Read Malay, Manado 2 Tesalonika 3 Bible Online

2 Tesalonika 3 - Malay, Manado bible

2 Tesalonika 3

¹Sudara-sudara, torang minta pa ngoni supaya basombayang akang for torang. Ngoni sombayang akang supaya tu Tuhan pe firman capat tasiar kong di mana-mana orang trima tu firman deng punung rasa hormat, sama deng waktu ngoni da trima tu firman itu.

²Kong ngoni basombayang lei supaya Tuhan se slamat pa torang dari tu orang-orang jaha deng tu tukang beking kacau. Soalnya nyanda samua orang percaya pa Tuhan.

³Mar Tuhan itu setia. Dia mo se kuat ngoni pe hati deng jaga pa ngoni dari yang ja beking tu jaha.

⁴Torang butul-butul yakin pa Tuhan tentang ngoni kalu ngoni da beking apa tu torang da pesan pa ngoni, deng ngoni mo beking itu trus.

⁵Torang minta supaya Tuhan bantu pa ngoni, supaya ngoni bole tau Tuhan Allah pe sayang, deng lei supaya ngoni tetap batahang percaya biar dapa siksa sama deng dulu Yesus Kristus da batahang waktu dapa siksa.

⁶Sudara-sudara, atas nama Tuhan Yesus Kristus, torang suru pa ngoni supaya ngoni bajao dari tu sudara-sudara yang percaya yang jadi malas sampe nyanda ja beking dorang pe karja hari-hari deng nyanda ja iko tu ajaran yang torang so kase pa ngoni.

⁷Soalnya ngoni sandiri tau kalu ngoni musti ambe conto dari tu torang pe cara hidop, waktu torang da sama-sama deng ngoni torang nyanda perna malas bakarja.

⁸Torang lei nyanda perna makang orang pe makanan kong nyanda bayar. Mar torang komang brusaha bakarja kras siang deng malam supaya torang nyanda jadi beban pa sapa jo dari pa ngoni.

⁹Torang beking itu bukang lantaran torang nyanda ada hak for jemaat mo bantu, mar torang karja kras supaya torang bole jadi conto for ngoni mo iko akang.

¹⁰Tempo hari waktu torang sama-sama deng ngoni, torang so prenta pa ngoni kalu ada orang yang nimau bakarja, dia nimbole makang.

¹¹Torang bilang bagitu lantaran torang dengar kalu di antara pa ngoni ada orang-orang yang malas kong dorang nimau bakarja, malatare dorang itu cuma suka ja maso campur orang laeng pe urusan.

¹²Pa tu orang-orang rupa itu, deng kuasa dari Tuhan Yesus Kristus, torang prenta deng kase nasehat supaya dorang hidop deng cara yang bae kong bakarja for mo dapa makang.

¹³Kong ngoni sudara-sudara, ngoni jang pastiu ja beking tu bae.

¹⁴Kalu ada orang yang nimau mo iko tu torang da tulis di surat ini, ngoni musti hati-hati deng dia kong jang bergaul dekat deng dia supaya dia jadi malo kong bertobat.

¹⁵Mar jang ngoni anggap dia itu musu, lebe bae ngoni togor pa dia lantaran dia itu ngoni pe sudara yang percaya.

¹⁶Tuhan yang bole beking manusia hidop deng hati tenang, torang minta pa Dia supaya siang deng malam Dia beking torang pe hati tenang dalam samua hal. Torang lei minta supaya Tuhan sama-sama deng ngoni samua.

¹⁷Tu salam ini dari kita, Paulus. Kita tu da tulis tu salam ini deng kita pe tangan sandiri. Samua surat yang kita beking da pake tanda bagitu. Ini tu beking beda kita pe surat deng orang laeng pe surat.

¹⁸Kita minta supaya Tuhan Yesus Kristus se tunjung tu Dia pe bae for ngoni samua.