

¹Ni surat dari kita, Paulus deng kita pe tamang-tamang tu Silas deng Timotius. Torang kirim ni surat for ngoni tu jemaat di Tesalonika. Ngoni yang percaya pa torang pe Allah Bapa deng pa Tuhan Yesus Kristus.

²Torang minta supaya Allah tu torang pe Bapa deng Tuhan Yesus Kristus kase tunjung tu bae pa ngoni deng lei beking ngoni hidop deng hati tenang.

³Sudara-sudara, torang musti slalu bilang makase pa Tuhan Allah lantaran ngoni. Torang memang musti bagitu lantaran ngoni pe percaya pa Yesus lebe tatamba, kong ngoni lei lebe baku-baku sayang.

⁴So itu, torang bangga bacirita tentang ngoni pa jemaat-jemaat yang sama-sama percaya pa Tuhan Allah. Torang bangga lantaran ngoni tetap batahang percaya pa Yesus biar lei da mangada tu siksa deng susa yang ngoni da rasa.

⁵Tu samua itu jadi bukti kalu Tuhan Allah adili orang deng butul. Ngoni pantas jadi orang-orang dari Tuhan Allah yang Berkuasa sbagai Raja, soalnya ngoni da dapa siksa lantaran ngoni da jadi Dia pe orang-orang.

⁶Tuhan Allah itu adil, Dia mo balas beking siksa tu orang-orang yang beking siksa pa ngoni.

⁷Dia mo beking ngoni deng torang lei bebas dari tu siksa yang skarang ini torang samua da rasa. Ini samua jadi nanti waktu Tuhan Yesus datang dari sorga sama-sama deng Dia pe malaekat-malaekat yang punung deng kuasa. Dia mo turung deng api yang bamanyala.

⁸Dia mo hukum tu orang-orang yang nimau kanal pa Tuhan Allah deng yang nimau iko tu Kabar Bae tentang torang pe Tuhan Yesus.

⁹Dorang mo dapa hukuman, dorang mo rasa siksa sampe slama-lamanya. Dorang mo dapa user dari Tuhan pe muka, deng dorang so nyanda mo lia lei tu Dia pe kuasa yang luar biasa.

¹⁰Samua itu mo jadi nanti waktu Tuhan Yesus datang ulang. Waktu Dia datang, Dia pe orang-orang mo puji deng hormat pa Dia. Samua orang percaya mo heran kong puji pa Dia, kong ngoni lei mo sama-sama deng dorang lantaran ngoni lei yang so percaya tu brita yang torang so kase tau pa ngoni. Torang da kase tau pa ngoni yang torang so perna lia deng dengar dari pa Tuhan.

¹¹So itu torang ja basombayang for ngoni, supaya torang pe Tuhan Allah beking ngoni pantas jadi orang yang Dia so pangge for iko pa Dia. Torang lei basombayang supaya Tuhan Allah pake Dia pe kuasa for tolong pa ngoni beking klar samua tu bae yang ngoni mo beking, ngoni beking samua itu lantaran ngoni percaya.

¹²Torang basombayang bagitu supaya kalu ngoni pe cara hidop so sama deng itu, orang-orang mo puji deng hormat tu torang pe Tuhan Yesus pe nama. Deng bagitu, ngoni lei mo dapa puji deng hormat lantaran percaya pa Tuhan Yesus. Ini samua mo jadi bagitu lantaran Tuhan Allah deng torang pe Tuhan Yesus Kristus da se tunjung tu sayang pa ngoni.