Read Malay, Manado 2 Tesalonika 2 Bible Online

2 Tesalonika 2 - Malay, Manado bible

2 Tesalonika 2

¹Sudara-sudara, tentang Tuhan Yesus Kristus mo datang ulang deng tentang Dia mo kase kumpul pa torang sama-sama deng Dia, torang minta pa ngoni,

²supaya ngoni jang capat bingo ato gelisa kalu ngoni dengar dari pa orang tentang tu hal-hal itu. Ada stou yang anggap kalu Tuhan da kase tau pa torang kalu Dia so datang ulang, ato ada lei yang kira torang da kase tau sandiri ato da tulis surat tentang itu. Padahal nyanda bagitu.

³Jang sampe orang tipu bagitu pa ngoni deng macam-macam cara! Soalnya seblum Tuhan Yesus datang ulang, lebe dulu musti jadi tu hal-hal ini: banya orang yang mo malawang pa Tuhan, deng lei ada orang yang paling jaha mo muncul, tu orang itu yang pasti mo binasa.

⁴Dia itu mo malawang pa Tuhan Allah deng mo angka diri lebe tinggi dari samua tu manusia ja semba sbagai Tuhan. Dia mo dudu di dalam Ruma Ibada Pusat kong mangaku di muka pa samua orang kalu dia itu tu Tuhan Allah.

⁵Ngoni masi inga to tu hal-hal itu? Waktu kita da sama-sama deng ngoni, kita ja se tau pa ngoni tentang samua itu.

⁶Kong skarang ngoni so tau tu da batahang pa orang yang paling jaha itu, sampe nanti orang yang paling jaha itu mo muncul di waktu yang Tuhan Allah so tentukan for dia.

⁷Tu orang yang paling jaha itu so mulai bakarja mar deng babasambunyi lantaran skarang masi ada yang da batahang. Mar nanti mo ada de pe waktu Tuhan Allah mo ambe tu da batahang pa dia.

⁸Waktu itu baru tu orang yang paling jaha itu mo muncul. Mar Tuhan Yesus mo bunung pa tu orang itu deng cara tiop pa dia. Kong waktu Tuhan Yesus datang ulang, Dia pe kuasa yang luar biasa mo beking ancor pa tu orang itu.

⁹Mar waktu Tuhan Yesus blum datang, tu orang yang paling jaha itu mo muncul pake setang pe bos pe kuasa. Dia itu mo tipu orang-orang deng cara se tunjung tu kuasa lewat mujisat-mujisat, tanda-tanda ajaib deng hal-hal yang luar biasa yang dia mo beking.

¹⁰Tu orang yang paling jaha itu mo pake macam-macam cara yang jaha for tipu pa orang-orang yang mo binasa. Dorang itu mo ancor lantaran dorang nimau trima deng nyanda suka tu ajaran yang butul tentang Tuhan Yesus yang bole se slamat pa dorang.

¹¹So itu Tuhan Allah se biar ada pengaru yang beking dorang percaya tu nyanda butul kong jadi sesat.

¹²Tuhan Allah beking bagitu supaya samua orang yang nimau percaya tu ajaran yang butul tentang Tuhan Yesus kong suka beking tu jaha, dorang itu mo dapa hukuman.

¹³Sudara-sudara yang Tuhan sayang! Torang slalu musti bilang makase pa Tuhan Allah lantaran ngoni. Soalnya dari dulu Dia so pili pa ngoni for mo slamat. Tuhan se slamat pa ngoni lantaran ngoni percaya tu ajaran yang butul, deng tu Roh Kudus beking ngoni lei jadi kudus di muka pa Tuhan.

¹⁴So lantaran itu, Tuhan Allah pangge pa ngoni for iko pa Dia. Dia pangge pa ngoni waktu torang da se tau pa ngoni tu Kabar Bae tentang Yesus Kristus. Deng bagitu ngoni bole dapa puji deng hormat sama-sama deng Yesus Kristus tu torang pe Tuhan.

¹⁵So itu sudara-sudara, ngoni musti batahang iko trus tu ngoni pe percaya itu! Pegang bae-bae tu ajaran yang torang so se ajar pa ngoni lewat surat ato tu torang da bilang langsung.

¹⁶Tuhan Allah, tu torang pe Bapa, Dia yang sayang pa torang. Dia se tunjung De pe sayang pa torang supaya De pe sayang itu se kuat torang pe hati for slama-lamanya deng lei supaya kase harapan deng yakin pa torang mo dapa yang bae. Torang minta pa Tuhan Allah deng pa Yesus Kristus tu torang pe Tuhan,

¹⁷supaya se smangat deng se kuat tu ngoni pe hati supaya ngoni bole beking samua yang bae deng bicara tu hal-hal bae.